សម្តេចតេជោ ហ៊ុន សែន៖ បើគ្មានថ្ងៃរំដោះ៧មករាទេ តើយើងនៅមានជីវិតដល់សព្វថ្ងៃទេ?

សម្តេចតេជោ ហ៊ុន សែន បានថ្លែងរំលឹកសារជាថ្មីម្តងទៀតថា បើគ្មានការរំដោះនៅថ្ងៃទី៧ ខែមករា ឆ្នាំ១៩៧៩នោះទេ ប្រជាជនខ្មែរយើងក៏ពុំមានជីវិតរបស់នៅដល់សព្វថ្ងៃនេះដែរ ដែលនេះគឺជាការពិតមិនអាចប្រកែកបានឡើយ។ សម្តេចបានថ្លែងដូចនេះនៅព្រឹកថ្ងៃទី១៥ ខែធ្នូ ឆ្នាំ២០២១ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការសណ្ឋាគារ ហាយ៉ាត់ រីជិនស៊ី ភ្នំពេញ «HYATT REGENCY PHNOM PENH» ស្ថិតនៅសង្កាត់ជ័យជំនះ ខ័ណ្ឌដូនពេញ រាជធានីភ្នំពេញ របស់ក្រុមហ៊ុន ជីប ម៉ុង ដែលបានទិញម៉ាកយីហោមកពីអាមេរិក។

សម្តេចតេជោ ហ៊ុន សែន បានគូសបញ្ជាក់ថា អ្នកដែលមិនទទួលស្គាល់ការពិតនៃថ្ងៃរំដោះជាតិ៧មករា មិនចាំបាច់ស្តាប់សម្តេចថ្លែងទេ ហើយអ្នកទាំងអស់នោះក៏មិនសមជាមនុស្សដែរ គឺសមជាសត្វតិរិច្ឆាន។

សម្តេចតេជោ ហ៊ុន សែន ក៏បានរំលឹកផងដែរពីសោកនាដកម្មដែលប្រជាជនខ្មែរឆ្លងកាត់ក្នុងរបបប្រល័យពូជសាសន៍ និងក្រោយថ្ងៃរំដោះ៧មករា ដែលកម្ពុជាពេលនោះពុំមានអ្វីទាល់តែសោះ ប៉ុន្តែបច្ចុប្បន្ននេះមានការអភិវឌ្ឍរីកចម្រើនលើគ្រប់វិស័យ មានទឹកស្អាតគ្របដណ្តប់ដល់ទីជនបទនានាភាគច្រើនផងដែរ៕