សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍នាព្រឹកថ្ងៃទី០១ ខែកញ្ញា ឆ្នាំ២០១៤ ដោយចាត់ទុកលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០១៣-២០១៤ ដែលបានប្រកាសកាលពីពេលថ្មីៗនេះគឺជាលទ្ធផលនៃការកែទម្រង់ស៊ីជម្រៅក្នុងវិស័យអប់រំ។
ក្នុងពិធីប្រកាសផ្សព្វផ្សាយជាផ្លូវការគោលនយោបាយជាតិ និងផែនការសកម្មភាពជាតិស្ដីពីការគាំពារ និងអភិវឌ្ឍន៍កុមារតូច ឆ្នាំ២០១៤-២០១៨នៅ វិទ្យាស្ថានជាតិអប់រំ សម្ដេចតេជោនាយករដ្ឋមន្ត្រីមានប្រសាសន៍ឲ្យដឹងថា ឆ្នាំនេះការប្រឡងបាក់ឌុបជាប់និទ្ទេសA មានតែ ចំនួន១១នាក់តែប៉ុណ្ណោះ ដែលបណ្ដាឆ្នាំមុន ៗអ្នកជាប់មានរហូតដល់១៥០នាក់ ដូច្នេះបានសេចក្ដីថា ជាការច្របាច់ទឹក១០យកទឹក១ ដែលត្រូវចូលរួមទាំងអស់គ្នាមាតាបិតា សិស្សានុសិស្សក៏ដូចជាកុមារ និងយុវជនខ្លួនឯងត្រូវប្រឹងទាំងអស់គ្នា។ សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ (ចំពោះការប្រឡងបាក់ឌុបឆ្នាំសិក្សា២០១៣-២០១៤)ថា អត់មានដោះស្រាយបញ្ហាតាមរយៈការសូកប៉ាន់ ឬតាមរយៈការបន្ធូរបន្ថយណាមួយ ដោយគ្រូបង្រៀន ឬអ្នកធ្វើកំណែ ឬដោយក្រសួងអប់រំ ហើយក៏មិនអាចយកការបន្ធូរបន្ថយ ដោយគិតពីរឿងឲ្យជាប់ដែលទីចុងបំផុតអត់ធ្វើការងារបាននោះ គឺមិនអាចទៅរួចទេ។
សម្តេចតេជោថ្លែងថា ឥឡូវនេះកំណែទម្រង់បានចាប់ផ្ដើមហើយ ជាមួយនឹងកិច្ចការដ៏ល្អ និង ជឿជាក់ ដែលដឹកនាំអនុវត្តន៍ និង ជាគំនិតផ្ដួចផ្ដើមរបស់ក្រសួងអប់រំ យុវជន និង កីឡា។ យើងសង្ឃឹមថា កំណែទម្រង់នេះ មិនមែនគ្រាន់តែធ្វើនូវកម្រិតមធ្យមសិក្សាទុតិយភូមិនោះទេ ក៏ប៉ុន្តែកុមារ យុវវ័យរបស់យើងត្រូវចេះប្រឹងតាំងពីកម្រិតបឋម ទៅមធ្យមសិក្សាកម្រិតទី១ មធ្យម សិក្សាកម្រិតទី២ ព្រោះដឹងថាមកដល់កន្លែងនេះគឺផ្លោះរបងកាន់តែខ្ពស់ ដូច្នេះគឺ ត្រូវចាប់ផ្ដើមរយៈពេល១២ឆ្នាំមក”។
សម្តេចតេជោមានប្រសាសន៍បញ្ជាក់ថា យើងនឹងប្រឹងបន្តបែបនេះតទៅទៀត ដើម្បីឲ្យធនធានមនុស្សរបស់យើងចេញពីសាលាមក គឺទីផ្សារការងារអាចទទួលយើងយកទៅធ្វើការ ឬក៏ផ្នែករដ្ឋគេទទួលយើងយកទៅធ្វើការ រហូតដល់ស្ថាប័នអន្តរជាតិ ដែលគេមកធ្វើការក្នុងប្រទេសយើង គេរើសយើងយកទៅធ្វើការនៅក្នុងប្រទេសរបស់យើង ឬយើងអាចទៅធ្វើការនៅក្រៅប្រទេសទៀតផង។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឆ្នាំសិក្សា២០១៣-២០១៤នៅទូទាំងប្រទេសមានបេក្ខជនប្រឡងជាប់ចំនួន ២៣ ១២៦នាក់ ស្មើនឹង២៥,៧២ភាគរយនៃបេក្ខជន ដែលចូលរួមប្រឡងសរុបចំនួន ៨៩ ៩៣៧នាក់ មានមណ្ឌលប្រឡងចំនួន១៥៤កន្លែង ចែកចេញជា៣ ៦៨៣ បន្ទប់ប្រឡង។ ជារៀងរាល់ឆ្នាំការប្រឡងបាក់ឌុបជាប់រហូតដល់ទៅជាង៨០%។
សម្តេចតេជោនាយករដ្ឋមន្ត្រីមានប្រសាសន៍ផ្តល់ជាអនុសាសន៍ដល់យុវសិស្ស ដែលប្រឡងធ្លាក់ថា ឱកាសនៃការប្រឡងលើកទី២ ត្រូវធ្វើនៅថ្ងៃទី១៣ និង ១៤ខែតុលាខាងមុខ ដូច្នេះសុំក្មួយៗដែលប្រឡងមិន ជាប់ត្រូវប្រឹងចាប់ពីពេលនេះរហូតដល់ថ្ងៃប្រឡង បើសិនជាខិតខំរៀន ការប្រឡងលើកទី២ ក្មួយៗពិតជាមានឱកាស។ មាតាបិតា អាណាព្យាបាលរបស់សិស្សានុសិស្ស ក៏ដូចជាក្មួយៗសិស្សានុសិស្សខ្លួនឯង ត្រូវដាស់តឿនក្រើនរំឭកឲ្យកូនចៅរបស់ខ្លួនខិតខំរៀនឡើង បើមិនដូច្នោះទេក្មួយៗនឹងរៀនត្រួតថ្នាក់។ សម្តេចមានប្រសាសន៍ក្រើនរំលឹកជាមុនសម្រាប់យុវសិស្សដែលត្រូវប្រឡងបាក់ឌុប ក្នុងឆ្នាំសិក្សា ២០១៤-២០១៥ ឲ្យខិតខំរៀន ព្រោះថា ឆ្នាំក្រោយមិនប្រាកដថា ក្រសួងអប់រំ នឹងចាត់ចែងឲ្យមានការប្រឡងជាលើកទី២នោះទេ៕
No comments:
Post a Comment