សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រ តិភូជាន់ខ្ពស់រាជរដ្ឋាភិបាលកម្ពុជា បានអញ្ជើញតាមយន្តហោះពិសេសរបស់ព្រះរាជាណាចក្រកម្ពុជា ទៅដល់ចំណតអាកាសយានដ្ឋានអន្តរជាតិទីក្រុងហុងកុង ប្រកបដោយសុវត្តិភាព កាលពីវេលាម៉ោង១០ និង៣៥នាទីម៉ោងនៅទីក្រុងហុងកុង សាធារណរដ្ឋប្រជាមានិតចិន ត្រូវនឹងម៉ោង៩និង៣៥នាទី ម៉ោងក្នុងប្រទេសកម្ពុជា ដើម្បីអញ្ជើញទៅចូលរួមកិច្ចប្រជុំកំពូលពិសេសអាស៊ាន សហរដ្ឋអាមេរិក នៅទីក្រុង Rancho Mirage រដ្ឋកាលីហ្វ័រញ៉ា សហរដ្ឋអាមេរិក ដែលនឹងប្រារព្វធ្វើឡើងនៅថ្ងៃទី១៥-១៦កុម្ភៈ។
នៅចំណតអាកាសយានដ្ឋានអន្តរជាតិទីក្រុងហុងកុង ជាទីដែលសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់ចុះសំចតវត្តមាន នៃការអញ្ជើញដល់របស់សម្តេចតេជោនាយករដ្ឋមន្រ្តី ត្រូវបានការធ្វើគារវកិច្ចស្វាគមន៍ ពីលោក ផន ពៅ អគ្គកុងស៊ុលព្រះរាជាណាចក្រកម្ពុជា ប្រចាំទីក្រុងហុងកុង ព្រមទាំងមន្រ្តីការទូត របស់ប្រទេសកម្ពុជាជាច្រើនរូប។
តាមកម្មវិធីដែលបានគ្រោងទុក សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់ និងធ្វើដំណើរចាកចេញពីចំណតអាកាសយានដ្ឋានអន្តរជាតិទីក្រុងហុងកុង នៅវេលាម៉ោង១២ និង២០នាទី ថ្ងៃទី១៤កុម្ភៈ ដើម្បីបន្តដំណើរទៅកាន់ទីក្រុង San Francisco រដ្ឋកាលីហ្វ័រញ៉ា សហរដ្ឋអាមេរិក ជាទីដែលសម្តេចតេជោនាយករដ្ឋមន្រ្តី និងបណ្តាមេដឹកនាំអាស៊ាន-សហរដ្ឋអាមេរិក អញ្ជើញចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅទីក្រុង Rancho Mirage រដ្ឋកាលីហ្វ័រញ៉ា សហរដ្ឋអាមេរិក ដែលនឹងប្រព្រឹត្តធ្វើឡើងនៅថ្ងៃទី១៥-១៦កុម្ភៈ។
សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា និងអញ្ជើញចូលរួមកិច្ចប្រជុំកំពូលអាស៊ាន-សហរដ្ឋអាមេរិក នៅទីក្រុង Rancho Mirage រដ្ឋកាលីហ្វ័រញ៉ា សហរដ្ឋអាមេរិក អ្នកយកព័ត៌មានពិសេស នឹងធ្វើសេចក្តីរាយការណ៍ពីទីក្រុង Rancho Mirage រដ្ឋកាលីហ្វ័រញ៉ា សហរដ្ឋអាមេរិក ជូនជាបន្តបន្ទាប់ទៅទៀត។
No comments:
Post a Comment