សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍នារសៀលថ្ងៃទី១ ខែកញ្ញា ឆ្នាំ២០១៤ អំពីជំហររបស់រាជរដ្ឋាភិបាលកម្ពុជាថា កម្ពុជាមានការយល់ដឹង និងគោរពនូវការសម្រេចចិត្តរបស់ប្រជាជនថៃ។ ឯឯកឧត្តមនាយឧត្ដមសេនីយ៍ តាណាសាក់ ប៉ាទីម៉ាប្រាកន (Tanasak Patimapragorn) អនុប្រធានក្រុមប្រឹក្សាសន្តិសុខសណ្តាប់ធ្នាប់ជាតិថៃ ក្នុងឱកាសជួបសម្តែងការគួរសមនៅវិមានសន្តិភាព ចំពោះសម្តេចតេជោនាយករដ្ឋមន្ត្រី ក៏បានអះអាងពីជំហររាជរដ្ឋាភិបាលថៃ នាពេលបច្ចុប្បន្ននេះថា ថៃត្រៀមខ្លួនជានិច្ច ដើម្បីធ្វើការជាមួយភាគីកម្ពុជា ដើម្បីពង្រឹង និងពង្រីកកិច្ចសហប្រតិបត្តិការនៃប្រទេសទាំងពីរឲ្យកាន់តែរឹងមាំថែមទៀត។ នេះបើតាមការឲ្យដឹងពីឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រី។
ឯកឧត្តម អ៊ាង សុផល្លែត បានឱ្យដឹងថា ឯកឧត្តម Tanasak Patimapragorn បានជម្រាបសម្ដេចតេជោថា គោលដៅរបស់ប្រតិភូថៃ មកទស្សនកិច្ចកម្ពុជានាពេលនេះ គឺតំណាងឱ្យ ឯកឧត្តម ប្រាយុទ្ធ ចាន់អូចា នាយករដ្ឋមន្ត្រីថៃ និងបាននាំមកនូវការសួរសុខទុក្ខពីប្រមុខដឹកនាំរាជរដ្ឋាភិបាលថៃ ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងអរគុណសម្តេចចំពោះ ឆន្ទៈ ស្មារតី កិច្ចសហប្រតិបត្តិការក្នុងក្របខ័ណ្ឌអាស៊ាន។ ឯកឧត្តម តាណាសាក់ ជម្រាបសម្តេចតេជោផងដែរថា គណៈប្រតិភូថៃទាំងមូលត្រៀមខ្លួនជាស្រេច ដើម្បីបំពេញនូវកិច្ចសហប្រតិបត្តិការជាមួយកម្ពុជា ឱ្យកាន់តែប្រសើរថែមទៀត។
សម្តេចតេជោនាយករដ្ឋមន្ត្រីមានប្រសាសន៍ថា កម្ពុជាមានការយល់ដឹង និងគោរពនូវការសម្រេចចិត្តរបស់ប្រជាជនថៃ គឺគ្មាននរណាស្គាល់ប្រជាជនថៃ ជាងប្រជាជនថៃនោះទេ ហើយសភាពការណ៍ថៃក៏គ្មាននរណាដោះស្រាយ ក្រៅពីប្រជាជនថៃឡើយ។ សម្តេចតេជោបានថ្លែងអំណរគុណចំពោះរដ្ឋាភិបាលថៃ ដែលបានផ្តល់ឱកាសដល់ពលករកម្ពុជាបានក្លាយទៅជាពលករស្របច្បាប់។ សម្តេចតេជោបានមានប្រសាសន៍បញ្ជាក់ថា ដើម្បីផលប្រយោជន៍រួម គឺត្រូវបំពេញ ឱ្យគ្នាទៅវិញទៅមកក្នុងវិស័យសេដ្ឋកិច្ច។
ទាក់ទងនឹងបញ្ហាព្រំដែនរវាងប្រទេសទាំពីរ(កម្ពុជា-ថៃ) សម្តេចតេជោនាយករដ្ឋមន្ត្រីគូសបញ្ជាក់ថា យើងគប្បីជំរុញតំបន់ព្រំដែនឱ្យក្លាយទៅជាតំបន់សន្តិភាពកិច្ចសហប្រតិបត្តិការ និងការអភិវឌ្ឍ។ “កុំឱ្យមានបញ្ហាអ្វីបន្តិចបន្តួចធ្វើឱ្យក្លាយទៅជាជម្លោះធំ ដែលប៉ះពាល់ដល់កិច្ចសហប្រតិបត្តិការការវិនិយោគ និងប៉ះពាល់ដល់ប្រជាជន ដែលរស់នៅក្នុងតំបន់នោះ”៕
No comments:
Post a Comment