រដ្ឋមន្រ្តីការបរទេសហុងគ្រី នឹងធ្វើទស្សនកិច្ចនៅកម្ពុជា រយៈពេល២ថ្ងៃ នៅថ្ងៃទី១៣-១៤ ខែមករា ឆ្នាំ២០១៦នេះ

យោងតា​មសេចក្តីជូ​នព័ត៌មានរ​បស់ក្រសួងការបរទេស និងសហប្រតិបត្តិការអន្តជាតិ នៅថ្ងៃទី០៨ ខែមករា ឆ្នាំ២០១៦ បានឲ្យដឹងថា​ ឯកឧត្តម ពិទ័រ ហ្ស៊ីហ្សារតូ (Peter Szijjarto) រដ្ឋមន្រ្តីក្រសួងការបរទេសនិងពាណិជ្ជកម្មនៃប្រទេសហុងគ្រី នឹងបំពេញទស្សនកិច្ចនៅប្រទេសកម្ពុជារយៈពេលថ្ងៃ នៅថ្ងៃទី១៣-១៤ ខែមករា ឆ្នាំ២០១៦នេះ ដើម្បីពង្រឹង និងពង្រីកបន្ថែមទៀតនូវទំនាក់ទំនងល្អរវាងប្រទេសទាំងពីរ។

ក្រសួងការបរទេសបានបន្ថែមថា អំឡុងទស្សនកិច្ចនេះ ឯកឧត្តម ពិទ័រ ហ្ស៊ីហ្សារតូ (Peter Szijjarto)នឹងសម្តែងការគួរសមជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។ ឯកឧត្តម ពិទ័រ ហ្ស៊ីហ្សារតូ (Peter Szijjarto) ក៏ជួបពិភាក្សាការងារជាមួយ ឯកឧត្តមឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងពាណិជ្ជកម្មកម្ពុជាផងដែរ។ ក្រៅពីនោះ ឯកឧត្តម ពិទ័រ ហ្ស៊ីហ្សារតូ (Peter Szijjarto) នឹងអញ្ជើញទៅទស្សនាអគារពាណិជ្ជកម្ម មេគង្គកម្ពុជា-ហុងគ្រី៕