រដ្ឋាភិបាលខិតខំប្រឹងប្រែងរកថ្នាំវ៉ាក់សាំងមកចាក់បានទាន់ពេលវេលា គឺគោលដៅស្រោចស្រង់សេដ្ឋកិច្ចជាតិឱ្យដំណើរការឡើងវិញ

សម្តេចតេជោ ហ៊ុន សែន បានថ្លែងថា នៅក្នុងកំឡុងពេលទប់ស្កាត់ បិទខ្ទប់ប្រទេស ធ្វើឱ្យមានផលប៉ះពាល់ដល់សេដ្ឋកិច្ចជាតិ ជាពិសេសវិស័យទេសចរណ៍តែម្តង នេះជាវិបត្តិសកល ដែលពិភពលោកជួបប្រទះ និងដោះស្រាយ។

សម្តេចតេជោ ហ៊ុន សែន ថ្លែងបែបនេះ នៅព្រឹកថ្ងៃទី១៥ ខែធ្នូ ឆ្នាំ២០២១ ក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការសណ្ឋាគារ ហាយ៉ាត់ រីជិនស៊ី ភ្នំពេញ «HYATT REGENCY PHNOM PENH»។

សម្តេចតេជោ ហ៊ុន សែន បានថ្លែងបន្តថា ក្រោយពីប្រកាសដាក់ឱ្យបើកដំណើរការប្រទេសឡើងវិញ គឺប្រជាជន ចេញដើរកំសាន្តគ្រប់កន្លែង ទាំងពេលឈប់សម្រាកបុណ្យ និងថ្ងៃសៅរ៍ អាទិត្យផងដែរ នេះបញ្ជាក់ឱ្យឃើញថា វិស័យទេសចរណ៍ហាក់ងើបឡើងវិញហើយ មានកំណើនទាំងភ្ញៀវជាតិ និងអន្តរជាតិ។ ទន្ទឹមនេះ មានគូ ស្វាមី ភរិយាទើបនឹងរៀបការថ្មីៗ អាចទៅសម្រាកលំហែរកាយនៅសណ្ឋាគារលំដាប់ផ្កាយប្រាំ នេះសំដៅដល់អ្នកមានលុយតែប៉ុណ្ណោះ ហើយអ្នកផ្សេងទៀតអាចនឹងចំណាយទៅតាមលទ្ធភាពរបស់ខ្លួនផងដែរ៕