មេសហជីពធំជាងគេនៅកម្ពុជា
បានប្រកាសគាំទ្រអនុសាសន៍បីចំណុច របស់សម្តេចតេជោហ៊ុន សែន ទាក់ទងដល់ផលប្រយោជន៍ដ៏ធំរបស់កម្មករ កម្មការិនី
កំពុងបម្រើការងារលើវិស័យ កាត់ដេរនិងស្បែកជើង គឺ ១- នឹងពិនិត្យបញ្ចុះតម្លៃទឹកស្អាត
២-ពិនិត្យការបញ្ចុះតម្លៃនៃការធ្វើដំណើរ និង ៣- ពិនិត្យធ្វើច្បាប់ជួលផ្ទះស្នាក់នៅ។
លោក សោម អូន ប្រធានក្រុមប្រឹក្សាសហភាពសហជីពជាតិកម្ពុជា បានប្រកាសគាំទ្រពេញទំហឹងនូវអនុសាសន៍បីចំណុចខាងលើនេះ កាលពីព្រឹកថ្ងៃទី១១ កុម្ភះ បន្ទាប់ពីសម្តេចតេជោ បានថ្លែងនៅក្នុងពិធីចែកសញ្ញាបត្រ ដល់និស្សិតសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច នាព្រឹកថ្ងៃទី១០ ខែកុម្ភៈ ឆ្នាំ២០១៥ កន្លងទៅនេះនៅមជ្ឈមណ្ឌលកោះពេជ្រ។
លោក សោម អូន បន្តថា
សហជីពទាំងអស់សូមគាំទ្រ និងចូលរួមសហការជាមួយអាជ្ញាធរ និង មន្ត្រីជំនាញ នៅតាមផ្ទះជួលពាក់ព័ន្ឋទៅសេវាតភ្ជាប់អគ្គិសនីថ្មី
និងដាក់កុងទ័រថ្មីសម្រាប់ផ្ទះជួលកម្មករជាង៣ម៉ឺនបន្ទប់ ដែលជាបន្ទុករបស់រាជរដ្ឋាភិបាល
បង់លុយជំនួសកម្មករដែលមានទឹកប្រាក់សរុបជាង២លានដុល្លារ និងបញ្ចុះតម្លៃការប្រើប្រាស់ក្រោម៥០គីឡូវ៉ាត់ម៉ោងត្រឹមតែ៦១០រៀល។
លោក សោម
អូន បន្តថា យុទ្ធនាការចុះតភ្ជាប់ចរន្តអគ្គិសនី របស់អាជ្ញាធរជាតិអគ្គិសនីកម្ពុជា
តម្លៃ ៦១០រៀល សម្រាប់ក្រុមកម្មករនៅរាជធានីភ្នំពេញ កាលពីចុង ខែមករា
រហូតមកដល់ថ្ងៃទី៨ ខែកុម្ភៈ ឆ្នាំ២០១៥ អនុវត្តបានចំនួនជាង៨ពាន់បន្ទប់ លើបន្ទប់ជួលសរុបរបស់កម្មករជាង៣ម៉ឺនបន្ទប់។
ពាក់ព័ន្ធបញ្ហាបញ្ចុះតម្លៃទឹកស្អាត លោក សោម អូន បានលើកឡើងថា សម្តេចនាយករដ្ឋមន្រ្តី
ហ៊ុន សែន បានបញ្ជាឱ្យក្រសួងពាក់ព័ន្ធ លក់តម្លៃទឹកជូនដល់ម្ចាស់ផ្ទះជួល
ក្នុងតម្លៃថេរមួយ គឺ១០៣០រៀល ក្នុងមួយម៉ែត្រគូប ហើយអំពាវនាវឱ្យម្ចាស់ផ្ទះជួលទាំងអស់លក់ តម្លៃទឹកបន្តជូនកម្មករ
និងនិស្សិតត្រឹម១១០០ ដល់១២០០រៀលប៉ុណ្ណោះ ក្នុងមួយម៉ែត្រគូប
មិនអាចយកខ្ពស់ជាងនេះបានទេ ដើម្បីសម្រួលដល់ជីវភាពរបស់កម្មករ និងនិស្សិតនៅរាជធានីភ្នំពេញ។
មេសហជីពរូបនេះបន្តទៀតថា
បញ្ហាតម្លៃអគ្គិសនីដែលកំពុងអនុវត្តនៅតាមផ្ទះជួល, បញ្ហាបញ្ចុះតម្លៃទឹកស្អាត
,បញ្ហាបញ្ចុះតម្លៃធ្វើដំណើរ
(ចុះតាមតម្លៃប្រេង), បញ្ហាធ្វើច្បាប់ថ្មីកំណត់សិទ្ធិរបស់ម្ចាស់ផ្ទះក្នុងការដំឡើងថ្លៃឈ្នួលផ្ទះពីរយៈពេល
នៃកិច្ចសន្យាមួយទៅកិច្ចសន្យាមួយទៀតនិងការយកចិត្តទុកដាក់ដល់កម្មករបន្ថែមទៀត
ដោយបង្កើនប្រាក់ដែលជាប់ពន្ឋរបស់កម្មករពី៥០ម៉ឺនរៀលឡើងដល់៨០ម៉ឺនរៀលទើបជាប់ពន្ឋ។
ទាំងអស់នេះគឺបាន ផ្តល់ផលប្រយោជន៍ដ៏ធំធេងបំផុតជូនកម្មករ កម្មការិនី
ដើម្បីឲ្យពួកគាត់អាចសន្សំប្រាក់បន្ទាប់ពីគណៈកម្មការក្រុមប្រឹក្សាការងារដំឡើងប្រាក់អប្បបរមាដល់១២៨ដុល្លារក្នុងមួយខែ៕
No comments:
Post a Comment