Thursday, April 23, 2015

សម្តេច​តេជោ​នាយក​រដ្ឋមន្រ្តី ជួប​ពិភា​ក្សា​ទ្វេភា​គីជា​មួយ ឯកឧត្តម អ៊ីប្រា​ហ៊ីម ម៉ាហឡេប (Ibrahim Mahlah) នាយក​រដ្ឋមន្រ្តី​អេហ្ស៊ីប

នៅរសៀលថ្ងៃទី២២ ខែ​មេសា ឆ្នាំ​២០១៥ សម្តេចអគ្គមហាសេនាបតីតេជោ ហ៊ុន សែន នាយក​រដ្ឋមន្រ្តីនៃព្រះរាជាណាចក្រកម្ពុជា បានទទួលជួបពិភាក្សាទ្វេភាគីជាមួយ ឯកឧត្តម អ៊ីប្រាហ៊ីម ម៉ាហឡេប (Ibrahim Mahlah) នាយករដ្ឋមន្រ្តីអេហ៊្សីប។
ក្នុងជំនួបពិភាក្សាដែល​ធ្វើឡើង​នៅក្រៅកិច្ចប្រជុំកំពូលអាស៊ី‑ អាហ្រ្វិក ប្រមុខថ្នាក់ដឹកនាំ​រដ្ឋា​ភិបាល​នៃប្រទេសទាំងពីរកម្ពុជា‑ អេហ៊្សីប បានឯកភាព​គ្នាក្នុងការជំរុញ​កិច្ចសហប្រតិ​​បត្តិការ នៃ​ប្រទេសទាំងពីរកម្ពុជា អេហ៊្សីប ឲ្យកាន់តែរឹងមាំនិងរីកចំរើនទ្វេឡើងថែមទៀត។ ក្នុងជំនួប​ពិភាក្សា គ្នានេះដែរ ប្រមុខថ្នាក់ដឹក​នាំរដ្ឋាភិបាល​នៃ​ប្រទេស​ទាំងពីរ បានពិភាក្សា​យ៉ាង​យក​ចិត្ត​ទុកដាក់ ជុំវិញការ​បើកស្ថានឯកអគ្គរាជទូតរបស់ប្រទេសកម្ពុជា នៅក្នុងទីក្រុងកៃរ៉ូ​ប្រទេស​អេហ៊្សីប ដើម្បីឲ្យទំនាក់ទំនង​ការទូត​ នៃប្រ​ទេសទាំងពីរកាន់តែវិវត្តន៍រីកចំរើនទៅមុខ។
សម្តេចតេជោមានប្រសាសន៍បន្តថា ដោយសារមានដំណើរ​ទស្សនកិច្ចរបស់​ឯកឧត្តមឧប​នាយក​រដ្ឋមន្រ្តី ហោ ណាំហុង នឹងអញ្ជើញទៅបំពេញទស្សនកិច្ចទៅកាន់​ប្រ​ទេស​អេហ៊្សីប នៅ​ពេលខាងមុខនោះ ស្ថានឯកអគ្គរាជទូតកម្ពុជាគ្រោងនឹងបើកនៅពេលនេះផងដែរ។   ឯក​ឧត្តមអ៊ីប្រាហ៊ីម បានមានប្រសាសន៍ថា កន្លងមកប្រទេស​យើងទាំង​ពីរ​កម្ពុជា អេហ៊្សីប មាន​ទំនាក់ទំនងជា​មួយ​គ្នាល្អណាស់ ហើយចាប់ពីពេលនេះតទៅមុខ​គឺយើង​រួមគ្នា ធ្វើយ៉ាង​ណា​ឲ្យទំ​នាក់ទំនងនៃប្រទេសទាំងពីរ កាន់​តែមាន​ភាពល្អ​ប្រសើរ​ឡើងថែមទៀត ពិសេសធ្វើ​យ៉ាង​មានទំនាក់ទំនងល្អ ក្នុងបណ្តាប្រទេសអាស៊ាន​ទាំងមូលផងដែរ។
សម្តេចតេជោ​នាយករដ្ឋ​មន្រ្តីមាន​ប្រសា​សន៍ថា សម្តេចនឹងខិតខំធ្វើយ៉ាងណាឲ្យទំនាក់​ទំនងនៃប្រទេសទាំងពីរ មានភាពល្អប្រសើរឡើង។ សម្តេចតេជោ បន្តថា សម្តេច​ និងឯកឧត្តម​នាយករដ្ឋមន្រ្តី គឺជាអ្នកដឹក​នាំ​ជំនាន់ក្រោយ ប៉ុន្តែថ្នាក់ដឹកនាំជំនាន់មុន បានផ្សារភ្ជាប់​នូវ​ទំនាក់ទំនងកាលពីអតីត​កាល​ដ៏​ល្អ ដូចនេះ យើងត្រូវ​តែរួមគ្នា​និងបេ្តជ្ញារួមគ្នា ក្នុងការបង្កើន​ទំនាក់​ទំនង​កិច្ចសហប្រតិបត្តិការ នៃប្រទេសទាំងពីរ​ឲ្យកាន់តែសកម្មថែមទៀត ពិសេសការ​រួមគ្នា​បង្កើនកិច្ចសហប្រតិ​បត្តិ​ការលើ វិស័យសេដ្ឋកិច្ច ពាណិជ្ជកម្ម វិនិយោគ និងការកែប្រែ​នូវគោលជំហរមួយចំនួនទាក់ទិនទៅនិង​បញ្ហាអន្តរជាតិមួយចំនួន ពិសេសការផ្លាស់​ប្តូរនូវការ​គាំទ្រគ្នាទៅវិញទៅមក។
ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តីក៏បានវាយ​តម្លៃ​ខ្ពស់ ចំពោះ​សភាព​ការណ៍នៅប្រទេសអេហ៊្សីប ដែលបានវិល​មករកប្រក្រតីភាពឡើងវិញ។
សម្តេចតេជោ​មាន​ប្រសាសន៍បន្តថា សម្តេចតេជោតែងតែធ្វើការតាមដានចំពោះ​សភាពការ​នៅ​អេហ៊្សីប និងបណ្តាប្រទេសក្នុង​តំបន់ ដោយសារតែមាន​និស្សិតកម្ពុជា​បានទៅ​សិក្សានៅទី​នោះ និងដោយសារតែសភាពការណ៍​បានវិល​មករកប្រក្រីភាពហើយនោះ សម្តេចផ្ទាល់​មានការ​ត្រេក​អរខ្លាំងណាស់ ហើយនិស្សិត​កម្ពុជាមួយ​ចំនួន​ក៏បាន​វិល​ទៅសិក្សានៅប្រទេស​អេហ៊្សីប​ផងដែរ។ 
ជាការឆ្លើយតបទៅនិង​ប្រសា​សន៍របស់សម្តេចតេជោនាយក​រដ្ឋ​មន្រ្តី ឯក​ឧត្តម អ៊ីប្រាហ៊ីម មានប្រសាសន៍ថា ពេលនេះអេហ៊្សីប មានប្រក្រតីភាពឡើងវិញហើយ គឺមិន​ដូច​សភាពការ​ណ៍​ក្នុងបណ្តាប្រទេសជិតខាងខ្លួននោះទេ ។ តាមរយៈនេះ ប្រទេសទាំងពីរនឹងបន្តបង្កើន​កិច្ចសហ​ប្រតិបត្តិការ ជាមួយគ្នាឲ្យកាន់តែប្រសើរឡើងថែមទៀត៕       




No comments:

Post a Comment