លោកនាយករដ្ឋមន្រ្តី ហ៊ុន សែន ប្រកាសការពារអធិបតេយ្យភាពកម្ពុជាដោយមិនខ្លាចទណ្ឌកម្មពីបរទេស

ថ្លែងនៅក្នុងកិច្ចប្រជុំគណៈរដ្ឋមន្រ្តី នៅវិមានសន្តិភាព រាជធានីភ្នំពេញ នាព្រឹកថ្ងៃទី២៧ ខែតុលា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថាអធិបតេយ្យភាពកម្ពុជាគឺជាអាទិភាពដែលត្រូវតែការពារឱ្យបានទោះតម្លៃណាក៏ដោយបើទោះបីជាមានការគម្រាមដាក់ទណ្ឌកម្មពីបរទេសក៏ដោយនោះ។

លោកនាយករដ្ឋមន្រ្តី ហ៊ុន សែន បានបញ្ជាក់ផងដែរថាគ្មានអ្វីអាចបង្វែរទិសដៅនៃការបេ្តជ្ញាការពារកម្ពុជាមិនឱ្យវិលត្រឡប់ទៅកាន់អតីតកាលនៃសោកដនាកម្មកម្ពុជាដែលបំផ្លាញដោយបរទេសនោះទេ។ លោកក៏បានបង្ហាញជំហររឹងមាំក្នុងកិច្ចការការពារ និងថែរក្សា សន្តិភាព សន្តិសុខជាតិ និងវិបុលភាពសម្រាប់ប្រជាជាតិខ្មែរទាំងអស់ទោះជាតម្លៃណាក៏ដោយគឺមិនអនុញ្ញាតឱ្យកម្ពុជាវិលត្រឡប់ទៅកាន់សភាពការអាក្រក់ដូចឆ្នាំ១៩៧០ ដែលបំផ្លាញអនាគតកម្ពុជាជាច្រើនទសវត្សរ៍នោះឡើយ។

លោក ផៃ ស៊ីផាន អ្នកនាំពាក្យរាជរដ្ឋាភិបាលបានដកស្រង់ប្រសាសន៍លោកនាយករដ្ឋមន្រ្តី មកបញ្ជាក់ថា «សម្តេចតេជោគ្មានទ្រព្យសម្បត្តិណាទុកនៅក្រៅប្រទេសទេគឺមានតែថវិកាកសាងសាលារៀនកសាងជាតិតែប៉ុណ្ណោះ។ ការចូលទៅកាន់ទឹកដីសហរដ្ឋអាមេរិកមិនប៉ះពាល់ដល់អារម្មណ៍របស់សម្តេចនោះទេ សម្តេចគ្មានពេលធ្វើដំណើរទៅសហរដ្ឋអាមេរិកទាល់តែសោះក៏ប៉ុន្តែមន្ត្រីណាមួយប៉ះពាល់ជារឿងដាច់ដោយឡែកតែប៉ុណ្ណោះ»៕