សមាគមទូរទស្សន៍កម្ពុជា​ ច្រានចោ​លសេចក្តីថ្លែងការណ៍របស់បក្ស​ប្រឆាំងដែលបង្កប់​ចរិតពិសពុលទ​ម្លាក់​កំហុស​មិនសមហេតុផល​មកលើសារព័ត៌មាន

សមាគមទូរទស្សន៍កម្ពុជា បានចេញសេចក្តីថ្លែងការណ៍ ច្រានចោលសេចក្តីថ្លែងការណ៍របស់បក្សប្រឆាំងដែលបង្កប់ចរិតពិសពុលទម្លាក់កំហុសមិនសមហេតុផលមកលើសារព័ត៌មាន និងថែមទាំងបានបំពានតួនាទីរបស់គណៈកម្មាធិការជាតិរៀបចំការបោះឆ្នោត។ នេះបើយោងតាមសេចក្តីថ្លែងការណ៍របស់សមាគមទូរទស្សន៍កម្ពុជា ចុះថ្ងៃទី២៦ ខែមិថុនា ឆ្នាំ២០១៧។

សមាគមទូរទស្សន៍ បានបញ្ជាក់ថា ស្ថានីយ៍ទូរទស្សន៍ឯកជន មិនមែនជាកម្មសិទ្ធិរបស់គណបក្សនយោបាយណាមួយទេ។ ស្ថានីយ៍ទូរទស្សន៍ឯកជននានា មានសិទ្ធិពេញលេញដោយឯករាជ្យក្នុងការជួលម៉ោងផ្សាយឱ្យគណបក្សនយោបាយដែលមានលទ្ធភាពជួលម៉ោងផ្សាយ។ សមាគមទូរទស្សន៍ ពិតជាទទួលបាននូវការជូនដំណឹងពីស្ថានីយ៍ទូរទស្សន៍ឯកជននានាថា បានជួលម៉ោងឱ្យ គណបក្សប្រជាជនកម្ពុជា ផ្សាយអំពីការហែក្បួនឃោសនាបោះឆ្នោតនៅថ្ងៃ ចុងក្រោយ។ យោងតាមការបញ្ជាក់ពីស្ថានីយ៍ទូរទស្សន៍ឯកជននានាគឺ គណបក្សសង្រ្គោះជាតិ មិនបានទាក់ទងជួលម៉ោងផ្សាយនៅបណ្តាស្ថានីយ៍ទូរទស្សន៍ឯកជនណាមួយនោះទេ។

សមាគមទូរទស្សន៍ ក៏បានបញ្ជាក់ថា ការចេញផ្សាយនៅថ្ងៃទី២៦ ខែមិថុនា ឆ្នាំ២០១៧ របស់គណបក្សសង្រ្គោះជាតិ គឺជាសេចក្តីថ្លែងការណ៍មួលបង្កាច់ដែលគ្មានការទទួលខុសត្រូវនិងសេចក្តីថ្លែថ្នូរ ដែលជាការឆ្លុះបញ្ចាំងសារជាថ្មីឱ្យឃើញពីសារជាតិរបស់អ្នកនយោបាយចាញ់ ឆ្នោតដែលតែងតែឡាំប៉ា ក៏ប៉ុន្តែបែរជាគ្មានសេចក្តីក្លាហានប្រកាសបោះបង់ចោលនូវលទ្ធផលឆ្នោតនិងអាសនៈដែលខ្លួនទទួលបាននោះទៅវិញ៕