អ្នកតំណាងរាស្ត្រមណ្ឌលកំពង់ចាមបន្តណែនាំដល់អាណាព្យាបាលដែលមានកូនតូចៗ ប្រញាប់ទៅទទួលវ៉ាក់សាំងឲ្យបានគ្រប់ៗគ្នា និងរៀនរស់សម្របខ្លួនជាមួយជំងឺកូវីដ១៩

កំពង់ឆ្នាំង៖ លោក លន់ លឹមថៃ អ្នកតំណាងរាស្រ្តមណ្ឌលកំពង់ចាមបានបន្តណែនាំដល់បង ប្អូនប្រជាពលរដ្ឋដែលជាអណាព្យាបាលរបស់កូនៗតូចដែលមានអាយុពី៦ឆ្នាំដល់១២ឆ្នាំ ត្រូវនាំទៅទទួលចាក់វ៉ាក់សាំង ការពារជំងឺកូវីដ១៩ដោយឥតគិតថ្លៃឲ្យបានគ្រប់ៗគ្នា ពីព្រោះក្មេងៗ ជាទំពាំងស្នងឫស្សីរបស់ប្រទេសជាតិ ហើយត្រូវចេះសម្របខ្លួនរស់នៅជាមួយក្នុងរបត់ថ្មី មួយទៀត។ ការបញ្ជាក់បែបនេះគឺធ្វើឡើងនៅក្នុងឱកាសដែលលោក លន់ លឹមថៃ និងលោកស្រី រួមទាំងអ្នកពាក់ព័ន្ធជាច្រើននាក់ទៀតបានអញ្ជើញនាំយកចង្ហាន់ និងគ្រឿង ឧបភោគបរិភោគជាច្រើនមុខដើម្បីប្រគេនព្រះសង្ឃដែលកំពុងជួបការលំបាកដោយសារជំងឺកូវីដ១៩ នៅវត្តព្រះនគរដែលជាវត្តដាច់ស្រាយលមួយស្ថិតនៅឃុំទ្រាន  ស្រុកកំពង់សៀម ខេត្តកំពង់ចាមនាថ្ងៃទី២០ខែកញ្ញា ឆ្នាំ២០២១នេះ។

ឆ្លៀតនៅក្នុងឱកាសនេះដែរលោកតំណាងរាស្ត្រមណ្ឌលកំពង់ចាមមានប្រសាសន៍ បញ្ជាក់ថាបណ្តាប្រទេសនៅលើពិភពលោកបានឆ្លងជំងឺកូវីដ១៩ រួមទាំងប្រទេសកម្ពុជាយើង ប៉ុន្តែរាជរដ្ឋាភិបាលកម្ពុជាដែលមានលោកនាយករដ្ឋមន្រ្តី ហ៊ុន សែន ជានាយករដ្ឋមន្ត្រីបានចាត់ វិធានការបន្ទាន់ៗជាច្រើនដើម្បីកុំឲ្យមានការឆ្លងរាលដាលធ្ងន់ធ្ងរ ជាពិសេសការស្វែងរក វ៉ាក់សាំងការពារជំងឺកូវីដ១៩ដើម្បីចាក់ជូនប្រជាពលរដ្ឋដោយឥតគិតថ្លៃ គឺដើម្បីតែជីវភាព សុខភាព និងអាយុជីវិតរបស់បងប្អូនប្រជាពលរដ្ឋតែប៉ុណ្ណោះ។ ហើយទោះបីបងប្អូនប្រជា ពលរដ្ឋបានទទួលការចាក់វ៉ាក់សាំងហើយក្តី ក៏ត្រូវនាំគ្នាបន្តអនុវត្តវិធានការ ៣ការពារ ៣កុំ ឲ្យបានខ្ជាប់ខ្ជួនរបស់រាជរដ្ឋភិបាលនិងវិធានការនានារបស់ក្រសួងសុខាភិបាល។ 

នៅក្នុងឱកាសនេះដែរលោកក៏បានពាំនាំផ្តាំផ្ញើសាកសួរសុខទុក្ខនិងជូនពរពីសំណាក់លោកនាយករដ្ឋមន្រ្តី ហ៊ុន សែន និងលោកស្រីបណ្ឌិតប៊ុនរ៉ានីហ៊ុនសែន និង លោក ហេង សំរិន ប្រធានរដ្ឋសភាជូនដល់់លោកយាយលោកតា និងបងប្អូនប្រជាពលរដ្ឋផងដែរ។ ហើយក្រៅពីការប្រគេចង្ហាន់ជាច្រើនមុខដល់វត្តព្រះនគរខាងលើនេះឯកឧត្តម និងលោក  ជំទាវ រួមទាំងអ្នកពាក់ព័ន្ធផ្សេងទៀតក៏បានផ្តល់ថវិកាឧបត្ថមដល់កងកំលាំង លោកយាយ លោកតាក្នុងម្នាក់ៗ២មុឺនរៀលនិងប្រគេនបច្ច័យកសាងវត្ត១លាន១សែន៥ម៉ឺនរៀល សរុប ជាថវិការចំណាយអស់៣លាន៦សែនរៀល៕