រដូវបោះឆ្នោតបានខិតជិតមកដល់ គណបក្សនយោបាយភាគច្រើន កំពុងមានការមមាញឹកយ៉ាងខ្លាំងក្នុងការរៀបចំរចនាសម្ព័ន្ធ និង ពង្រឹងកម្លាំងតាមមូលដ្ឋាន ដែលជាសមាជិកគណបក្សរបស់ខ្លួន ។ ចំណែកគណបក្សកាន់អំណាច គឺគណបក្សប្រជាជនកម្ពុជាវិញ ដោយមានភាពរឹងមាំខ្លាំងលើគ្រប់វិស័យ ពិសេសរចនាសម្ព័ន្ធគ្រប់គ្រងគ្រប់ជាន់ថ្នាក់មានភាពល្អប្រសើរហើយនោះ ក៏បានបង្ហាញភាពរវល់វក់វីនឹងការចុះជួយប្រជាពលរដ្ឋដែលរងគ្រោះទឹកជំនន់ ដោយមិនគិតពីនិន្នាការគណបក្សនយោបាយឡើយ ។ ម៉្យាងទៀត គណបក្សប្រជាជនកម្ពុជា ថែមទាំងបានអំពាវនាវស្វែងរកជំនួយគ្រប់រូបភាពពីអង្គការជាតិ អន្តរជាតិ គណបក្សនយោបាយក្នុងស្រុកឲ្យងាកមកជួយប្រជាពលរដ្ឋ ដែលលិចលង់ដោយគ្រោះធម្មជាតិ គំរាមកំហែងដ៏ធ្ងន់ធ្ងរនេះ ។
ដោយឡែកគណបក្ស សម រង្ស៊ី វិញ គួរឲ្យអស់សំណើចណាស់ គឺគណបក្សនេះកំពុងតែរវល់ឈ្លោះបែកបាក់ផ្ទៃក្នុង ក្នុងការដណ្តើមអំណាចគ្នាក្នុងគណបក្ស ដោយមិនរវល់នឹងបញ្ហាចំពោះមុខ ដែលប្រទេសជាតិជួបប្រឈមយ៉ាងធ្ងន់ធ្ងរនូវគ្រោះទឹកជំនន់ឡើយ ។ មិនតែប៉ុណ្ណោះគណបក្ស សម រង្ស៊ី ដែលតែងតែអួតក្អេងក្អាងថា ជាគណបក្សប្រកាន់នូវលទ្ធិប្រជាធិបតេយ្យនោះ បែរជាដើរមិនចំផ្លូវលទ្ធិប្រជាធិបតេយ្យពិតបា្រកដ ដែលខ្លួនតែងតែលើកឡើងនោះទេ ហើយថែមទាំងបានអនុវត្តន៍ផ្ទុយពី គោលការណ៍ នេះទៅវិញ ដោយបានបណ្តេញសមាជិកជាន់ខ្ពស់ ថ្នាក់រដ្ឋសភា និង ព្រឹទ្ធសភា ចេញពីបក្សដោយគ្រាន់តែ លាបព៌ណចោទប្រកាន់ក្រុមសមាជិកទាំងនោះ ថាក្បត់គណបក្ស និងជាខ្សែរយៈឲ្យអ្នកនេះ អ្នកនោះ ។
បើយើងបិទភ្នែកនឹកគិតស្រមៃបន្តិចទៅ យើងនឹងនឹកឃើញដល់របបគ្រប់គ្រងរបស់ខ្មែរក្រហម បីឆ្នាំ បាំ្របីខែ ម្ភៃថ្ងៃ ដែលបានសម្លាប់ប្រជាពលរដ្ឋស្លូតត្រង់ជិត ពីរលាននាក់នោះ គឺមានរូបភាពដូចគ្នាទៅនឹង រូបមន្ត ដែលគណបក្ស សម រង្ស៊ី បានយកមកប្រើលើសមាជិកជាន់ខ្ពស់ នៃគណបក្សនេះអញ្ចឹង ព្រោះថាបើគេចង់សម្លាប់នរណាម្នាក់នៅក្នុងរបបនោះ គេគ្រាន់តែលាបពណ៌អ្នកនោះថា ជាជនក្បត់បដិវត្តន៍ គឺជាការស្រេច ។
អ្វីដែលគួរឲ្យចាប់អារម្មណ៍ជាងនេះទៅទៀតនោះ គឺបន្ទាប់ពីមានការដាក់ពាក្យបណ្តឹងរបស់អ្នកតំណាងរាស្ត្រម្នាក់នៃគណបក្ស សម រង្ស៊ី ដែលត្រូវបានគេបណ្តេញចេញពីតួនាទីជាអ្នកតំណាងរាស្ត្រនៅពេលថ្មីៗ ទៅតុលាការរាជធានីភ្នំពេញ ដើម្បីស្វែងរកយុត្តិធម៌ បែរជាត្រូវបានលោក គង់ គាំ ប្រធានស្តីទីគណបក្ស សម រង្ស៊ី ព្រមានដល់ចៅក្រមឲ្យបញ្ឈប់ការប្រើអំណាចតុលាការមកជ្រៀតជ្រែកការលុបឈ្មោះនេះទៅវិញ ដែលទង្វើរបស់លោក គង់ គាំ គឺបានបង្ហាញយ៉ាងច្បាស់ថា ជាការកៀបសង្កត់ និងជ្រៀតជ្រែកយ៉ាងកំរោល ទៅលើប្រព័ន្ធតុលាការកម្ពុជា ដែលជាស្ថាប័នឯករាជ្យ ត្រូតែមានកាតព្វកិច្ចចាត់ការទៅតាមនីតិវិធីនៃច្បាប់។
ដូច្នេះទង្វើររបស់គណបក្ស សម រង្ស៊ី ជាពិសេស លោក សម រង្ស៊ី ផ្ទាល់ គឺជាអំពើអមនុស្សធម៌ និង ឃោរឃៅ មិនចាញ់របបខ្មែរក្រហមឡើយ ព្រោះបានបោកបា្រស់ទាំងកម្លាំងកាយ កម្លាំងចិត្ត ពេលវេលា និង បា្រក់កាសរបស់អ្នកដ៏ទៃអស់យ៉ាងច្រើនហើយ ទើបធ្វើការទាត់អ្នកទាំងនោះចោល ដោយគ្មាននឹកទៅដល់គុណបំណាច់នៃការតស៊ូរបស់អ្នកទាំងនោះបន្តិចបន្តួចសោះឡើយ ដែលផ្ទុយស្រឡះពីគណបក្សប្រជាជនកម្ពុជា តែងតែយកចិត្តដាក់គ្រប់យ៉ាងដល់សមាជិកបក្ស គឺគ្រប់គ្នា សុទ្ធតែទទួលបានការសណ្តោសប្រណីនឹងគិតគូពីថ្នាក់ដឹកនាំកំពូលៗ ។ របៀបនេះនៃការដឹកនាំដ៏ល្អនេះ ទើបគណបក្សប្រជាជនកម្ពុជា មានភាពរឹងមាំដូចសព្វថ្ងៃនេះ ។
ប៉ុន្តែរឿងដែលគួរឲ្យអាណិតអាសូរជាងនេះទៅទៀតនោះ គឺអង្គការជាតិ អន្តរជាតិខ្លះ និងក្រុមអ្នកវិភាគឯករាជ្យដែលតែងតែប្រកាសគាំទ្រលទ្ធិប្រជាធិបតេយ្យមិនដាច់ពីមាត់ថា អយុត្តិធម៌អញ្ចេះ អយុត្តិធម៌អញ្ចុះ តែដល់ពេលគណបក្ស សម រង្ស៊ី បណ្តេញសមាជិកតំណាងរាស្រ្ត និង សមាជិកព្រឹទ្ធសភា ដែលខុសនឹងគោលការណ៍លទ្ធិប្រជាធិបតេយ្យ និងជាការប្រមាថដល់អ្នកបោះឆ្នោតឲ្យគណបក្សរបស់ខ្លួន ស្រាប់តែមានសភាពស្ងាត់ឈឹង គ្មានក្រុមណាមួយចេញមកជួយបកស្រាយដោយសំអាងច្បាប់នេះ ច្បាប់នោះសោះ បែរជាទុកឲ្យក្រុមអ្នកតំណាងរាស្រ្តទាំងនោះទទួលរងអយុតិ្តធម៌តាមកម្មព្រេងវាសនាទៅវិញ នេះហើយដែលគេតែងតែនិយាយថា ការអនុវត្តច្បាប់ពីរខុសគ្នាលើបញ្ហាតែមួយ ដែលក្រុមអង្គការជាតិ អន្តរជាតិខ្លះ និង អ្នកវិភាគឯករាជ្យមួយចំនួនតែងតែប្រកាន់យកដើម្បីធ្វើការចោទប្រកាន់លើគណបក្សប្រជាជនកម្ពុជា កន្លងមកនោះ ។
សរុបសេចក្តីមក សកម្មភាពគណបក្ស សម រង្ស៊ី ដែលបានធ្វើមកលើសមាជិកជាន់ខ្ពស់របស់គណបក្ស ខ្លួនឯងបែបនេះ គឺបានបង្ហាញយ៉ាងច្បាស់ដល់មតិជាតិ អន្តរជាតិ ថាជាអំពើផ្តាច់ការ និង អមនុស្សធម៌ គ្មានការទទួលខុសត្រូវ មិនអាចទុកចិត្តបានទាំងក្នុងក្របខណ្ឌគណបក្ស និង ក្នុងក្របខណ្ឌជាតិ ថែមទាំងមិនបានជួយជំរុញការអនុវត្តលទ្ធិប្រជាធិបតេយ្យនៅកម្ពុជាឱ្យបានប្រសើរទៀតផង ។ ផ្ទុយទៅវិញធ្វើឲ្យការអនុវត្តលទ្ធិប្រជាធិបតេយ្យ ក្នុងក្របខណ្ឌគណបក្ស និងការបញ្ចេញមតិទស្សនៈក្នុងក្របខណ្ឌគណបក្សនឹងថយចុះ ហើយលក្ខណៈទាំងនេះនឹងធ្វើឲ្យគណបក្ស សម រង្ស៊ី ឈានទៅរកភាពបែកបាក់កាន់តែខ្លាំងទៅៗ និងភាពរលំរលាយនាពេលអនាគតជាក់ជាមិនខានឡើយ ៕
ស.ធារឹទ្ធ
No comments:
Post a Comment