ឯកឧត្តម​​បណ្ឌិត​​សភាចារ្យ សុខ អាន៖ កម្ពុជា​​នឹង​​ធ្វើ​​ជា​ម្ចាស់​​ផ្ទះ​​នៃ​កិច្ច​ប្រជុំ​​សំខាន់​​ពីរ​របស់​​គណ​បក្ស​​នយោបាយ​​អាស៊ី

នៅក្នុង ​ឱកាស​ធ្វើ​មាតុភូមិ​និវត្ត​កាល​ពី​ថ្ងៃទី១០ ខែកុម្ភៈ ឆ្នាំ២០១៥ ពីការ​ចូល​រួមកិច្ច​ប្រជុំ​គណៈកម្មាធិការអចិន្ត្រៃយ៍ នៃ​គណ​បក្ស​នយោបាយ​អាស៊ី (ICAPP) នៅ​ទីក្រុង​ម៉ា​និល ប្រទេស​ហ្វ៊ីលីពីនឯកឧត្តម​បណ្ឌិត​សភាចារ្យ សុខ អាន ឧបនាយករដ្ឋមន្ត្រី​ រដ្ឋមន្ត្រី​ទទួល​​បន្ទុក​ទីស្តីការ​គណៈរដ្ឋមន្ត្រី បាន​មាន​ប្រសាសន៍​ឲ្យ​ដឹង​ថា នៅ​ក្នុង​អំឡុង​ខែ​ឧសភា និង​ខែធ្នូ ឆ្នាំ២០១៥​ខាង​មុខ​នេះ កម្ពុជា​នឹង​ធ្វើ​ជា​ម្ចាស់​ផ្ទះ​នៃកិច្ច​ប្រជុំ​ដ៏​សំខាន់​​ពីរ​របស់​ គណបក្ស​នយោបាយ​អាស៊ី (International Conference of Asian Political Parties)។

ឯកឧត្តម ​បណ្ឌិត​សភា​ចារ្យ សុខ អាន សមាជិកអចិន្ត្រៃយ៍​នៃ​គណៈកម្មាធិការ​កណ្តាល​នៃ​គណបក្ស​ប្រជាជន​កម្ពុជា បាន​ដឹកនាំ​ប្រតិភូ​គណបក្ស​ប្រជាជន​កម្ពុជា ចូល​រួមកិច្ច​​ប្រជុំចំនួន​ពីររបស់​គណៈកម្មាធិការ​ប្រតិបត្តិ នៃ​អង្គការគណបក្ស​នយោបាយ​អាស៊ី (ICAPP) នៅ​ទីក្រុង​​ម៉ានិល ប្រទេស​ហ្វ៊ីលីពីន ចាប់​ពី​ថ្ងៃទី​៧-១០ ខែកុម្ភៈ ឆ្នាំ២០១៥ ក្នុង​នាម​​ជា​អនុ​ប្រធាន​។

កិច្ច ​ប្រជុំ​នោះ​រួម​មាន ទី១, កិច្ច​ប្រជុំការិយាល័យ ICAPP ដែល​មានមនុស្ស​ ៤នាក់ គឺ ប្រធាន អនុប្រធាន អគ្គលេខាធិការ និង​អ្នកនាំពាក្យ​ពិសេស។ ទី​២, កិច្ចប្រជុំ​ក្រុម​ប្រឹក្សា​ធុរកិច្ច (ICBC) ដែល​ជាការ​រួម​បញ្ចូល​គ្នា​រវាង ICAPP និង COPPPAL ដែល​តាម​រយៈ នៃកិច្ច​ប្រជុំទាំងពីរនេះ​បង្ហាញ​ថា កម្ពុជា​តាម​រយៈគណបក្ស​ប្រជាជន​កម្ពុជា បាន​ចូល​រួម​ធ្វើ​សេចក្តី​សម្រេច​ដ៏សំខាន់​ក្នុង​កិច្ច​ការ​នយោបាយ និង​សេដ្ឋកិច្ច​​អន្តរជាតិ។ ឯកឧត្តម​បណ្ឌិត​សភា ចារ្យ សុខ អាន ដែល​ជា​អនុ​ប្រធានអង្គការ​គណបក្ស​នយោបាយ​អាស៊ី បាន​មាន​ប្រសា​សន៍​ឲ្យ​ដឹង​ថា នៅ​ក្នុង​កិច្ច​ប្រជុំ​ការិយាល័យ​របស់ ICAPP គឺជាកិច្ច​ប្រជុំ​ក្បាល​​ម៉ាស៊ីន​របស់ ICAPP ដែលជា​លើក​ដំបូងកម្ពុជា​បានចូល​រួម​​ធ្វើ​សេចក្តី​សម្រេច​ក្នុង​​នាម​ជា​អនុ ​ប្រ​ធាន​។

នៅ ​ក្នុង​កិច្ច​ប្រជុំ​ការិយាល័យ ICAPP ទី១-ផ្តោត​លើ​របៀប​របប​នៃការ​ធ្វើការងារ​របស់​ការិយាល័យ​ ICAPP ក្នុង​នោះ​រៀប​ចំ​ជា​ក្រម​ប្រតិបត្តិ​មួយ​សម្រាប់​ធ្វើការងារ​។ ទី២-​សម្រេច​យក​ប្រទេស​ម៉ាឡេស៊ី​ធ្វើ​ជាកិច្ច​ប្រជុំ​គណៈកម្មាធិការ​ ប្រតិបត្តិ ICAPP នៅ​ក្នុង​អំឡុង​ខែមីនា ឆ្នាំ២០១៥ ដោយ​មាន​គណបក្ស​នយោបាយ​ជា​សមាជិក​ចំនួន​៣០ មក​ពី​ ២៣ប្រទេសចូល​រួម។ ទី៣-​កិច្ច​ប្រជុំ​ស្តីពី​នារី និង​ការ​ជួញ​ដូរ​ស្ត្រី និងកុមារ នៅកម្ពុជា ដែលរៀប​ចំ​ឡើង​ដោយ​ក្រសួង​កិច្ចការ​នារី ស្រប​គ្នា​នឹង​កិច្ច​ប្រជុំ​រដ្ឋមន្ត្រី​កិច្ច​ការ​នារី នៃ​ប្រទេស​អនុតំបន់​ទន្លេមេគង្គ (GMS) នៅកម្ពុជាផង​ដែរ។ ទី៤-រៀប​ចំ​សន្និសីទ​ស្តីពី​ការ​ធ្វើ​សមារណកម្ម​សេដ្ឋកិច្ច​ និង​វប្ប​ធម៌នៅទីក្រុង​វ្លាឌីវូស្តុក សហព័ន្ធ​រុស្ស៊ី ក្នុង​អំឡុង​ខែឧសភា ឆ្នាំ២០១៥ ។ ទី៥-រៀប​ចំ​កិច្ច​ប្រជុំ​យុវជន​គណបក្ស​នយោបាយ​អាស៊ី ICAPP នៅ​ក្នុង​អំឡុង​ខែកក្កដា ឬសីហា ឆ្នាំ​២០១៥ ដោយ​ប្រទេស​ចិន​ធ្វើ​ជា​ម្ចាស់​ផ្ទះ។ ទី៦-រៀប​ចំ​កិច្ច​ប្រជុំ​ក្រុមស្លាបការងារនារី របស់​ ICAPP (Women Wing) នៅ​ក្នុង​អំឡុង​ខែកញ្ញា ឆ្នាំ២០១៥ នៅ​ប្រទេស​អាហ្សែ​បៃហ្សង់​ និង​ទី​៧-គឺ​ជា​កិច្ច​ប្រជុំ​ដ៏សំខាន់​រវាង​សមាគមសភា​អាស៊ី (APA) និង​គណៈកម្មាធិការ​ប្រតិបត្តិនៃអង្គការ​គណបក្ស​នយោ​បាយ​​អាស៊ី (ICAPP) ដែលកម្ពុជា​ធ្វើ​ជាម្ចាស់​ផ្ទះ​រៀប​ចំ​ឡើង​ដោយ​រដ្ឋសភា​កម្ពុជា នៅ​ក្នុង​អំឡុង​ខែ​ធ្នូ ឆ្នាំ២០១៥ ខាង​មុខ​នេះ។ កិច្ច​ប្រជុំ​នេះ ត្រូវ​បាន​ឯកឧត្តម​បណ្ឌិត​សភា​ចារ្យ សុខ អាន ចាត់​ទុក​ថា ជា​កិច្ច​ប្រជុំ​លើក​ដំបូង និងប្រវត្តិសាស្ត្រ ជាការ​ប្រជុំ​រួម​បញ្ចូល​គ្នា​រវាង​រដ្ឋ​សភា (ស្ថាប័ន​និតិបញ្ញត្តិ) និង​គណប​ក្សនយោបាយអាស៊ី (ICAPP)។

ដោយ ​ឡែក​នៅ​ក្នុង​ទីក្រុង​ម៉ានិល ក្រៅ​ពី​កិច្ច​ប្រជុំ​ការិយាល័យ ICAPP គឺ​មាន​កិច្ច​ប្រជុំ​មួយ​​ទៀត គឺ​កិច្ច​ប្រជុំ​ក្រុម​ប្រឹក្សា​ធុរៈកិច្ច (ICBC)។ ទាក់​ទង​នឹង​កិច្ច​ប្រជុំ​នេះ​ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសាសន៍​ឲ្យ​ដឹង​ថា ​ក្រុម​ប្រឹក្សា​ធុរកិច្ច (ICBC) នេះ ត្រូវ​បាន​បង្កើត​ឡើង​នៅ​ក្នុង​កិច្ច​ប្រជុំ ICAPP កាល​ពី​ថ្ងៃទី២៨-២៩ ខែវិច្ឆិកា ឆ្នាំ២០១៤ នៅ​ក្នុង​ប្រទេស​ម៉ិកស៊ីកូ។ សម្រាប់​កិច្ច​ប្រជុំ​ក្រុមប្រឹក្សា​ធុរៈកិច្ច (ICBC) នៅក្នុង​ប្រទេស​ម៉ានិល​នេះ ជាកិច្ច​ប្រជុំ​លើក​ដំបូង ដោយ​មាន​ធុរកិច្ចជនធំៗចំនួន២៦ ចូលរួម​ធ្វើ​បទ​អន្ត​រាគមន៍​ទាក់​ទង​លើ​វិស័យ​ហេដ្ឋា​រចនា​សម្ព័ន្ធ ទេសចរណ៍ រ៉ែ និង​ថាម​ពល។ ជា​រួម​កិច្ច​ប្រជុំ​នេះ​បាន​រៀប​ចំ​ជា​ផែនទី​ចង្អុល​ផ្លូវ​មួយ ដែល​មាន​កិច្ច​សហ​ប្រតិបត្តិ​ការ​​រវាង​ធុរៈកិច្ច​ជន និង​សង្គម​ស៊ីវិលរួមគ្នា​ជា​កម្លាំង ដើម្បី​ជា​ប្រយោជន៍ក្នុង​ការចូល​​រួម​អភិវឌ្ឍន៍​សេដ្ឋ​កិច្ច​ពិភពលោក​៕