ឯកឧត្តម រ៉ុង ឈុន ដែលបច្ចុប្បន្នជា សមាជិកនៃ គ.ជ.ប ថ្មី កាលពីថ្ងៃទី ២០
ខែមេសា ឆ្នាំ២០១៥ កន្លងទៅ បានធ្វើបទសម្ភាសន៍ជាមួយវិទ្យុអាស៊ីសេរី
ដោយបាននិយាយ ទាក់ទង នឹងបញ្ហាប្រាក់ឈ្នួលកម្មករ និងប្រាក់ខែមន្ត្រីរាជការ
ដោយ ឯកឧត្តម រ៉ុង ឈុន បានលើកឡើងថា
រាជរដ្ឋាភិបាលមិនគួររង់ចាំដល់ឆ្នាំ២០១៨ទេ
ដោយឯកឧត្តម អះអាងថា វាជាការអូសបន្លាយពេលដ៏យូរ ហើយឯកឧត្តមថា
គួរតំឡើងប្រាក់ខែជូនកម្មករ ១៧៧ ដុល្លារ នៅចុងឆ្នាំនេះ។
ការលើកឡើងរបស់ ឯកឧត្តម រ៉ុង ឈុន ដែលជាសមាជិកគ.ជ.ប
ដែលជ្រើសចេញពីគណបក្សសង្រ្គោះជាតិ ត្រូវបានមន្ត្រីជាន់ខ្ពស់រាជរដ្ឋាភិបាលចាត់ទុកថា
ជាការដាក់គំនាបមកលើរាជរដ្ឋាភិបាល និងជាការជ្រៀតជ្រែករឿងនយោបាយ
ដែលខុសពីតួនាទីដែលខ្លួនត្រូវប្រកាន់ជំហរជាបុគ្គលឯករាជ្យ
ក្នុងនាមជាសមាជិក គ.ជ.ប។
ទាក់ទងនឹងការលើកឡើងរបស់ ឯកឧត្តម រ៉ុង ឈុន ដូចខាងលើនេះដែរ
អ្នកនាំពាក្យ គ.ជ.ប និងជាសមាជិកទី៩
ដែលជាសមាជិកឯករាជ្យនៃ គ.ជ.ប ថ្មី ឯកឧត្តម
ហង្ស ពុទ្ធា បាន លើកឡើងថា សមាជិក គ.ជ.ប
ម្នាក់ៗ ត្រូវតែពិនិត្យទៅលើគោលការណ៍ បទបញ្ជា និងនីតិវិធីនៃការបោះឆ្នោតដែលទោះបីជាថ្មីពុំទាន់មាន
ប៉ុន្តែអាចប្រើប្រាស់នូវអ្វីដែលជាគោលការណ៍ចាស់បាន។
ឯកឧត្តម ហង្ស
ពុទ្ធា បានបន្តថា ឯកឧត្តមសុំមិនទាន់វាយតំលៃថា ការនិយាយរបស់ ឯកឧត្តម រ៉ុង ឈុន ជារឿងខុសរឺត្រូវនៅឡើយទេ ប៉ុន្តែយ៉ាងណាក៏ដោយ
ឯកឧត្តម រ៉ុង ឈុន ជាបុគ្គលម្នាក់ដែលបានធ្វើការស្បថរួចហើយ
ហើយប្រសិនបើ ឯកឧត្តម រ៉ុង ឈុន គាត់យល់ថាអ្វីដែលគួរធ្វើនឹងអ្វីដែលមិនគួរធ្វើនោះជាការសំរេចចិត្តរបស់គាត់។
អត្ថបទ៖ ច័ន្ទ ទេវី
No comments:
Post a Comment