រាជ​រដ្ឋា​ភិបាល​កំពុង​ពិចារ​ណា​បញ្ចេញ​ទុន​ទិញ​ប្រេង​ស្តុក​ទុក​ដើម្បី​​ត្រៀម​​បង្ការ​ប្រេង​ឡើងថ្លៃ

ថ្លែងនៅក្នុងពិធីចែកសញ្ញាបត្រជូនដល់និស្សិតជ័យលាភីជាង៤៥០០នាក់ នៃសាកលវិទ្យាល័យ វិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចនៅព្រឹកថ្ងៃទី ១០ កុម្ភៈ នៅមជ្ឈមណ្ឌល សន្តិបាត និងពិព័រណ៍​កោះ​ពេជ្រ សម្តេចតេជោ ហ៊ុន សែន នាយករដ្ឋមន្ត្រី នៃ ព្រះរាជា ណា ចក្រកម្ពុជាបានបញ្ជាក់ថា រាជរដ្ឋាភិបាល  កំពុងពិចារណាក្នុងការបញ្ចេញទុន ទិញប្រេង មកស្តុកទុក ដើម្បីត្រៀមបង្ការនាពេល ខាងមុខតំលៃប្រេងឡើងថ្លៃឡើងវិញ។

រាជរដ្ឋាភិបាលចង់ឲ្យប្រេង បន្តចុះថោក​ថែម​ទៀត ដើម្បីអាចធ្វើឲ្យជីវភាពរបស់ ប្រជាជន កាន់តែប្រសើរឡើង ប៉ុន្តែកម្ពុជា មិនមែនជាប្រទេសផលិតប្រេង ដូច្នោះតំលៃប្រេងឡើង រឺចុះគឺត្រូវទៅតាមតំលៃប្រេង នៅលើទីផ្សារអន្តរជាតិ ។

ការថ្លែងរបស់សម្តេចតេជោ នាយករដ្ឋមន្ត្រីនៅពេលនេះ ស្របពេលដែលតំលៃប្រេង នៅ គ្រប់ ស្ថានីយ៍ប្រេងឥន្ធនៈនៅកម្ពុជា បានធ្លាក់ថ្លៃចុះជាលំដាប់ ទន្ទឹមនឹងតំលៃប្រេងសាកល នៅ ចុះ មកក្រោម៥០ដុល្លារក្នុងមួយបារ៉ែល។

កន្លងទៅនេះ សម្តេចតេជោ ហ៊ុន សែន បានផ្តល់អនុសាសន៍​ដល់រដ្ឋ​​មន្ត្រី​​ក្រសួង​​សេដ្ឋកិច្ច និង ហិរញ្ញវត្ថុ ដើម្បីធ្វើការពិនិត្យលទ្ធភាពក្នុងការបញ្ចេញ​ទុនដើម្បី​​ទិញប្រេងមកស្តុកទុកនៅ ក្នុង ដំណាក់កាលប្រេងកំពុងចុះថ្លៃ។
ទោះបីប្រេងសាំងបានបន្តចុះថ្លៃ នៅកំរិតទាបយ៉ាងណាក្តី ប៉ុន្តែ​សេវា​ដឹក​ជញ្ជូន​នៅ ទូទាំង ព្រះរាជាណាចក្រកម្ពុជានៅតែឡើងថ្លៃដដែលដោយមិនចុះទៅតាម ការចុះថ្លៃប្រេងនោះទេ។  សម្តេចតេជោ នាយក​រដ្ឋមន្ត្រីបានអំពាវនាវដល់ម្ចាស់​មធ្យោ​បាយធ្វើដំណើរ ក្រុមហ៊ុន ដឹក ជញ្ជូនទាំងអស់ រាប់ទាំងរថយន្តក្រុងរថយន្ត​ឈ្នួល តាកស៊ី​​ជាដើម ល្មមចុះថ្លៃជាងនេះ ព្រោះ ប្រេងបានចុះថ្លៃទៅហើយ។ « នៅ​កម្ពុជា  ពេលទំនិញ រឺការដឹកជញ្ជូនឡើងថ្លៃ គេថាមក ពីប្រេងសាំងឡើងថ្លៃ តែដល់ ពេលប្រេងសាំងឡើងថ្លៃ បែរជាទំនិញ រឺការដឹកជញ្ជូន មិនចុះថ្លៃ ទៅវិញ» នេះជាការ បញ្ជាក់របស់សម្តេចតេជោ នាយករដ្ឋមន្ត្រី។

ថ្លែងនៅក្នុងឱកាសនោះ សម្តេចតេជោនាយករដ្ឋមន្ត្រីក៍បានណែនាំឲ្យក្រសួងឧស្សាហកម្ម និង សិប្បកម្ម ធ្វើការសហការជាមួយនឹងសាលារាជធានីភ្នំពេញ បន្ត​ការងារ ជាមួយរដ្ឋាករ ទឹកស្វ័យតភ្នំពេញ ដើម្បី​ត្រៀមធ្វើការតបណ្តាញទឹកដល់កម្មករ កម្មាការនី នៅតាមបន្ទប់ជួល នៅទូទាំងរាជធានីភ្នំពេញ ប្រមាណជិត៩ម៉ឺនបន្ទប់។​ ក្រសួងនឹងលក់តំលៃទឹកជា​តំលៃថេរ​ទៅ​ឲ្យម្ចាស់ផ្ទះ ក្នុងមួយម៉ែត្រគីប តំលៃ ១០៣០ រៀល ហើយម្ចាស់លក់ឲ្យកម្មករ​ទៅតាម​បន្ទប់​ជួល​ក្នុងចន្លោះពី ១១០០ ទៅ ១២០០ ដែលម្ចាស់ផ្ទះអាចចំណេញពី ៧០រៀល ទៅ ១៧០​រៀល​​ក្នុយមួយម៉ែត្រគីប ។

ដូច្នេះ បន្ទុករបស់កម្មករ កម្មការិនី លើបញ្ហាទឹក ភ្លើងនាពេលមុនត្រូវ​បានកាត់​​បន្ថយ​ច្រើន ជាមួយ​នឹងប្រាក់ខែរបស់កម្មករ កម្មារនី១២៨ដុល្លារ និងប្រាក់ដទៃទៀត នឹងអាចធ្វើឲ្យ​ជីវភាព​គាត់កាន់តែប្រសើរឡើង។

សម្តេចតេជោ ក៍បានអំពាវនាវដល់ ម្ចាស់ផ្ទះជួលទាំងអស់​មេត្តា​កុំតំឡើងថ្លៃផ្ទះ ក្នុងឱកាស​ប្រាក់បៀវត្តកម្មករកើនឡើង ជាបន្តបន្ទាប់នោះ៕