ប្រធានសភានៃប្រទេសហុងគ្រី កោតសរសើរពីការរីកចម្រើនរបស់កម្ពុជា ដែលខុសប្លែកពីមុនត្រូវខ្ទេចខ្ទាំដោយសារសង្គ្រាម

នៅព្រឹកថ្ងៃទី១៤ ខែមិថុនាឆ្នាំ២០១៩ បន្ទាប់ពីបានជួបពិភាក្សាការងារជាមួយប្រធានាធិបតីនៃប្រទេសហុងគ្រីរួចហើយនោះ លោកនាយករដ្ឋមន្រ្តី ហ៊ុន សែន ក៏បានជួបពិភាក្សាការងារជាបន្តជាមួយលោក ឡាស្លូ ម័រវៀវ៍ (Laszlo Kover) ប្រធានសភានៃប្រទេសហុងគ្រី។ ក្នុងជំនួបនោះ លោកប្រធានសភាពហុងគ្រី បានជម្រាបជូនលោកនាយករដ្ឋមន្រ្តី ហ៊ុន សែន ថា គាត់ធ្លាប់ទៅទស្សនកិច្ចនៅប្រទេសកម្ពុជា ហើយបានជួបជាមួយលោកសាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភាផងដែរ។

លោកបានគូសបញ្ជាក់ថា លោកបានឃើញនូវការរីកចម្រើនរបស់ប្រទេសកម្ពុជា ដែលមានការអភិវឌ្ឍច្រើន ដែលខុសប្លែកពីមុនដែលប្រទេសកម្ពុជាមិនមានអ្វីដោយត្រូវខ្ទេចខ្ទាំដោយសារសង្គ្រាម ប៉ុន្តែពេលនេះមានការរីកចំរើនយ៉ាងច្រើន និងឆាប់រហ័ស។ លោកប្រធានសភាហុងគ្រី ចង់ឃើញមានការពង្រឹងពង្រីកទំនាក់ទំនងរវាងសភា និងសភានៃប្រទេសទាំងពីរ និងសហប្រតិបត្តិការលើវិស័យវប្បធម៌ និងវិស័យដទៃទៀតទាំងទ្វេភាគី ពហុភាគីផងដែរ។

ជាការឆ្លើយតប លោកនាយករដ្ឋមន្ត្រី ហ៊ុន សែន បានមានប្រសាសន៍ថា នេះជាលើកដំបូងក្នុងនាមជានាយករដ្ឋមន្ត្រី ដែលលោកបានមកទស្សនកិច្ចក្នុងប្រទេសហុងគ្រី។ លោក ក៏បានស្នើឲ្យប្រធានព្រឹទ្ធសភា នៃប្រទេសទាំងពីរបង្កើននូវទំនាក់ទំនងជាមួយគ្នា ជាពិសេសពេលខាងមុខយើងនឹងស្ថានទូតរៀងៗខ្លួន។

លោក ក៏បានគូសបញ្ជាក់ថា ដំណើរទស្សនកិច្ចនេះ គឺបានបន្តពង្រឹងទំនាក់ទំនងដែលយើងធ្លាប់មានអោយកាន់តែល្អប្រសើរបន្ថែមទៀត ជាពិសេសលោកចង់ឃើញគោលដៅសំខាន់នៃកិច្ចសហប្រតិបត្តិការសេដ្ឋកិច្ចក្នុងការពង្រឹងសេដ្ឋកិច្ច ទេសចរណ៍ជាដើម។

លោកនាយករដ្ឋមន្រ្តី ហ៊ុន សែន ក៏បានអរគុណដល់ប្រទេសហុងគ្រីដែលបានគាំទ្រកម្ពុជា រាល់ដំណោះស្រាយបញ្ហានានា។ ឆ្លៀតក្នុងឱកាសនោះ លោក ក៏បានអញ្ជើញលោកប្រធានសភាហុងគ្រីចូលរួមកិច្ចប្រជុំសភាអាស៊ីអឺរ៉ុបនៅឆ្នាំ២០២០ ដែលកម្ពុជាត្រូវរៀបចំនោះ។

លោកប្រធានសភា ក៏បានឯកភាព និងអរគុណដល់លោកនាយករដ្ឋមន្រ្តី ហ៊ុន សែន ដែលបង្កើតយន្តការរវាងសភា និងសភានៃប្រទេសទាំងពីរ ជាពិសេសក្នុងការតាក់តែងអនុស្សរណៈសហប្រតិបត្តិការរវាងសភា នៃប្រទេសពីក្នុងការពង្រឹងស្ថាប័ននេះ។ លោកប្រធានសភាហុងគ្រី ក៏បានគួរបញ្ជាក់ថា ប្រទេសហុងគ្រីគាំទ្រទាំងស្រុងចំពោះប្រទេសកម្ពុជាដើម្បីឲ្យសភាអឺរ៉ុបផ្ដល់ការភាពយុត្តិធម៌ដល់ប្រទេសកម្ពុជាចំពោះបញ្ហារឿងការដក EBA ។

លោកប្រធានសភាហុងគ្រី បានបន្តថា តាមរយៈកិច្ចព្រមព្រៀងទាំងបីនេះគឺឆ្លុះបញ្ចាំងពីគំនិតថ្មីនៅប្រទេសទាំងពីរក្នុងកិច្ចសហប្រតិបត្តិការលើវិស័យទេសចរណ៍ ពាណិជ្ជកម្ម ហើយលោកនឹងជំរុញទំនាក់ទំនងរវាងប្រជាជន និងប្រជាជនលើវិស័យទេសចរណ៍ និងការផ្ដល់អាហារូបករណ៍ដល់ប្រទេសកម្ពុជាផងដែរ ហើយលោកសង្ឃឹមថា កម្ពុជានឹងបញ្ជូននិស្សិតទៅសិក្សានៅប្រទេសហុងគ្រីបន្តទៀត និងប្រើប្រាស់ចំណេះដឹងទាំងនោះជួយដល់ប្រទេសកម្ពុជា។ លោក ក៏បានអរគុណគុណដល់លោកនាយករដ្ឋមន្រ្តី ហ៊ុន សែន ផងដែរដែលទទួលយកនូវអញ្ជើញមកចូលរួមកិច្ចប្រជុំកំពូលនៅប្រទេសហុងគ្រីនៅអំឡុងខែតុលាខាងមុខ។

លោកនាយករដ្ឋមន្រ្តី ហ៊ុន សែន ក៏បានអរគុណដល់ប្រទេសហុងគ្រីផងដែរ ដែលតែងតែផ្ដល់អាហារូបករណ៍ និងការបណ្ដុះបណ្ដាលធនធានមនុស្សរបស់កម្ពុជា ហើយលោកសង្ឃឹមថាតាមរយៈដំណើរទស្សនកិច្ចរបស់លោកនៅខែតុលាខាងមុខ លោកនឹងបន្តការពង្រឹង ពង្រីកទំនាក់ទំនងកិច្ចសហប្រតិបត្តិការនៃប្រទេសទាំងពីរបន្ថែមអោយកាន់តែរឹងមាំបន្ថែមទៀត៕