ភ្នំពេញថ្ងៃទី០១ ខែកញ្ញា ឆ្នាំ២០១៤: ឯកឧត្តមបណ្ឌិតសភាចារ្យ សុខ អាន ឧបនាយករដ្ឋ មន្រ្តីរដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានអនុញ្ញាតអោយឯកឧត្តម Yogpal Singh សហប្រធានក្រុមការងារត្រួតពិនិត្យប្រចាំតំបន់អាស៊ីប៉ាស៊ីហ្វិក (APRRG) ចូលជួបពិភាក្សាការងារស្តីអំពីការប្រឆាំងការលាងសំអាតប្រាក់ និងអំពើហរិញ្ញប្បទានភេរវកម្ម។ ភាគីទាំងពីរបានយល់ស្របគ្នាអំពីដំណើរការរីកចម្រើនដែលរាជរដ្ឋាភិបាលកម្ពុជាសម្រេចបានកន្លងមកទាក់ទង ទៅនឹងការប្តេជ្ញាចិត្តរបស់ខ្លួនដើម្បីអនុវត្តផែនការសកម្មភាពនេះ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា ចាប់តាំងពីខែមីនា ឆ្នាំ២០១៣ រាជរដ្ឋាភិបាលកម្ពុជាបានកសាងផែនការយុទ្ធសាស្រ្តស្តីពីការប្រឆាំងការសំអាតប្រាក់ និងហិរញ្ញប្បទានភេរវកម្មតាមរយៈការពង្រឹងក្របខណ្ឌគតិយុត្តិ និងប្រសិទ្ធភាពយន្តការអនុវត្តច្បាប់។
ឯកឧត្តមបណ្ឌិតសភាចារ្យ សុខ អាន ក៏បានមានប្រសាសន៍ផងដែរថា បើទោះបីជាទិដ្ឋភាពប្រតិបត្តិការហិរញ្ញវត្ថុមានលក្ខណៈស្មុគស្មាញខ្លះក៏ដោយ ក៏រាជរដ្ឋាភិបាលកម្ពុជាបានអនុវត្តន៍ផែនការសកម្មភាពនេះដោយរលូនស្របទៅតាមស្តង់ដាអន្តរជាតិ ដែលធ្វើអោយក្រុមការងារហិរញ្ញវត្ថុអន្តរជាតិ (FATF) បានដកកម្ពុជាចេញពីបញ្ជីប្រផេះនៅខែមិថុនា ឆ្នាំ២០១៤ កន្លងទៅនេះ ខណៈដែលមានប្រទេស ៥ ផ្សេងទៀតនៅក្នុងអាស៊ីកំពុងស្ថិតនៅក្នុងបញ្ជីនេះនៅឡើយ។
ឯកឧត្តមបណ្ឌិតសភាចារ្យសុខ អាន ក៏បានមានប្រសាសន៍ទៅកាន់ក្រុមគណៈប្រតិភូថា ឆ្លើយតបទៅនឹងការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការអនុវត្ថផែនការសកម្មភាពនេះ រាជរដ្ឋាភិបាលកម្ពុជាបានធ្វើវិសោធនកម្មច្បាប់ប្រឆាំងការសំអាតប្រាក់ និងអំពើហរិញ្ញប្បទានភេរវកម្មនិងអនុក្រឹត្យស្តីពីការបង្កកទ្រព្យសម្បត្តិភេរវកម្ម និងអង្គការនានា ដែលទាក់ទងទៅនឹងអំពើភេរវកម្ម។
នៅចុងឆ្នាំ២០១១ រាជរដ្ឋាភិបាលកម្ពុជា បានបង្កើតអោយមានកិច្ចសហប្រតិបត្តិការរវាងអង្គភាពស៊ើបការណ៍ហិរញ្ញវត្ថុកម្ពុជា ជាមួយអគ្គស្នងការនគរបាលជាតិ។
នៅឆ្នាំ២០១២ អង្គភាពស៊ើបការណ៍ហិរញ្ញវត្ថុកម្ពុជាក៏បង្កើតអោយកិច្ចសហប្រតិបត្តិជាមួយអគ្គនាយកដ្ឋានគយ និងរដ្ឋាករកម្ពុជាផងដែរ តាមរយៈអនុស្សរណៈយោគយល់គ្នាស្តីពីការផ្លាស់ប្តូរព័ត៌មានក៏ដូចជាបណ្តុះបណ្តាលសមត្ថភាពជំនាញដល់មន្ត្រីសា្ថប័នទាំងនេះដើម្បីរួមចំណែកក្នុងការអនុវត្តផែនការសកម្មភាពអោយកាន់តែមានប្រសិទ្ធិភាព។
ដំណើរទស្សនកិច្ចរបស់ក្រុមត្រួតពិនិត្យអាស៊ីប៉ាស៊ីហិ្វក (APRRG) ដែលមានគណៈប្រតិភូ៥រូបដឹកនាំដោយសហប្រធាន Yogpal Singh និងលោកស្រី Julia Bacay Abad នឹងចុះត្រួតពិនិត្យដល់ទីកន្លែងថ្ងៃទី១ ដល់ថ្ងៃទី២ ខែកញ្ញា នៅរាជធានីភ្នំពេញ។ ហើយកិច្ចប្រជុំផ្ទាល់រវាងក្រុមត្រួតពិនិត្យប្រចាំតំបន់ (APRRG) ជាមួយបណ្តាប្រទេសដែលស្ថិតនៅក្រោមដំណើរការត្រួតពិនិត្យពីកិច្ចសហប្រតិបត្តិអន្តរជាតិនៅថ្ងៃទី៣ ដល់ថ្ងៃទី៥ ខែកញ្ញា ឆ្នាំ២០១៤ នៅខេត្តសៀមរាប ៕
No comments:
Post a Comment