ការលូកដៃចូលកិច្ចការផ្ទៃក្នុងប្រទេសអធិបតេយ្យ មិនបានធ្វើឱ្យសភាពការណ៍ប្រសើរជាងមុននោះទេ

លោកនាយករដ្ឋមន្រ្តី ហ៊ុន សែន បានថ្លែងថា បទពិសោធន៍ និងមេរៀនរបស់ប្រទេសលីប៊ី អឺរ៉ាក់ និង ស៊ីរី បានសបញ្ជាក់ថា ការលូកដៃចូលកិច្ចការផ្ទៃក្នុងប្រទេសអធិបតេយ្យ មិនបានធ្វើឱ្យសភាពការណ៍មានភាពប្រសើរជាងមុននោះទេក្រៅតែពីការបន្សល់ទុកនូវសោកនាដកម្មដ៏ឈឺចាប់ដល់ប្រជាជនស្លូតត្រង់ និងការបំផ្លិចបំផ្លាញ ព្រមទាំងការបន្តការហែកហូរដោយសារសង្គ្រាមស៊ីវិល។ លោកបានថ្លែងដូចនេះនៅរសៀលថ្ងៃទី១៥ ខែមិថុនា ឆ្នាំ២០១៩ ក្នុងឱកាសថ្លែងសុន្ទរកថាគន្លឹះក្នុងកិច្ចប្រជុំកំពូលលើកទី៥ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA) នៅទីក្រុងឌូសាន់បេ នៃសាធារណរដ្ឋតាជីគីស្ថាន។

លោកនាយករដ្ឋមន្រ្តី ហ៊ុន សែន បានបញ្ជាក់ថា ភាពអត្មានិយមក្នុងការប្រកួតប្រជែងអំណាច និងឥទ្ធិពល ដោយមិនបានគិតគូរពីផលប្រយោជន៍រួម តាមរយៈ មធ្យោបាយដាក់ទណ្ឌកម្ម ឬ គំនាបសេដ្ឋកិច្ច ការដកហូតការអនុគ្រោះពន្ធ និង គោលនយោបាយគាំពារនិយមបាន និងកំពុងគម្រាមដល់ស្ថិរភាព និងដំណើការអភិវឌ្ឍន៍របស់ប្រទេសជាច្រើន។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា យើងគប្បីទាញយកប្រយោជន៍ពីចំណុចខ្លាំងរបស់ស៊ីកាពោលគឺ ការផ្តោតលើវិធានការនៃការកសាងទំនុកចិត្ត ដោយលោកមើលឃើញពីសក្តានុពលដ៏ធំធេងសម្រាប់កិច្ចសហប្រតិបត្តិការក្នុងវិស័យសេដ្ឋកិច្ចពាណិជ្ជកម្ម, ការវិនិយោគ និងទេសចរណ៍៕