ដើម្បីឆ្លើយតបទៅនឹងការលើកឡើងអំពី កង្វល់ចំពោះការសម្រេចចិត្តរបស់រាជរដ្ឋាភិបាលកម្ពុជា
ក្នុងការតម្រូវឲ្យមានច្បាប់ស្តីពីសមាគម និងអង្គការមិនមែនរដ្ឋាភិបាល ក្រសួងមហាផ្ទៃនៅថ្ងៃទី
២៥ ខែឧសភា ឆ្នាំ២០១៥នេះ បានចេញនូវសេចក្តីប្រកាសព័ត៌មានមួយរបស់ខ្លួន ស្តីពីការរៀបចំតាក់តែងសេចក្តីព្រាងច្បាប់ស្តីពីសមាគម
និងអង្គការមិនមែនរដ្ឋាភិបាល ដែលនៅក្នុងសេចក្តីប្រកាសព័ត៌មាននោះ ក្រសួងមហាផ្ទៃបានបញ្ជាក់ថា
រាជរដ្ឋាភិបាលបានទទួលស្គាល់ពីសារៈសំខាន់នៃការចូលរួមចំណែក មិនអាចខ្វះបានរបស់សមាគម
និងអង្គការមិនមែនរដ្ឋាភិបាល ក្នុងការអភិវឌ្ឍន៍សង្គមកម្ពុជាលើគ្រប់វិស័យ។
ដូច្នេះដើម្បីលើកស្ទួយការប្រើប្រាស់សិទ្ធិសេរីភាពក្នុងការបង្កើតសមាគម
និងអង្គការមិនមែនរដ្ឋាភិបាល ក្នុងក្របខ័ណ្ឌនីតិរដ្ឋ ព្រមទាំងដើម្បីលើកកម្ពស់
កិច្ចសហប្រតិបត្តិការ ក្នុងភាពជាដៃគូរជាមួយនឹងអង្គការសង្គមលើគ្រប់វិស័យ តាមគោលការណ៍ប្រជាធិបតេយ្យ
តម្រូវឲ្យព្រះរាជាណាចក្រកម្ពុជា ត្រូវមានច្បាប់ស្តីពីសមាគម និងអង្គការមិនមែនរដ្ឋាភិបាលដូចបណ្តាប្រទេសនានាលើសកលលោក។
នៅក្នុងសេចក្តីប្រកាសព័ត៌មានរបស់ក្រសួងមហាផ្ទៃដដែល ក៏បានបន្ថែមទៀតថា
នៅក្នុងដំណើរការរៀបចំសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល
ក្រុមអ្នកច្បាប់របស់រាជរដ្ឋាភិបាលបានធ្វើការសិក្សាស្រាវជ្រាវនូវបទពិសោធន៍ និងការអនុវត្តជាអន្តរជាតិអំពីក្របខ័ណ្ឌច្បាប់ដែលពាក់ព័ន្ធ
និងការបង្កើត ចុះបញ្ជីសមាគម និងអង្គការមិនមែនរដ្ឋាភិបាល។ ការសិក្សាបង្ហាញថា
ការបង្កើតសមាគម ឬអង្គការមិនមែនរដ្ឋាភិបាលគឺជាសិទ្ធិពលរដ្ឋប៉ុន្តែក៏មានភ្ជាប់នឹងកាតព្វកិច្ចមួយចំនួន
ក្នុងការអនុវត្តសិទ្ធិនេះផងដែរ។ ទន្ទឹមនេះការរៀបចំសេចក្តីព្រាងច្បាប់នេះ ក៏ត្រូវបានរៀបចំដោយផ្អែក
និងគិតគូរគ្រប់ជ្រុងជ្រោយលើមូលដ្ឋានៃធាតុចូល ដែលទទួលបានពីសិក្ខាសាលាពិគ្រោះយោបល់ថ្នាក់ជាតិចំនួន
២លើក ដោយមានការចូលរួមពីអ្នកពាក់ព័ន្ធ និងពីមតិយោបល់នានា ដែលទទួលបានពីជំនួបពិភាក្សាដោយឡែកៗពីគ្នា
ជាច្រើនលើកច្រើនសារ រវាងថ្នាក់ដឹកនាំក្រសួងមហាផ្ទៃជាមួយតំណាងស្ថានទូត និងតំណាងអង្គការសង្គមស៊ីវិលជាតិ-អន្តរជាតិ។
ក្រសួងមហាផ្ទៃបានអះអាងថា សេចក្តីព្រាងច្បាប់សមាគម និងអង្គការមិនមែនរដ្ឋាភិបាល
ត្រូវរៀបចំឡើងលើមូលដ្ឋានគ្រឹះនៃរដ្ឋធម្មនុញ្ញ នៃព្រះរាជាណាចក្រកម្ពុជាឆ្នាំ
១៩៩៣ និងលើមូលដ្ឋាននៃកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ។
ដូច្នេះការព្រួយបារម្ភពីសំណាក់មជ្ឈដ្ឋានមួយចំនួនទាក់ទង នឹងការរឹតត្បិតសិទ្ធិសេរីភាពរបស់ប្រជាពលរដ្ឋ
គឺមិនឆ្លុះបញ្ចាំងពីខ្លឹមសារពិតប្រាកដនៃសេចក្តីព្រាងច្បាប់នេះនោះទេ៕
អត្ថបទ៖ ច័ន្ទ ទេវី
No comments:
Post a Comment