រាជធានីភ្នំពេញ ថ្ងៃទី២២ ខែតុលា ឆ្នាំ២០១៤
- ឯកឧត្តម លោកជំទាវ លោកឧកញ៉ា សមាជិក សមាជិកានៃក្រុមប្រឹក្សាគណៈវិស្វករកម្ពុជា
- ឯកឧត្តម លោកជំទាវ អស់លោក លោកស្រី សមាជិក សមាជិកា នៃគណៈវិស្វករកម្ពុជា និងភ្ញៀវកិត្តិយសជាតិ អន្តរជាតិ ជាទីមេត្រី
ថ្ងៃនេះ ខ្ញុំមានសេចក្តីសោមនស្សរីករាយចូលរួមក្នុងពិធីបិទមហាសន្និបាតបូកសរុបលទ្ធផលការងារអាណត្តិទី១ របស់គណៈវិស្វករកម្ពុជា។ ក្នុងនាមរាជរដ្ឋាភិបាល ខ្ញុំសូមសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ឯកឧត្តម លោកជំទាវ អស់លោក លោកស្រី ជាសមាជិក សមាជិកា នៃក្រុមប្រឹក្សាគណៈវិស្វករកម្ពុជា ព្រមទាំងថ្នាក់ដឹកនាំ មន្ត្រី បុគ្គលិកទាំងអស់នៃអគ្គលេខាធិការដ្ឋាន ដែលបានធ្វើឱ្យសមាគមវិជ្ជាជីវៈមួយនេះ សម្រេចបាននូវសមិទ្ធផលជាច្រើន នាពេលកន្លងមក ដើម្បីជាប្រយោជន៍ដល់ការធ្វើនិយតកម្ម និងការលើកកម្ពស់វិជ្ជាជីវៈវិស្វកម្មនៅកម្ពុជា ឱ្យកាន់តែប្រសើរឡើងបន្ថែមទៀត។
វិស័យវិស្វកម្ម ដើរតួនាទីយ៉ាងសំខាន់ក្នុងការអភិវឌ្ឍប្រទេសតាមរយៈការបង្កើតមូលដ្ឋានសម្ភារ និងហេដ្ឋារចនាសម្ព័ន្ធរូបវន្តនានា។ ក្នុងន័យនេះ វិស្វករអាជីពម្នាក់ មិនត្រឹមតែត្រូវមាន សមត្ថភាព តាមរយៈការអប់រំ និងការបណ្ដុះបណ្ដាលច្បាស់លាស់លើវិស័យវិស្វកម្មប៉ុណ្ណោះទេ ប៉ុន្តែថែមទាំងត្រូវមានសីលធម៌វិជ្ជាជីវៈខ្ពស់ ហើយដើម្បីលើកកម្ពស់នូវវិជ្ជាជីវៈរបស់ខ្លួនថែមទៀត វិស្វករគួរធ្វើការសិក្សាស្រាវជ្រាវនូវបច្ចេកវិជ្ជាថ្មីៗ សំដៅឆ្លើយតបទៅនឹងតម្រូវការ និងការវិវត្តផ្នែកវិស្វកម្មនេះ។
ដូចដែលយើងទាំងអស់គ្នាដឹងស្រាប់ហើយថា វិស្វកម្មគឺជាវិជ្ជាជីវៈ មួយ ដែលតម្រូវឱ្យមានគោលការណ៍វាយតម្លៃ និងការកំណត់លើវិធីសាស្រ្តច្បាស់លាស់។ វិស្វករអាជីពកម្ពុជាគួរខិតខំបំពេញលក្ខខណ្ឌចាំបាច់នានា ដើម្បីធ្វើឱ្យវិស័យវិស្វកម្មកម្ពុជាមានតម្លៃសមមូលនឹងវិស្វកម្មអាស៊ាន ក៏ដូចជាវិស្វកម្មពិភពលោក។ ក្នុងន័យនេះ កិច្ចខិតខំប្រឹងប្រែងជំរុញសមត្ថភាពវិស្វករជាតិ គឺពិតជាមានសារៈសំខាន់សម្រាប់ដំណើរការពង្រឹងវិស័យនេះ ដើម្បីឆ្លើយតបទៅនឹងចរន្តសមាហរណកម្ម និងសាកលភាវូបនីយកម្មសេដ្ឋកិច្ចតំបន់ និងពិភពលោក។ ជាងនេះទៅទៀតចាំបាច់ត្រូវមានការផ្លាស់ប្ដូរយោបល់ បទពិសោធន៍ជាក់ស្ដែង គំនិតនិងបច្ចេកវិជ្ជាថ្មីៗ ព្រមទាំងរបកគំហើញនៃការសិក្សាស្រាវជ្រាវ ឱ្យកាន់តែទូលំទូលាយនៅក្នុងចំណោមសហគមន៍វិស្វករជាតិ និងអន្តរជាតិ។ ដើម្បីសម្រេចគោលដៅនេះ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាននិងកំពុងជំរុញ និងបង្កលក្ខខណ្ឌអនុគ្រោះ ដល់ការអភិវឌ្ឍវិស័យវិស្វកម្មនៅកម្ពុជា តាមរយៈការបង្កើតគណៈវិស្វករកម្ពុជា ជាអង្គការវិជ្ជាជីវៈដែលប្រមូលផ្ដុំ ចុះបញ្ជី បណ្តុះបណ្តាល និងគ្រប់គ្រងវិស្វករ សំដៅលើកកម្ពស់សមត្ថភាពវិស្វករទាំងអស់។ នេះជាសក្ខីភាពបញ្ជាក់ឱ្យឃើញកាន់តែច្បាស់ថែមទៀត អំពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះការអភិវឌ្ឍវិស័យវិស្វកម្មនៅកម្ពុជា។
ឯកឧត្តម លោកជំទាវ អស់លោក លោកស្រី
មហាសន្និបាតបូកសរុបលទ្ធផលការងារអាណត្តិទី១ របស់គណៈវិស្វករកម្ពុជា នាពេលនេះ មិនត្រឹមតែបង្ហាញឱ្យឃើញនូវសកម្មភាព និងការបោះជំហានទៅមុខរបស់វិស័យនេះប៉ុណ្ណោះទេ ប៉ុន្តែថែមទាំងបានបញ្ជាក់ឱ្យឃើញអំពីការអភិវឌ្ឍធនធានមនុស្សនៅកម្ពុជា ជាពិសេសក្នុងវិស័យវិស្វកម្ម ថែមទៀតផង។
ក្នុងនាមរាជរដ្ឋាភិបាល ខ្ញុំសូមសម្ដែងនូវការអបអរសាទរ ចំពោះលទ្ធផលការងារដែលគណៈវិស្វករកម្ពុជាសម្រេចបាន និងសូមកោតសរសើរចំពោះកិច្ចខិតខំប្រឹងប្រែងរបស់មន្ត្រី បុគ្គលិករបស់គណៈវិស្វករកម្ពុជា និងស្ថាប័នពាក់ព័ន្ធទាំងអស់ ចំពោះកិច្ចសហប្រតិបត្តិការដ៏ល្អ សំដៅបង្កលក្ខណៈងាយស្រួលដល់ការអភិវឌ្ឍ និងការធ្វើសមាហរណកម្មសេវាកម្មវិស្វកម្មនៅក្នុងតំបន់និងពិភពលោក ស្របតាមស្មារតីនៃកិច្ចព្រមព្រៀងទូទៅស្តីពីពាណិជ្ជកម្មផ្នែកសេវាកម្ម (General Agreement on Trade in Services – GATS) និងយន្តការសម្របសម្រួលការទទួលស្គាល់គ្នាទៅវិញទៅមកក្នុងតំបន់អាស៊ាន (ASEAN Mutual Recognition Arrangement – ASEAN MRA) ដែលកម្ពុជាជាប្រទេសហត្ថលេខីតាំងពីឆ្នាំ២០០៥ មក។
ទោះបីជាគណៈវិស្វករកម្ពុជា សមេ្រចបានលទ្ធផលការងារយ៉ាងច្រើនគួរឱ្យកត់សម្គាល់ គណៈវិស្វករកម្ពុជាក៏នៅមានកិច្ចការសំខាន់ៗជាច្រើនទៀតដែលត្រូវបន្តអនុវត្ត ជាពិសេសការបន្តប្រមូលផ្តុំវិស្វករចុះបញ្ជី (Registered engineers) និងបន្តការអភិវឌ្ឍសមត្ថភាពបន្ថែម ដើម្បីឱ្យមានភាពប្រកួតប្រជែងក្នុងវិស័យសេវាកម្មវិស្វកម្មទាំងនៅកម្រិតតំបន់ និងពិភពលោក។
ក្នុងនាមប្រធានក្រុមប្រឹក្សានៃគណៈវិស្វករកម្ពុជា ខ្ញុំសូមផ្តល់ជាអនុសាសន៍ខ្លះៗ ដើម្បីរួមចំណែកដល់ការបន្តអនុវត្តភារកិច្ចរបស់គណៈវិស្វករកម្ពុជា ដូចខាងក្រោម៖
១- គណៈវិស្វករកម្ពុជាត្រូវពង្រឹងនិងពង្រីកទំនាក់ទំនង និងសហការជាមួយក្រសួងអប់រំ យុវជន និងកីឡា គ្រឹះស្ថានឧត្តមសិក្សា និងក្រសួងពាក់ព័ន្ធនានា ព្រមទាំងវិស័យឯកជន ក្នុងការផ្សព្វផ្សាយឱ្យបានទូលំទូលាយ និងជំរុញឱ្យវិស្វករដែលកំពុងប្រកបវិជ្ជាជីវៈវិស្វកម្មមកចុះបញ្ជីនៅគណៈវិស្វករកម្ពុជា ឱ្យបានគ្រប់ៗគ្នា ដើម្បីទទួលអត្ថប្រយោជន៍ផ្សេងៗ ដូចជាការបណ្តុះបណ្តាលបន្ថែម ការផ្លាស់ប្តូរបទពិសោធន៍ និងឱកាសកាន់តែប្រសើរថែមទៀត សម្រាប់ទទួលបានគុណវុឌ្ឍិជាវិស្វករអាជីពជាតិ និងវិស្វករអាស៊ាន។
២- គណៈវិស្វករកម្ពុជាត្រូវបង្កើតក្រុមប្រឹក្សាគណៈវិស្វកររាជធានី-ខេត្ត ឱ្យបានរួចរាល់ នៅត្រីមាសទី១ ឆ្នាំ២០១៥ ខាងមុខ ដើម្បីកៀរគរនិងពង្រីកសមាជិកបន្ថែមទៀត ដែលកំពុងប្រកបវិជ្ជាជីវៈវិស្វកម្មនៅតាមបណ្តារាជធានី-ខេត្ត សំដៅគ្រប់គ្រងនូវចំនួនវិស្វករកម្ពុជាឱ្យបានច្បាស់លាស់។
៣- គណៈវិស្វករកម្ពុជាត្រូវរៀបចំកម្មវិធីបណ្តុះបណ្តាល និងធ្វើសិក្ខាសាលាឱ្យបានច្រើនថែមទៀតសម្រាប់ផ្សព្វផ្សាយនូវបច្ចេកវិជ្ជាថ្មីៗលើផ្នែកវិស្វកម្ម ផ្លាស់ប្តូរយោបល់ និងការអនុវត្តជាក់ស្តែង ព្រមទាំងបង្កើតបណ្តាញសហគមន៍វិស្វកម្ម។
៤- គណៈវិស្វករកម្ពុជា ត្រូវបន្តរៀបចំលិខិតបទដ្ឋានគតិយុត្តចាំបាច់នានា ដើម្បីឆ្លើយតបទៅនឹងលក្ខខណ្ឌតម្រូវដែលកំណត់ដោយអង្គការសហព័ន្ធវិស្វកម្មអាស៊ាន សំដៅសម្រួលដល់ការធ្វើសមាហរណកម្មវិស្វកម្មអាស៊ាន។
ឯកឧត្តម លោកជំទាវ អស់លោក លោកស្រី
ជាថ្មីម្តងទៀត ខ្ញុំសូមសម្ដែងនូវការអបអរសាទរនិងវាយតម្លៃខ្ពស់ ចំពោះសមិទ្ធផលដែលគណៈវិស្វករកម្ពុជាសម្រេចបាននាពេលកន្លងមក ហើយខ្ញុំសង្ឃឹមថា គណៈវិស្វករកម្ពុជាក្នុងអាណត្តិទី២ នឹងបន្តបំពេញភារកិច្ចឱ្យកាន់តែប្រសើរថែមទៀត ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍជាតិមាតុភូមិជាទីស្នេហានៃយើង។
ខ្ញុំសូមយកឱកាសនេះ អបអរសាទរឯកឧត្តមអគ្គលេខាធិការ និងអគ្គលេខាធិការរងទាំង៦រូប ដែលបានជាប់ឆ្នោតសម្រាប់អាណត្តិទី២ ហើយខ្ញុំជឿជាក់ថា ជាមួយនឹងបទពិសោធន៍ និងធនធានមនុស្សដែលមានគុណវុឌ្ឍិខ្ពស់ គណៈវិស្វករកម្ពុជាអាណត្តិថ្មីនេះ នឹងសម្រេចបានសមិទ្ធផលថ្មីៗបន្ថែមទៀត។ ជាមួយគ្នានេះដែរ ក្នុងនាមប្រធានក្រុមប្រឹក្សាគណៈវិស្វករកម្ពុជា ខ្ញុំនឹងស្នើតែងតាំងឯកឧត្តម ប្រាក់ មិន ជាអនុប្រធានក្រុមប្រឹក្សាគណៈវិស្វករកម្ពុជា ដើម្បីឯកឧត្តមអាចបន្តចូលរួមអភិវឌ្ឍវិស័យវិស្វកម្មកម្ពុជាឱ្យកាន់តែរីកចម្រើនថែមទៀត។
ជាទីបញ្ចប់ ខ្ញុំសូមជូនពរឯកឧត្តម លោកជំទាវ អស់លោក លោកស្រី និងអង្គមហាសន្និបាតទាំងមូល សូមទទួលបានសុខភាពល្អ ជោគជ័យ និងសុភមង្គលក្នុងក្រុមគ្រួសារ។
ខ្ញុំសូមប្រកាសបិទមហាសន្និបាតបូកសរុបលទ្ធផលការងារអាណត្តិទី១ ចាប់ពីពេលនេះតទៅ៕
សូមអរគុណ!
No comments:
Post a Comment