អភិបាលខេត្តព្រះសីហនុ ៖ យុវជនជាកម្លាំងស្នូលក្នុងការចូលរួមកសាង និងអភិវឌ្ឍន៍សង្គមជាតិ

ព្រះសីហនុ៖ នៅថ្ងៃទី២៥ ខែកញ្ញា ឆ្នាំ២០២០ លោក គួច ចំរើន អភិបាល នៃគណៈអភិបាលខេត្តព្រះសីហនុ អនុញ្ញាតិឱ្យលោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ ដឹកនាំក្រុមយុវជនស្ម័គ្រចិត្ត ៣ ក្រុម ចូលជួបនិងសុំការណែនាំ ដោយមានការចូលរួមដោយលោកស្រីអភិបាលរងខេត្ត នាយករដ្ឋបាលសាលាខេត្ត លោកអភិបាលក្រុងព្រះសីហនុ និងប្រធានមន្ទីរ អង្គភាពផងដែរ ។ 

លោកស្រី អ៊ុច សោភា ប្រធានមន្ទីរអប់រំ យុវជន និងកីឡាខេត្តព្រះសីហនុ បានជំរាបជូនពីគោលបំណងរបស់ក្រុមយុវជនស្ម័គ្រចិត្តទាំង ៣ក្រុម 

១.សុខាភិបាល លើប្រធានបទ សហគមន៍ខ្ញុំពោពេញទៅដោយសមត្ថភាព។

២.កសិកម្ម ប្រធានបទបណ្តុះបណ្តាលបែបប្រពៃណី។

៣.បរិស្ថាន ប្រធានបទទីក្រុងស្អាត បរិស្ថានស្អាត សេវាល្អ ។ 

លោក គួច ចំរើន អភិបាលខេត្តព្រះសីហនុ បានកោតសសើរនិងវាយតម្លៃស្មារតីនៃក្រុមយុវជនស្ម័គ្រចិត្ត ក៍ដូចជាមន្ទីរអប់រំ យុវជន និងកីឡា ដែលមានគម្រោងផែនការសកម្មភាពរៀងៗខ្លួនដឹកនាំធ្វើសកម្មភាពលើប្រធានបទខាងលើ។ រដ្ឋបាលខេត្តឯកភាព នៃការរៀបចំផែនការសកម្មភាព និងការចុះធ្វើសកម្មភាពជាក់ស្តែងក្នុងសង្គម។ហើយការងារនេះគឺជាគម្រោងផែនការសមស្របច្រើនតែនៅមានចំណុចខ្វះខាតត្រូវធ្វើការកែលម្អ គឺធ្វើយ៉ាងណាឱ្យប្រជាពលរដ្ឋក្នុងសហគមន៍យល់ដឹងនិងចូលរួមក្នុងសកម្មភាពជាការសំខាន់ ពីព្រោះយុវជនជាកម្លាំងស្នូលក្នុងការចូលរួមកសាង និងអភិវឌ្ឍន៍សង្គមជាតិ ។ 

លោកអភិបាលខេត្ត បានបន្តថាវិស័យទេសចរណ៍នាំមកនូវកំណើនសេដ្ឋកិច្ចដោយមិនមានផលប៉ះពាល់ វិស័យឧស្សាហកម្មនាំមកនូវកំណើនសេដ្ឋកិច្ច ក៍ប៉ុន្តែវាមានផលប៉ះពាល់ដល់បរិស្ថាន  វិស័យកសិកម្ម ក៍នាំមកនូវកំណើនសេដ្ឋកិច្ចដូចគ្នា ។ ខេត្តព្រះសីហនុមានសក្តានុពលដូចជា ឆ្នេរសមុទ្រ  ព្រលានយន្តហោះអន្តរជាតិ  កំពង់ផែស្វយ័តក្រុងព្រះសីហនុ ទឹកជ្រៅនិងផ្លូវគមនាគមន៍ ទាមទារឱ្យយើងទាំងអស់គ្នាប្រើប្រាស់ធនធានសក្តានុពលធម្មជាតិឱ្យអស់លទ្ធភាពក្នុងការកសាង និងអភិវឌ្ឍន៍ខេត្តព្រះសីហនុ ។ នៅក្នុងឱកាសនោះលោកអភិបាលខេត្តក៍បានឧបត្ថម្ភថវិកាដល់យុវជនទាំង ៣ក្រុម ក្នុងមួយក្រុមទទួលបានថវិកា ២លានរៀល ៕