សម្តេចតេជោ ហ៊ុន សែន ៖ ពាក្យសរសើររបស់ខ្មាំងពិតជាពិសពុល តែបើខ្មាំងបន្ទោស មានន័យមន្ត្រីគណបក្សប្រជាជនកម្ពុជាដឹកនាំបានត្រឹមត្រូវ

សម្តេចតេជោ ហ៊ុន សែន ថ្លែងថា រាជរដ្ឋាភិបាលដឹកនាំដោយគណបក្សប្រជាជនកម្ពុជា ខិតខំបំពេញកិច្ចការងារ ដើម្បីបម្រើផលប្រយោជន៍ជូនប្រជាជន តែបែរជាក្នុងគំនិត ក្នុងក្រសែរភ្នែករបស់ក្រុមប្រឆាំងមិនដែលយល់ពីគុណតម្លៃសន្តិភាព និងការអភិវឌ្ឍនោះទេ។

សម្តេចតេជោ ហ៊ុន សែន ថ្លែងបែបនេះ នៅព្រឹកថ្ងៃទី១៧ ខែតុលា ឆ្នាំ២០២២ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង ចំនួន ៦,៤១១ នាក់ ដែលពិធីនេះធ្វើឡើង នៅមជ្ឈមណ្ឌលពាណិជ្ជកម្ម និងពិព័រណ៍ជ្រោយចង្វារ រាជធានីភ្នំពេញ។

សម្តេចតេជោ ហ៊ុន សែន ថ្លែងបន្តថា បើទោះបីរាជរដ្ឋាភិបាល ដឹកនាំដោយគណបក្សប្រជាជនកម្ពុជាខិតខំយ៉ាងណា ក៏មិនមានគុណតម្លៃពីខ្មាំងនោះដែរ ដូច្នេះសូមមន្ត្រីគណបក្សប្រជាជនកម្ពុជាទាំងអស់ត្រូវចាំថា បើខ្មាំងសរសើរមានន័យថា យើងធ្វើខុស តែបើខ្មាំងបន្ទោស មានន័យថា មន្ត្រីរបស់រាជរដ្ឋាភិបាលធ្វើបានត្រឹមត្រូវហើយ ពីព្រោះភាពជោគជ័យរបស់យើង ខ្មាំងមិនដែលសរសើរនោះទេ តែ បើបរាជ័យខ្មាំងវាពង្រីកបញ្ហាឱ្យធំ នេះអ្វីដែលខ្មាំងមានក្នុងគំនិតជានិច្ច ហើយខ្មាំងធ្វើបានតែប៉ុណ្ណឹង បានតែបំផ្លាញជាតិ និងប្រជាជនតែប៉ុណ្ណោះ៕