លិខិតចៅចាក់ស្មុក៖ ពលរដ្ឋខ្មែរភាគច្រើនបាននិយាយថាស្រឡាញ់សន្តិភាពនិងការអភិវឌ្ឍ

ថ្ងៃទី៤ខែមិថុនានេះគឺជាថ្ងៃប្រវត្តិសាស្ត្រថ្មីមួយទៀត ដែលប្រជាជនកម្ពុជាភាគច្រើនបាននិ​យាយថាពួកខ្លួនស្រឡាញ់សន្តិភាព និងការអភិវឌ្ឍ ហើយបានបោះឆ្នោតជូនគណបក្សប្រ​​​​ជា​ជនកម្ពុជាដើម្បីបន្តការគ្រប់គ្រងនិងដឹកនាំរដ្ឋបាលឃុំសង្កាត់នៅស្ទើរទូទាំងប្រទេសកម្ពុជា។

លទ្ធផលបឋមបានបញ្ជា្កក់ថាគណបក្សប្រជាជនកម្ពុជា ដែលជាគណបក្សដែលធំជាងគេមានភាពចាស់ទុំផ្នែកនយោបាយ និងសម្បូរដោយធនធានមនុស្សនោះនៅតែជាសេចក្តីទុកចិត្តរបស់បងប្អូនប្រជាពលរដ្ឋខ្មែរភាគច្រើនដោយបានឈ្នះការគ្រប់គ្រងឃុំចំនួន ១១៦៣ ឃុំសង្កាត់ ក្នុងចំណោមឃុំសង្កាត ១៦៤៦ ឃុំសង្កាត់។

លទ្ធផលបោះឆ្នោតនៅថ្ងៃនេះក៏បានបង្ហាញច្បាស់ថាអ្នកបានតែថា អ្នកចាំតែឈរមើល និងអ្នកចាំតែសន្យាខ្យល់មិនធ្វើមិនត្រូវបានទទួលសេចក្តីទុកចិត្តរបស់ប្រជាពលរដ្ឋឡើយទោះបី ជាពួកគេខិតខំប្រឹងប្រែងក្នុងការអួតអាង បំភ្លៃ បំផ្លើស បំប៉ោង និងបំភ័ន្តយ៉ាងណាក៏ដោយ។ ប្រជារាស្ត្រខ្មែរពិតជាបានថ្លឹងថ្លែងយ៉ាងច្បាស់រវាងគណបក្សប្រជាជនកម្ពុជាដែលជាអ្នកនាំមកនូវសន្តិភាព និងការអភិវឌ្ឍ និងបក្សដែលបានត្រឹមតែសន្យាខ្យល់ក្តែងៗ និងដើរញុះញង់ រើសអើងប្រកាន់ជាតិសាសន៍ បង្កចលាចលក្នុងសង្គម។

ការបោះឆ្នោតក្រុមប្រឹក្សាឃុំសង្កាត៤អាណត្តិមកនេះ គណបក្សប្រជាជនកម្ពុជា ដែលបានជួយសង្គ្រោះជាតិ និងជីវិតប្រជាពលរដ្ឋពិតប្រាកដពីរបបខ្មែរក្រហម ប៉ុល ពត ព្រមទាំងជាអ្នកដើរតួនាទីក្នុងការបញ្ចប់សង្គ្រាមស៊ីវិល និងនាំយកសន្តិភាព និងការអភិវឌ្ឍជូនជាតិមាតុភូមិបានទទួលជ័យជម្នះលើសលុបលើការបោះឆ្នោតគ្រប់ពេលទាំងអស់។ លទ្ធផលជាវិជ្ជមាននេះបានបង្ហាញថាប្រជាពលរដ្ឋបានចេញចិត្តចំពោះការដឹកនាំលើផ្លូវត្រូវរបស់រាជរដ្ឋាភិបាលកម្ពុជា​ដឹកនាំដោយគណបក្សប្រជាជនកម្ពុជា និងបានផ្តល់នូវសេចក្តីទុកចិត្តដល់បេក្ខជនបេក្ខនារីនៃគណបក្សប្រជាជនដែលបានបម្រើជាតិ និងប្រជាជនពិតប្រាកដជាង ៣៨ ឆ្នាំមកហើយ។

មេឃុំ/ចៅសង្កាត់ និងសមាជិកក្រុមប្រឹក្សារបស់គណបក្សប្រជាជនកម្ពុជាដែលជាប់ឆ្នោត នឹងខិតខំបម្រើប្រជាពលរដ្ឋបន្តទៀតដោយមិនប្រកាន់និន្នាការនយោបាយឡើយដើម្បីការភិវឌ្ឍឃុំសង្កាត់ស្របតាមកម្មវិធីនយោបាយរបស់គណបក្សប្រជាជនកម្ពុជាដែលជម្រាបជូនពលរដ្ឋ នៅអំឡុងពេលនៃការឃោសនាបោះឆ្នោតកន្លងទៅនេះ។ កម្មវិធីនយោបាយរបស់គណបក្សប្រជាជនគឺជាកម្មវិធីនយោបាយពិតជាក់ស្តែង និងបានឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងរៀបចំឡើងដោយឆ្លុះបញ្ចាំងទៅនឹងគោលនយោបាយអភិវឌ្ឍជាតិ។

ដូច្នេះមិនមែនជាការចៅដន្យទេដែលប្រជាពលរដ្ឋបានបោះ ឆ្នោតជូនគណបក្សប្រជាជនកម្ពុជា ខណៈបក្សខ្លះ បានត្រឹមតែសន្យាតាមការស្រមើស្រម៉ៃ និងធ្វើនយោបាយបោកប្រាស់រាស្ត្រតែប៉ុណ្ណោះ។ សូមអរគុណបងប្អូនប្រជាពលរដ្ឋខ្មែរនៅទូទាំងប្រទឹសដែលបានផ្តល់សេចក្តីទុកចិត្តដល់គណបក្សប្រជាជនកម្ពុជាបន្តទៀត!

ដោយ៖ ចៅចាក់ស្មុក