អគ្គលេខាធិការដ្ឋានរដ្ឋសភាអំពាវនាវដល់មន្ត្រីរាជការទាំងអស់ ចូលរួមសកម្មភាពមនុស្សធម៌ បរិច្ចាគឈាម នៅថ្ងៃទី១៨ ខែកុម្ភៈ ឆ្នាំ២០១៦ខាងមុខនេះ នៅវិមានរដ្ឋសភា។
យោងតាមសេចក្ដីជូនដំណឹងរបស់ អគ្គលេខាធិការដ្ឋានរដ្ឋសភា ចុះថ្ងៃទី២០ ខែមករា ឆ្នាំ២០១៦កន្លងមក បានឲ្យដឹងថា អគ្គលេខាធិការដ្ឋានរដ្ឋសភា សហការជាមួយមជ្ឈមណ្ឌលជាតិផ្ដល់ឈាម នឹងរៀបចំកម្មវិធី « អប់រំផ្សព្វផ្សាយ និងធ្វើការបរិច្ចាគឈាម ជូនមជ្ឈមណ្ឌលជាតិផ្ដល់ឈាម ទៅតាមការស្ម័គ្រចិត្ត» ជូនដល់មន្ត្រីរាជការនៃអគ្គលេខាធិការដ្ឋានរដ្ឋសភាទាំងអស់ បានយល់ដឹង និងចូលរួមធ្វើការបរិច្ចាគឈាមដោយស្ម័គ្រចិត្ត ដើម្បីជួយសង្គ្រោះជីវិតជនរងគ្រោះ។
នៅក្នុងសេចក្ដីជូនដំណឹងដដែលបានបញ្ជាក់ថា ការបរិច្ចាគឈាម គឺជាអំណោយមនុស្សធម៌ដ៏ថ្លៃថ្លាសម្រាប់ជួយសង្គ្រោះជីវិតមនុស្ស ដែលស្ថិតក្នុង ភាពអាសន្នចាំបាច់ត្រូវការឈាម។ ការបរិច្ចាគនេះ ពុំធ្វើឲ្យទន់ខ្សោយ ឬបះពាល់សុខភាពអ្នកការបរិច្ចាគឈាមបន្តិចសោះឡើយ ផ្ទុយទៅវិញ គឺជា គុណបុណ្យដ៏ធំមួយ ដែលជាកាយវិការជួយដល់ញាតិមិត្តជិតឆ្ងាយរបស់យើង ដែលត្រូវការឈាមដើម្បីសង្គ្រោះជីវិត។
តាមព័ត៌មានពីមជ្ឈមណ្ឌលជាតិផ្ដល់ឈាមបានឲ្យដឹងថា សព្វថ្ងៃនេះ មជ្ឈមណ្ឌលជាតិផ្ដល់ឈាមមិនទាន់មានឈាមគ្រប់គ្រាន់សម្រាប់ ជួយសង្គ្រោះ ជីវិតមនុស្ស ដែលត្រូវការឈាមបន្ទាន់នៅឡើយទេ។ ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការឈាមលើសពី១០០ប្លោក សម្រាប់ជួយសង្គ្រោះ ជនរងគ្រោះផ្សេងៗ ហើយនៅទូទាំងប្រទេស ត្រូវការឈាមប្រមាណ១៥០ប្លោកជារៀងរាល់ថ្ងៃ ដូចនេះមជ្ឈមណ្ឌលជាតិផ្តល់ឈាមត្រូវការឈាម បន្ថែមទៀត ដើម្បីសង្គ្រោះជីវិតមនុស្សបន្ទាន់ ។
សូមបញ្ជាក់ថាអគ្គលេខាធិការដ្ឋានរដ្ឋសភាធ្លាប់បានរៀបចំធ្វើការបរិច្ចាគឈាមម្ដងរួចមកហើយ កាលពីខែមករា ឆ្នាំ២០១៥ ។
No comments:
Post a Comment