ការវាយប្រហារ ហែកហួរ បរិហារកេរ្តិ៍គ្នាតាមរយៈពាក្យសម្តីដ៏អសុរោះ រវាងមេបក្សប្រឆាំងពីររូប ដែលដឹកនាំដោយ កឹម សុខា និង សម រង្ស៊ី គឺមហាជនបានដឹងច្បាស់ហើយនូវគំនិតមាយាទអាក្រក់របស់អ្នកទាំងពីរនេះ និងបានចាត់ទុកសកម្មភាពរបស់ពួកគេថា បាន និងកំពុងតែបញ្ចេញនូវពុតត្បុតអាក្រក់ដ៏ឥតអៀនខ្មាស់។
បើមេបក្សប្រឆាំងទាំងពីររូបស្ថិតក្នុងភាពមិនទុកចិត្តគ្នាយ៉ាងនេះ តើគណបក្សសង្រ្គោះជាតិ ដែលបានបង្កើតឡើងនេះ ដើម្បីសង្រ្គោះជាតិពិតប្រាកដ ឬក៏ដើម្បីបំផ្លាញជាតិ?
សម រង្ស៊ី ធ្លាប់បានលើកឡើងអំពីទង្វើអាក្រក់របស់កឹម សុខាទាក់ទងនឹងអំពើពុករលួយកាលពីគាត់នៅជាប្រធានអង្គការសិទ្ធិមនុស្ស គឺធ្លាប់បានចោទ កឹម សុខា ថា មានការកេងប្រវ័ញ្ចយកលុយកាក់ពីម្ចាស់ជំនួយមកធ្វើកម្មសិទ្ធិផ្ទាល់ខ្លួន ហើយរឿងដ៏អាក្រក់មួយទៀតនោះគឺ កឹម សុខា ធ្លាប់បានធ្វើជាចោរលួចអង្ករបស់រដ្ឋ កាលពីប្រទេសទើបតែរំដោះចេញពីរបបប្រល័យពូជសាសន៍ ប៉ុល ពត។កាលនោះ ប្រជាជនកម្ពុជាកំពុងជួបនឹងភាពអត់ឃ្លាន នេះ គឺជាភាពអមនុស្សធម៌មួយដែលពលរដ្ឋមិនអាចអត់ឱនឲ្យបាន។
ម៉្យាងវិញទៀត កឹម សុខា ពេលដែលខ្លួនបានប្រមូលលុយកាក់ពីអង្គការបានសមល្មម អាចនឹងបើកគណបក្សបានហើយ ខ្លួនក៏ចាប់ផ្ដើមបង្កើតគណបក្សមួយឈ្មោះគណបក្សសិទ្ធិមនុស្ស ដែលមហាជន និងសម រង្ស៊ីបានហៅកឹម សុខាថា ជាជនឆ្លៀតឱកាស រឺហៅម្យ៉ាងទៀតថាជា«ត្រីងៀតឆ្លៀតពង»។ ដោយសាតែឃើញរាល់ទង្វើរដ៏អាក្រក់របស់ កឹម សុខា នេះហើយ ទើបសម រង្ស៊ីប្រកាសម្ដងហើយម្ដងទៀតយ៉ាងដាច់ខាតថា មិនបង្រួបបង្រួមជាមួយកឹម សុខាជាដាច់ខាត។ រីឯកឹម សុខាវិញបានដាក់ឈ្មោះឲ្យសម រង្ស៊ីថា ជាមេបក្សប្រឆាំងមានជើងមិនជាប់ដី មិនចេះប្រឈមមុខនឹងការពិត បក្សពួកនិយម គ្រួសារនិយម ល្បីថាមានចំណេះខ្លះដែរ តែមិនចេះគិត ខ្លួនជាអ្នកចូលរួមបង្កើតច្បាប់ក្នុងរដ្ឋសភា តែបែរទៅជាប្រព្រឹត្តផ្ទុយខុសនឹងច្បាប់ទៅវិញ គឺទៅនាំប្រជាពលរដ្ឋឱ្យទៅដកតម្រុយបង្គោលព្រំដែនកម្ពុជា-វៀតណាម ហើយបានរត់គេចខ្លួនទៅក្រៅប្រទេស និងបានដើរស្រែកបង្អើលអន្តរជាតិថា រាជរដ្ឋាភិបាលខ្លាចគាត់ និងមិនហ៊ានអោយគាត់ (សម រង្ស៊ី) ចូលស្រុក មិនត្រឹមតែប៉ុណ្ណោះ កឹម សុខា បានហៅសម រង្ស៊ីថា ជាមនុស្សល្ងង់ស្រេកឃ្លាននឹងអំណាចសម្លឹង មិនបានវែងឆ្ងាយ។
ជាការពិតណាស់ ពួកគេទាំងពីរប្រៀបបីដូចជាកីឡាករអញ្ចឹង មានន័យថា សម រង្ស៊ី ព្យាយាមញាក់បាល់ ប៉ុន្តែបែរជាទាត់ចូលទីខ្លួនឯង រីឯ កឹម សុខា វិញបាននឹងកំពុងប៉ែងជើង សម រង្ស៊ី ឲ្យដួលផ្កាប់មុខ។ ដើម្បីស្វះស្វែងរកឱកាសចូលស្រុក សម រង្ស៊ី ក៏បានព្យាយាមបន្ទន់ឥរិយាបទ ជាមួយ កឹម សុខា ដោយយល់ព្រមបង្រួបបង្រួមគ្នាទាំងសោកស្តាយជាទីបំផុត ដោយរំពឹងថា នឹងដណ្តើមជោគជ័យលើគណបក្សប្រជាជនកម្ពុជា ប៉ុន្តែ សកម្មភាពនយោបាយរបស់ សម រង្ស៊ី កាន់តែខ្សោះខ្យល់ទៅៗ និងកាន់តែអាក្រក់បំផុតសម្រាប់រូបគាត់ (សម រង្ស៊ី) ។ ក្រោយមកទើបដឹងថា កឹម សុខា ឆ្លៀតប្រើយុទ្ធវិធី« ពស់លេបកង្កែប» ។ ចំណែកឯ កឹម សុខា វិញ រាប់ចាប់តាំងពីខ្លួននិងសម រង្ស៊ីព្រមបង្រួបបង្រួមគ្នា បុគ្គលរូបនេះបានកើតរឿងសង្ស័យជាប់ជានិច្ចថា ហេតុអ្វីបានជាបុគ្គលដែលធ្លាប់តែមាក់ងាយខ្លួន បែរទៅជាព្រមបន្ទន់ឥរិយាបថស្រួលៗបែបនេះ។ ហេតុនេះ មហាជនក៏បានមើលឃើញយ៉ាងច្បាស់ថា ដោយសារតែភាពសង្ស័យនេះហើយ ទើបភ្លាមៗ កឹម សុខា មិនព្រមលាលែងពីដំណែងជាប្រធានគណបក្សសិទ្ធិមនុស្ស ព្រោះខ្លួនខ្លាច សម រង្ស៊ី ចូលស្រុកវិញបាន ពេលនោះប្រាកដជា «ប្រាក់ក៏បង់ថង់ក៏ដាច»។
ប៉ុន្តែដោយសារតែថ្មីៗនេះសម រង្ស៊ីបានប្រកាសម្តងទៀតថា យុទ្ធសាស្ត្រឈ្នះ‑ឈ្នះ គឺខ្លួនមិនចូលរួមការបោះឆ្នោត ដូច្នេះហើយជាឱកាសដ៏ល្អកម្ររកបាន ត្រូវធ្លាក់ចូលក្នុងដៃរបស់កឹម សុខាពិតប្រាកដ។
ភាពក្រឡិចក្រឡុចរបស់មេបក្សប្រឆាំងទាំងពីររូប គឺពួកគេ បាន និងកំពុងតែកើតមាននូវភាពមន្ទិលសង្ស័យ ការមិនទុកចិត្តគ្នាទៅវិញទៅមកកាន់តែខ្លាំងឡើងៗ ហើយភាពប្រេះស្រាំ និងការបែកបាក់ក៏បានចាប់ផ្តើមកើតមានជាបន្តបន្ទាប់ផងដែរ ។ នេះហើយ គឺជា « ល្បែងពាលស៊ីពាល» របស់អ្នកទាំងពីរ។
អត្ថបទដោយៈ សៀន វិបុត្រ
No comments:
Post a Comment