មហិច្ឆតារបស់យើង គឺនឹងធ្វើឱ្យ​កម្ពុជាក្លាយជាប្រទេស​ដែលមានប្រាក់​ចំណូលមធ្យម​កម្រិតខ្ពស់នៅឆ្នាំ ២០៣០

នៅថ្ងៃទី០៦ ខែកញ្ញា ឆ្នាំ២០១៧ លោកនាយករដ្ឋមន្រ្តី ហ៊ុន សែន បានថ្លែងថា ស្របពេលដែលកម្ពុជាកំពុងតែដើរលើផ្លូវត្រូវ មហិច្ឆតារបស់យើង គឺនឹងធ្វើឱ្យកម្ពុជាក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០។ លោក បានថ្លែងដូចនេះក្នុងឱកាសអញ្ជើញជួបសំណេះសំណាល និងសួរសុខទុក្ខបងប្អូនកូនក្មួយកម្មករ និយោជិតសរុបជាង១ម៉ឺននាក់នៅសួនឧស្សាហកម្មកាណាឌីយ៉ា ស្ថិតនៅតាមបណ្តោយផ្លូវវេងស្រេង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
លោកនាយករដ្ឋមន្រ្តី ហ៊ុន សែន បានបញ្ជាក់ថា នៅឆ្នាំ ១៩៩៧ កម្ពុជាមានរោងចក្រត្រឹមតែ ៦៤ តែប៉ុណ្ណោះ ហើយទំហំទឹកប្រាក់នាំចេញមានត្រឹមតែ ២២៧ លានដុល្លារ។ នៅពេលនេះទំហំទឹកប្រាក់នាំចេញបាន កើនឡើងប្រមាណ ៧,៦៦៣ លានដុល្លារ ដែលបានបង្ហាញពីការរីកចម្រើននៃរោងចក្រ សហគ្រាស និងកំណើនសេដ្ឋកិច្ចកម្ពុជា។

ទន្ទឹមនឹងនោះ លោក ហ៊ុន សែន ក៏បានបញ្ជាក់ថា ចំពោះការតម្លើងប្រាក់ខែកម្មករ នៅឆ្នាំ២០១៨ ខាងមុខ នេះប្រាក់ខែកម្មករតិចបំផុតគឺ ១៦០ដុល្លារ បូកនឹងប្រាក់អត្ថប្រយោជន៍ផ្សេងៗទៀត គឺនឹងទទួលបាន ច្រើនជាង២០០ដុល្លារ។ ក្រោមការដឹកនាំដ៏ត្រឹមត្រូវរបស់រាជរដ្ឋាភិបាល គឺកម្ពុជាបានកាត់បន្ថយភាពក្រីក្រពីអត្រា ១០០% ចុះមក ១៣% នៅឆ្នាំ ២០១៤។ មហិច្ឆិតារបស់យើងគឺនឹងធ្វើឱ្យកម្ពុជាក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០៕