លោកនាយករដ្ឋមន្រ្តី ហ៊ុន សែន អបអរសាទរប្រទេសស្រីលង្កាដែលក្លាយជាសមាជិកថ្មីនៃគ្រួសារ CICA

លោកនាយករដ្ឋមន្រ្តី ហ៊ុន សែន បានថ្លែងអបអរសាទរដល់សាធារណរដ្ឋតាជីគីស្ថានបានធ្វើជាម្ចាស់ផ្ទះកិច្ចប្រជុំនេះ និងស្វាគមន៍ប្រទេសស្រីលង្កា ដែលក្លាយជាសមាជិកថ្មីនៃគ្រួសារ CICA ដើម្បីការកសាងទំនុកចិត្ត និងការបង្កើនភាពជឿជាក់ ក្នុងកិច្ចសហប្រតិបត្តិការលើគ្រប់វិស័យរវាងបញ្ហាប្រទេសក្នុងតំបន់របស់យើង គឺពិតជាចាំបាច់មិនអាចខ្វះបានសម្រាប់ដំណើរការអភិវឌ្ឍរបស់ប្រទេសយើងនីមួយៗ ជាពិសេស ដើម្បីជម្នះលើបញ្ហាប្រឈមនានារបស់ពិភពលោក។ លោកបានថ្លែងដូចនេះនៅរសៀលថ្ងៃទី១៥ ខែមិថុនា ឆ្នាំ២០១៩ ក្នុងឱកាសថ្លែងសុន្ទរកថាគន្លឹះក្នុងកិច្ចប្រជុំកំពូលលើកទី៥ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA) នៅទីក្រុងឌូសាន់បេ នៃសាធារណរដ្ឋតាជីគីស្ថាន។

លោកនាយករដ្ឋមន្រ្តី ហ៊ុន សែន ពិតរីករាយដែលបានមកចូលរួមក្នុងកិច្ចប្រជុំកំពូលលើកទី ៥ នៃសន្និសីទស្តីពីអន្តរសកម្មភាព និង វិធានការកសាងទំនុកចិត្តនៃតំបន់ស៊ីអាស៊ី។ លោកក៏សូមសម្តែងនូវអំណរគុណជូនចំពោះប្រជាជន និងរដ្ឋាភិបាលតាជីគីស្ថាន ដែលបានផ្តល់បដិសណ្ឋារកិច្ចយ៉ាងកក់ក្តៅដល់ប្រតិភូកម្ពុជា ក្នុងន័យនេះ ប្រធានបទនៃកិច្ចប្រជុំនាពេលនេះ ពោលគឺ «ចក្ខុវិស័យរួម ដើម្បីសន្តិសុខ និងវិបុលភាពនៃតំបន់» ពិតជាសមស្របបំផុត ដែលឆ្លុះបញ្ចាំងអំពីកិច្ចខិតខំប្រឹងប្រែងរបស់ប្រទេសសមាជិកស៊ីកា ក្នុងការស្វែងរកដំណោះស្រាយលើបញ្ហាសន្តិសុខ និងស្ថិរភាពពិភពលោក ក៏ដូចជាពង្រឹងកិច្ចសហប្រតិបត្តិការសម្រាប់ការអភិវឌ្ឍសង្គម-សេដ្ឋកិច្ចក្នុងតំបន់៕