លោកឧបនាយករដ្ឋមន្រ្តី ប៊ិន ឈិន បានសម្តែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្មដែលបានរៀបចំ «ពិព័រណ៍ពាណិជ្ជកម្មផលិតផលខ្មែរ ក្នុងឱកាសយុទ្ធនាការទិញផលិតផលខ្មែរ» នេះបានល្អប្រសើរដែលជាឱកាសដ៍ល្អនិងសមស្របមួយសម្រាប់ជំរុញពលរដ្ឋយើងឱ្យនិយមប្រើផលិតផលខ្មែរ។
លោក ប៊ិន ឈិន ក៏បានរម្លឹកផងដែរថា ការចូលជាធរមាននៃសហគមន៍សេដ្ឋកិច្ចអាស៊ានតាំងពីខែមករា ឆ្នាំ ២០១៥ ជាឱកាសដែលមានវិសាលភាពពង្រីកទីផ្សារនាំចេញសម្រាប់ផលិតផលយើងផង តាមរយៈការតភ្ជាប់ពាណិជ្ជកម្មរវាងកម្ពុជានិងអាស៊ាន។ ក៏ប៉ុន្តែជាមួយគ្នានេះដែរ រោងចក្រ សហគ្រាស សិប្បកម្ម និងផលិតកម្មទាំងឡាយនៅកម្ពុជា នឹងជួបប្រទះនូវការប្រកួតប្រជែងថ្មីមួយដែលមានលក្ខណៈកាន់តែខ្លាំងនិងកាន់តែលំបាកជាងមុនពីសំណាក់ប្រទេសនានាក្នុងអាស៊ាន។
លោកឧបនាយករដ្ឋមន្រ្តី ប៊ិន ឈិន ក៏បានសង្កត់ធ្ងន់ថា ដោយសារការដឹកនាំត្រឹមត្រូវប្រកបដោយគតិបណ្ឌិតរបស់លោកនាយករដ្ឋមន្រ្តី ហ៊ុន សែន ទើបធ្វើឱ្យមានការកើនឡើងនូវទំហំពាណិជ្ជកម្មប្រកបដោយចីរភាព មានគោលនយោបាយច្បាស់លាស់ យកចិត្តទុកដាក់ ជំរុញគាំពារវិនិយោគ និងធុរកិច្ចក្នុងប្រទេស ក្នុងក្របខ័ណ្ឌសេដ្ឋកិច្ចទីផ្សារព្រមទាំងចាត់ទុកវិស័យឯកជនជាដៃគូយ៉ាងសំខាន់របស់រាជរដ្ឋាភិបាលក្នុងការអភិវឌ្ឍសេដ្ឋកិច្ចជាតិដែលបាននាំមកនូវការអភិវឌ្ឍលើគ្រប់វិស័យដែលទាំងអស់គ្នាមើលឃើញសព្វថ្ងៃនេះ៕
No comments:
Post a Comment