លោក កេង ប៊ុណ្ណា ផ្តាំផ្ញើលោកអភិបាលរងស្រុកត្បូងឃ្មុំ ទើបតែងតាំងថ្មី ត្រូវខិតខំសហការ និងសាមគ្គីផ្ទៃក្នុងឲ្យបានល្អ

ត្បូងឃ្មុំ៖ អភិបាលរងខេត្តត្បូងឃ្មុំ លោក កេង ប៊ុណ្ណា នៅថ្ងៃទី១៨ ខែធ្នូ ឆ្នាំ២០១៩នេះ អញ្ជើញប្រកាស លោក ហេង សុធី ឲ្យចូលកាន់តំណែងអភិបាលរងស្រុកត្បូងឃ្មុំថ្មី ដោយមានការចូលរួមពីលោក សេង សុខខឿន អភិបាលស្រុកត្បូងឃ្មុំ និងអភិបាលរងស្រុក នាយករងរដ្ឋបាលសាលាខេត្ត ប្រធាន អនុប្រធានមន្ទីរអង្គភាព ព្រមទាំងមន្ត្រីរាជការជុំវិញស្រុក។

លោក កេង ប៊ុណ្ណា បានលើកឡើងថា ការប្រកាសតែងតាំងចូលកាន់មុខតំណែងនេះ វាជាបែបបទនីតិវិធី បានកំណត់ក្នុងច្បាប់ ហើយត្រូវបានយកមកអនុវត្តក្នុងប្រព័ន្ធរដ្ឋបាល សំដៅធ្វើយ៉ាងណាឱ្យការគ្រប់គ្រង ដឹកនាំរដ្ឋបាលកាន់តែមានប្រសិទ្ធភាព ក្នុងការឆ្លើយតបនឹងតម្រូវការនៅមូលដ្ឋាន។

ជាមួយគ្នានោះ លោក កេង ប៊ុណ្ណា ក៏បានធ្វើការណែនាំឱ្យលោកអភិបាលរងស្រុកថ្មី ត្រូវស្តាប់ការណែនាំពីលោកអភិបាលស្រុក សហការគ្នាសាមគ្គីគ្នា ដើម្បីដឹកនាំការងារ ក្នុងស្រុកឱ្យទទួលបានជោគជ័យ ជាពិសេសត្រូវយកចិត្តទុកដាក់អនុវត្តន៍គោលនយោបាយភូមិ-ឃុំសុវត្ថិភាព បញ្ឈប់ឱ្យបាននូវបញ្ហាល្បែងស៊ីសង និងបទល្មើសគ្រប់ប្រភេទឱ្យមានប្រសិទ្ធិភាព។

លោក សេង សុធី អភិបាលរងស្រុកទើបឡើងកាន់តំណែងថ្មី បានឡើងប្តេជ្ញាអនុវត្តន៍ ចំនួន៥ចំណុច ក្នុងនោះរួមមាន៖
ទី១៖ អនុវត្តឱ្យបានជាដាច់ខាតនូវរាល់គោលនយោបាយ ច្បាប់ សារាចរណែនាំ លិខិតបទដ្ឋាននានានៃរាជរដ្ឋាភិបាល អាជ្ញាធរខេត្ត និងអនុសាសន៍ណែនាំនានារបស់ថ្នាក់ដឹកនាំ,

ទី២៖ រក្សាសាមគ្គីភាពផ្ទៃក្នុង ក្នុងជួរគណៈអភិបាល និងមន្ត្រីក្រោមឱវាទឱ្យបានល្អប្រសើរ បង្កើនទំនាក់ទំនងឱ្យបានស្អិតរមួតជួយយកអាសារគ្នាទៅវិញទៅមកជាមហាគ្រួសាររដ្ឋបាលស្រុកដ៏កក់ក្តៅ ,

ទី៣៖ សហការបំពេញការងារ ឱ្យបានល្អប្រសើរជាមួយក្រសួង ស្ថាប័នថ្នាក់ជាតិ មន្ទីរអង្គភាពជំនាញជុំវិញខេត្ត ការិយាល័យ អង្គភាពជំនាញជុំវិញស្រុក,

ទី៤៖ យកចិត្តទុកដាក់អស់ ពីកម្លាំងកាយចិត្តក្នុងការបំពេញការងារស្មោះត្រង់បម្រើជាតិមាតុភូមិ ដោយឈរលើគោលការណ៍តម្កល់ផលប្រយោជន៍ជាតិជាធំ

ទី៥៖ គោរពនូវអភិក្រមរបស់រាជរដ្ឋាភិបាល និងខិតខំអភិវឌ្ឍន៍មូលដ្ឋាន និងផ្តល់សេវាជូនប្រជាពលរដ្ឋឱ្យកាន់តែល្អប្រសើរ ក្នុងគោលបំណងលើកកម្ពស់ជីវភាពរស់នៅ កាត់បន្ថយភាពក្រីក្ររបស់ប្រជាពលរដ្ឋ ៕