ខ្មែរតែមួយ

Thursday, March 24, 2016

ប្រធាននាយកដ្ឋានបច្ចេកទេស និងកោសល្យវិច័យ នៃអង្គភាពប្រឆាំងអំពើពុករលួយអះអាងថា សំឡេងខ្សែអាត់ដែលបែកធ្លាយ គឺពិតជាសម្លេងលោក កឹម សុខា និងស្រីមុំ

នាព្រឹកថ្ងែទី២៤ ខែមីនា ឆ្នាំ២០១៦នេះ លោក ជា សំអាត ប្រធាននាយកដ្ឋានបច្ចេកទេស និង កោសល្យវិច័យ នៃអង្គភាពប្រឆាំងអំពើពុករលួយ បានថ្លែងបញ្ជាក់ប្រាប់ក្រុមអ្នកសារព័ត៌មាន និងចំពោះមុខក្រុមនិស្សិតដែលបានដាក់ពាក្យបណ្តឹងប្តឹងក្នុងសំណុំរឿងអាស្រូវផ្លូវភេទរបស់លោក កឹម សុខា ដោយមន្ត្រីជំនាញរូបនេះ បានអះអាងថា សំឡេងនៅក្នុងខ្សែអាត់ដែលបែកធ្លាយនោះ គឺជាសំឡេងរបស់លោក កឹម សុខា និងស្រីមុំយ៉ាងពិតប្រាកដ។

លោក ជា សំអាត បានបញ្ជាក់ថា សម្លេងក្នុងខ្សែអាត់ដែលបែកធ្លាយ និងសំឡេងខាងក្រៅ (សំដៅលើសំឡេងរបស់លោក កឹម សុខា ) គឺដូចគ្នា ដែលសំឡេងនោះ គឺជាសំឡេងរបស់មនុស្សតែមួយ។

ការបញ្ជាក់នេះធ្វើឡើងនៅក្នុងកិច្ចប្រជុំពិភាក្សា នៅនាយកដ្ឋានបច្ចេកទេស និងកោសល្យវិច័យ នៃអង្គភាពប្រឆាំងអំពើពុករលួយ ដើម្បីប្រកាសលទ្ធផល នៃការធ្វើកោសល្យវិច័យ លើខ្សែអាត់សំឡេង ជាមួយនឹងការប្រកាសថា នឹងបើកការស៊ើបអង្កេតបន្ថែមទៀត នៅពេលខាងមុខជាមួយនឹងតម្រុយការងារស្រាវជ្រាវផ្សេងៗទៀត។

ជាមួយគ្នានេះដែរ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុលរលួយបានឲ្យដឹងថា ACU ប្រកាសទទួលយកពាក្យបណ្តឹងរបស់ក្រុមនិស្សិត ជាមុខការដោយគោរពគោលការណ៍អភ័យ ឯកសិទ្ធិសភា និងបើកឯកសារប្រកាសទ្រព្យសម្បត្តិរបស់លោកកឹម សុខា និងបានសង្កត់ធ្ងន់ថា គ្មានអ្វីមករារាំងអង្គភាពប្រឆាំងអំពើពុករលួយបានទេ។ ជាមួយគ្នានេះ លោកក៏បានបញ្ជាក់យ៉ាងច្បាស់ថា សម្លេងខ្សែអាត់នោះ ជាសម្លេងពិតរបស់តួអង្គនិមួយៗ (កឹម សុខា និងស្រីមុំ) ។

សូមជម្រាបផងដែរថា កាលពីថ្ងៃទី២២ ខែមីនា ឆ្នាំ២០១៦ អង្គភាពប្រឆាំងអំពើពុករលួយ ក៏បានបើកកិច្ចប្រជុំរបស់ខ្លួនមួយរួចមកហើយ ដើម្បីពិភាក្សាបណ្តឹងរបស់ក្រុមយុវជនដែលបានដាក់ពាក្យប្តឹង លោក កឹម សុខា ប្រធានស្តីទីគណបក្សសង្គ្រោះជាតិ ពាក់ព័ន្ធនឹងការប្រព្រឹត្តអំពើពុករលួយ សង្ស័យផ្តល់លុយអោយស្រីស្នេហ៍ទិញដី ទិញផ្ទះផងដែរ ហើយដោយបានបញ្ជា់ថា នៅថ្ងៃទី២៤ ខែមីនា នេះ អង្គភាពប្រឆាំងអំពើពុករលួយនឹងធ្វើសន្និសីទកាសែត ស្តីពីលទ្ធផលនៃការធ្វើកោសល្យវិច័យលើខ្សែអាត់សំឡេងដែលបានបែកធ្លាយនោះ៕

Wednesday, March 23, 2016

សម្តេចតេជោនាយករដ្ឋមន្រ្តី អនុញ្ញាតឲ្យឯកឧត្តម Arkady Dvorkovich ឧបនាយករដ្ឋមន្រ្តី នៃសាធារណរដ្ឋសហព័ន្ធរុស្សី ចូលជូបសំដែងការគួរសម និងពិភាក្សាការងារ

ក្នុងឱកាសនៃ ការស្នាក់អាស្រ័យអញ្ជើញចូលរួមកិច្ចប្រជុំកំពូលមេគង្គ ឡានឆាងលើកទី១ នៅទីក្រុង សាន់យ៉ា ខេត្តហៃណាន ប្រទេសចិននោះដែរ សម្តេចអគ្គមហាសេនាបតីតេជោ ហ៊ុនសែន នាយក រដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឲ្យឯកឧត្តម Arkady Dvorkovich ឧបនាយករដ្ឋមន្រ្តី នៃសាធារណរដ្ឋសហព័ន្ធរុស្សី ចូលជូបសំដែងការគួរសម និងពិភាក្សាការងារ។ ក្នុងជំនួបពិភាក្សាគ្នានោះ សម្តេចតេជោនាយករដ្ឋមន្រ្តី និងឯកឧត្តម Arkady Dvorkovich បានធ្វើកា រពិភាក្សាគ្នាយ៉ាងយកចិត្តទុកដាក់ពីការ ត្រៀមនូវដំណើរបំពេញទស្សនកិច្ចរបស់សម្តេចតេជោនាយករដ្ឋមន្រ្តី ដែលនឹងអញ្ជើញទៅបំពេញទស្សនកិច្ចផ្លូវការ នៅសាធារណរដ្ឋសហព័ន្ធរុស្សីក្នុងខែឧសភាខាងមុខ។

ជាមួយគ្នា នេះសម្តេចតេជោ និងឯកឧត្តម ឧបនាយករដ្ឋមន្រ្តី ក៏បានធ្វើការពិភាក្សាគ្នាយ៉ាងយកចិត្តទុកដាក់ទៅលើការដោះស្រាយបំណុល ដែលកម្ពុជាបានជំពាក់អតីតសហភាពសូវៀតកាលពីពេលកន្លងមក។ សម្តេចតេជោនាយករដ្ឋមន្រ្តីនិងឯកឧត្តម ឧបនាយករដ្ឋមន្រ្តីបានសំដែងនូវការវាយតម្លៃខ្ពស់ ចំពោះក្រុមការងារនៃប្រទេសទាំងពីរដែលបានធ្វើការ ពិភាក្សាគ្នាយ៉ាងយកចិត្តទុកដាក់ពីការដោះស្រាយបំណុល ហើយដែលបានឈានឆ្ពោះទៅមុខ មានលក្ខណៈអំណោយផលជាច្រើន ពោលគឺធ្វើយ៉ាងណាឲ្យបំណុលកម្ពុជាពីអតីតកាល ត្រូវបានដោះស្រាយ ក្នុងពេលឆាប់ៗខាងមុខ តាមរយៈការដោះស្រាយលើការវិនិយោគក្នុងប្រទេសកម្ពុជា ដែលជាដំណោះស្រាយមួយស្របតាមកិច្ចព្រៀមព្រៀងសន្តិភាពទីក្រុងប៉ារីស។ សម្តេចតេជោនាយករដ្ឋមន្រ្តីមានប្រសាសន៍ បញ្ជាក់ថា អ្វីដែលរូបសម្តេចនិងប្រជាជនកម្ពុជាចង់បាននោះគឺ ការខិតខំដោះស្រាយបំណុលទាំងអស់នោះ ឲ្យបានឆាប់បំផុត តាមដែលអាចធ្វើទៅបាន។ ជាការឆ្លើយតប ឯកឧត្តម Arkady Dvorkovich មានប្រ សាសន៍ថា ប្រទេសរុស្សីមានការចាប់អារម្មណ៍យ៉ាងខ្លាំង ចំពោះដំណោះស្រាយបំណុលរបស់កម្ពុជា តាម រយៈការប្រែក្លាយបំណុលមកការវិនិយោគ ហើយដែលភាគីទាំងពីរត្រូវបន្តពិភាក្សាគ្នាជាលំអិតទៅទៀត រួម ទាំងបញ្ហាបច្ចេកទេសផងដែរ។ ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តីមានប្រសាសន៍ លើកឡើងពីលទ្ធភាព នៃការដោះស្រាយបំណុល តាមរយៈការជួយទិញកសិផលរបស់កម្ពុជានាំចូលទៅកាន់ប្រទេសរុស្សី។

សម្តេចតេជោនា យករដ្ឋមន្រ្តីមានប្រសាសន៍ដែរថា ដោយសារតែកំណើននៃភ្លៀវទេសចរ រុស្សីបានធ្វើដំណើរមកកាន់ប្រទេសកម្ពុជាជាង១០ម៉ឺននាក់ ដែលភាគច្រើនពួកគេធ្វើដំណើរតាមប្រទេសជិត ខាងនោះ កម្ពុជាស្នើដល់ភាគីរុស្សីបើកឲ្យមានការហោះហើរត្រង់ពីរុស្សីមកកាន់កម្ពុជា ដើម្បីជំរុញកំណើន ទេសចរណ៍ និងពង្រីកកិច្ចសហប្រតិបត្តិការលើវិស័យទេសចរណ៍នៃប្រទេសទាំងពីរ ឲ្យកាន់តែមានសក្តានុពលខ្ពស់ថែមទៀត។ នៅក្នុងកិច្ចពិភាក្សាគ្នានោះដែរ សម្តេចតេជោនាយករដ្ឋមន្រ្តី និងឯកឧត្តម Arkady Dvorkovich ក៏បានធ្វើការពិភាក្សាគ្នាយ៉ាងយកចិត្តទុកដាក់ ក្នុងការពង្រីកកិច្ចសហប្រតិបត្តិការក្នុងក្រប ខណ្ឌអាស៊ាន និងរុស្សី ដែលសារតែបច្ចុប្បន្នរុស្សីគឺជាដៃគូចរចាររបស់អាស៊ាន សំដៅធ្វើយ៉ាងណាជំរុញឲ្យ មានកិច្ចប្រជុំកំពូលអាស៊ាន រុស្សី កើតឡើងក្នុងពេលអនាគត។ ជាមួយគ្នានេះសម្តេចតេជោ និងឯកឧត្តម ឧបនាយករដ្ឋមន្រ្តី ក៏បានធ្វើការពិភាក្សាពីបញ្ហាតំបន់និងអន្តរជាតិដែលប្រទេសទាំងពីរ កំពុងមានការយកចិត្តទុកដាក់ដូចគ្នា។

អាជ្ញាធរជាតិព្រះវិហារ និងអាជ្ញាធរខេត្តព្រះវិហារ ច្រានចោលការឃោសនាអកុសលរបស់ជន ខិលខូច មួយចំនួន រួមទាំងវិទ្យុអាស៊ីសេរី ជុំវិញបញ្ហារបស់ប្រជាពលរដ្ឋភូមិស្វាយជ្រុំ

អាជ្ញាធរជាតិព្រះវិហារ ដែលមានលោក គង់ ពុទ្ធិកា ជាប្រធាន និងអាជ្ញាធរខេត្តព្រះវិហារ ដែលចុះហត្ថលេខាលោក សុខ ហៃ អភិបាលរងខេត្ត បានចេញសេចក្តីប្រកាសព័ត៌មានរួមមួយ ចុះថ្ងៃទី២២ ខែមីនា ឆ្នាំ២០១៦ ដោយបានធ្វើការបំភ្លឺចំពោះការផ្សព្វផ្សាយរបស់វិទ្យុអាស៊ីសេរីកាលពីថ្ងៃទី១៧ ខែមីនា ឆ្នាំ២០១៦ថា ប្រជាពលរដ្ឋដែលធ្លាប់នៅចំណុចស្វាយជ្រុំនឹងអាចវិលត្រលប់មករស់នៅចំណុចស្វាយជ្រុំ ដែលស្ថិតនៅតំបន់អភិរក្សប្រសាទព្រះវិហារវិញ គឺអាជ្ញាធរទាំងពីរនេះ បានហៅការចុះផ្សាយនោះថាជារឿងប្រឌិតទាំងស្រុង។

សេចក្តីប្រកាសព័ត៌មានបានបញ្ជាក់ថា យោងតាមរយៈលិខិតលេខ ១១២ ស.ជ.ណ. ចុះថ្ងៃទី២០ ខែមករា ឆ្នាំ២០១៦ របស់សម្តេចក្រឡាហោម ស ខេង ស្តីពីសំណើសុំជួយរកដំណោះស្រាយឲ្យបានវិលត្រឡប់ទៅរស់នៅក្នុងភូមិស្វាយជ្រុំ ឬភូមិឬស្សី ឃុំកន្ទួត ស្រុកជាំក្សាន្ត ខេត្តព្រះវិហារវិញ ជម្រាបជូនឯកឧត្តមឧបនាយករដ្ឋមន្ត្រី និងជាប្រធានអាជ្ញាធរជាតិដោះស្រាយទំនាស់ដីធ្លី គឺជានីតិវិធីបញ្ជូនសុំណុំរឿងរបស់ក្រសួងមហាផ្ទៃទៅអាជ្ញាធរជាតិដោះស្រាយទំនាស់ដីធ្លី ពុំមែនជាការសម្រេចរបស់ក្រសួងមហាផ្ទៃឡើយ ហើយទីតាំងនេះត្រូវបានគ្រប់គ្រងដោយព្រះរាជក្រឹត្យលេខ នស/រកត/០៨១១/៧៥២ ចុះថ្ងៃទី១០ ខែសីហា ឆ្នាំ២០១១ ស្តីពីការកំណត់រមណីយដ្ឋានព្រះវិហារ។

សេចក្តីប្រកាសព័ត៌មានបានបន្តថា ករណីនេះផងដែរ ក៏បានទទួលការបញ្ជាក់ពីគណៈកម្មាធិការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា-ព្រឹទ្ធសភារួចហើយ តាមរយៈលិខិតលេខ ២៩៩ រស.គ១ ចុះថ្ងៃទី០៨ ខែមេសា ឆ្នាំ២០១៨ ដែលប្រជាពលរដ្ឋយល់ព្រមព្យួរការតវ៉ាទាមទារ និងព្រមទទួលយកការដោះស្រាយគោលនយោបាយរបស់អាជ្ញាធរខេត្តព្រះវិហារហើយ។ ចំពោះប្រជាពលរដ្ឋដែលបានផ្ទេរពីតំបន់ស្វាយជ្រុំមករស់នៅក្នុងភូមិធម្មជាតិសម្តេចតេជោ ហ៊ុន សែន អាជ្ញាធរមានសមត្ថកិច្ចក៏បាននឹងបន្តដោះស្រាយតាមគោលនយោបាយរបស់រាជរដ្ឋាភិបាលក្នុងការប្រគល់ដីលំនៅដ្ឋាន និងដីកសិកម្ម សម្រាប់ការតាំងទីលំនៅថ្មីនេះ មានហេដ្ឋារចនាសម្ព័នល្អប្រសើររួមមានផ្លូវថ្នល់ សាលារៀន មន្ទីរពេទ្យ វត្តអារាម សាលាបណ្តុះបណ្តាលវិជ្ជាជីវៈ ទំនប់ទឹក និងរចនាសម្ព័ន្ធជាច្រើនផ្សេងទៀត។
អាជ្ញាធរព្រះវិហារ និងអាជ្ញាធរខេត្តព្រះវិហា ក៏បានថ្កោលទោសរាល់សកម្មភាពអគតិ និងការបំភ្លៃរបស់ជនខិលខូចទាំងឡាយណា ដែលមានបំណងបង្ខូចតំលៃលេចធ្លោជាសកលរបស់បេតិកភណ្ឌពិភពលោក និងបានសំណូមពរដល់បណ្តាញសារព័ត៌មានទាំងអស់ មេត្តាបន្តផ្សព្វផ្សាយព័ត៌មាន ដែលផ្តល់ភាពវិជ្ជមានដល់សង្គមជាតិ និងរក្សាតំលៃសនតិភាពនៅតំបន់ព្រំដែនប្រាសាទព្រះវិហារដែលយើងទទួលបានក្រោមការដឹកនាំរបស់រាជរដ្ឋាភិបាលកម្ពុជា។
សូមអានខ្លឹមសារ នៃសេចក្តីប្រកាសព័ត៌មានទាំងស្រុងដូចតទៅ៖

Friday, March 18, 2016

អនុប្រធានទី១ក្រុមប្រឹក្សាសហព័ន្ធនៃសភារុស្ស៊ី៖ នយោបាយឈ្នះៗរបស់សម្ដេចតេជោ បាននាំមកនូវសន្ដិភាព ស្ថិរភាព និងការអភិវឌ្ឍន៍ នៅកម្ពុជា

នៅល្ងាចថ្ងៃទី១៧ ខែមីនានេះ សម្ដេចតេជោ ហ៊ុន សែននាយករដ្ឋមន្រ្ដី បានអនុញ្ញាតិឲ្យឯកឧត្ដម នីកូឡាយ ហ្វីដូរ៉ូ (Nikolay Fedorov) អនុប្រធានទី១ក្រុមប្រឹក្សាសហព័ន្ធនៃសភារុស្ស៊ី ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព។

ឯកឧត្ដម អ៊ាង សុផល្លែត ជំនួយការផ្ទាល់សម្ដេចតេជោ មានប្រសាសន៍ប្រាប់អ្នកសារព័ត៌មានក្រោយជំនួបនោះ ថា ឯកឧត្ដម នីកូឡាយ ហ្វីដូរ៉ូ បាន គោរពជម្រាបជូនសម្ដេចតេជោថា សហព័ន្ធរុស្ស៊ីបានគោរពសម្ដេចថា ចំពោះការងារ ដែលសម្ដេចបានធ្វើបម្រើប្រទេសជាតិប្រកបប្រសិទ្ធភាព ហើយនយោបាយឈ្នះៗ របស់សម្ដេចតេជោ បាននាំនូវសន្ដិភាព ស្ថិរភាព និងការអភិវឌ្ឍន៍។

ឯកឧត្ដម នីកូឡាយ ហ្វីដូរ៉ូ បានសង្កេត ឃើញថា ការកសាងសំណង់នានានៅរាជធានីភ្នំពេញ កំពុងមានសកម្មភាពយ៉ាងសកម្ម ដែលនេះបានបង្ហាញពីសក្ខីភាពនៃការដឹកនាំដ៏ឈ្លាសវៃ និងដ៏ឆ្នើមរបស់សម្ដេចតេជោនាយករដ្ឋមន្រ្ដី។ ឯកឧត្ដមមានប្រសាសន៍ថា ដំណើរទស្សនកិច្ចរបស់ឯកឧត្ដម មកកាន់ប្រទេសកម្ពុជានាពេលនេះ គឺមានទិសដៅដើម្បីពង្រឹងបន្ថែមនូវកិច្ចសហប្រតិបត្ដិការរវាងប្រទេស ទាំង២ ក៏ដូចជាជំរុញនូវកំណើនពាណិជ្ជកម្មនៃប្រទេសទាំង២ ឲ្យបានកាន់តែខ្ពស់ថែមទៀត។ លើសពីនេះទៀត ក្នុងនាមឯកឧត្ដមជាអតីតរដ្ឋមន្រ្ដីក្រសួងកសិកម្មនោះ ឯកឧត្ដម នីកូឡាយ នឹងខិតខំឲ្យអស់ពីសមត្ថភាពធ្វើយ៉ាងណាជួយសម្រួលលក្ខខណ្ឌអនុគ្រោះ ក្នុងការនាំទំនិញកសិផលកម្ពុជា ទៅកាន់សហព័ន្ធរុស្ស៊ី។

បន្ថែមពី លើនេះទៀត ឯកឧត្ដមនឹងជំរុញឲ្យមានការសហការផ្ដល់នូវអាហារូបករណ៍ ដល់យុវជនឲ្យទៅសិក្សានៅសហព័ន្ធរុស្ស៊ីផងដែរ។ ជាការឆ្លើយតបសម្ដេចតេជោ ហ៊ុន សែននាយករដ្ឋមន្រ្ដី បានថ្លែងអំណរគុណ ដល់អតីតសហភាពសូវៀត ដែលសព្វថ្ងៃនេះជាសហព័ន្ធរុស្ស៊ី ដែលជួយកម្ពុជានៅពេលជួបការលំបាក កាលពីអតីតកាល។ សម្ដេចតេជោបានមានប្រសាសន៍ ថា អតីតសហភាពសូវៀត បានជួយកម្ពុជា ក្នុងការស្ថាបនាឡើងនូវខឿនសេដ្ឋកិច្ច ហើយក៏បានជួយដល់កម្ពុជា ក្នុងការបណ្ដុះបណ្ដាលធនធានមនុស្សផងដែរ។

សម្ដេចតេជោ បានមានប្រសាសន៍បន្ដថា យើងត្រូវនាំគ្នាពិចារណា និងរិះរកវិធី ធ្វើយ៉ាងពង្រីកកិច្ចសហប្រតិបត្ដិការ លើវិស័យណា ដែលយើងអាចធ្វើបានរវាងប្រទេសយើងទាំង២ ហើយសម្ដេចក៏បានថ្លែងអំណរគុណ ជូនចំពោះឯកឧត្ដមនីកូឡាយ ដែលបានបង្កលក្ខណៈងាយស្រួល អនុគ្រោះ ក្នុងការនាំទំនិញកសិផលពីប្រទេសកម្ពុជា ទៅកាន់សហព័ន្ធរុស្ស៊ី។ សម្ដេចតេជោ បានមានប្រសាសន៍បន្ថែមទៀតថា សព្វថ្ងៃនេះភ្ញៀវទេសចរណ៍រុស្ស៊ីយ៉ាងច្រើនបានមកកាន់ប្រទេសកម្ពុជា តាមរយៈប្រទេសដទៃទៀត ក្នុងន័យនេះសម្ដេចតេជោ បានលើកឡើងថា ការបង្កើតឲ្យមានការហោះហើរត្រង់ ពីរុស្ស៊ី មកកម្ពុជាគឺជាការចាំបាច់ ហើយថាសម្ដេចតេជោ បានថ្លែងជាទូទៅ ដោយសម្ដែងនូវការរីករាយ ក្នុងការពង្រីកកិច្ចសហប្រតិបត្ដិការ និងទំនាក់ទំនងនៃប្រទេសទាំង២ ឲ្យកាន់តែទូលាយ និងស៊ីជម្រៅ បន្ថែមទៀត៕

ជំនួបរវាងឧបនាយករដ្ឋមន្ត្រី សុខ អាន ជាមួយរដ្ឋមន្រ្តី ក្រសួងនីតិកម្មនៃសាធារណរដ្ឋកូរ៉េ

ទទួលជំនួបពិភាក្សាការងារជាមួយ ឯកឧត្តម ជុង ប៊ូ (Jeong –Boo) រដ្ឋមន្រ្តី ក្រសួងនីតិកម្មនៃសាធារណរដ្ឋកូរ៉េ នាព្រឹកថ្ងៃទី១៧ មីនានេះ ឯកឧត្ដមឧបនាយករដ្ឋមន្ត្រី សុខ អានរដ្ឋមន្រ្តី ទទួលបន្ទុកទីស្តីការគណៈរដ្ឋមន្រ្តី បានបង្ហាញនូវបំណងចង់ឱ្យមានកិច្ចសហបតិបត្តិការ ទទួល បទពិសោធន៍ផ្នែកនីតិកម្មពីសាធារណរដ្ឋកូរ៉េ តាមរយៈប្រព័ន្ធបច្ចេកវិទ្យាព័ត៌មានវិទ្យា(IT) ។

ឯកឧត្ដម ឧបនាយករដ្ឋមន្ត្រី គូសបញ្ជាក់ថាក្រុមប្រឹក្សាអ្នកច្បាប់ នៃទីស្ដីការគណៈរដ្ឋមន្ត្រី បានដើរតួនាទីសំខាន់ នៅក្នុងការជួយពិនិត្យឡើងវិញនូវពង្រាងច្បាប់បទដ្ឋានគតិយុត្តទាំងឡាយ ហើយ ដោយសាធារណរដ្ឋកូរ៉េ ដែលពូកែខាងបច្ចេកវិទ្យាព័ត៌មានវិទ្យា និងដោយបច្ចុប្បន្ន វិស័យព័ត៌មានវិទ្យា អាចជួយសម្រួលការងារផ្នែកនីតិកម្ម ខាងផ្លូវច្បាប់បានច្រើននោះ ដូច្នេះ កម្ពុជា ចង់សិក្សាបទពិសោធន៍ ពីសាធារណរដ្ឋកូរ៉េ ថាតើព័ត៌មានវិទ្យា អាចជួយដល់កិច្ចការផ្នែកនីតិកម្មដូចម្ដេចខ្លះ ដើម្បីឱ្យកម្ពុជាមានការរីកចម្រើនផ្នែកគតិយុត្ត តាមរយៈការប្រើប្រាស់ព័ត៌មានវិទ្យា។

នៅក្នុងកិច្ចការនេះ ឯកឧត្ដមឧបនាយករដ្ឋមន្ត្រី សុំឱ្យមានក្រុមការងារប្រទេសទាំងពីរ ដើម្បីធ្វើការជាមួយទីភ្នាក់ងារ កយកា (KOICA) របស់កូរ៉េ ដែលមានវត្តមាននៅកម្ពុជា ដើម្បី ឱ្យផ្នែកនីតិកម្មរបស់សាធារណរដ្ឋកូរ៉េ អាចធ្វើសហប្រតិបត្តិការ តាមរយៈប្រព័ន្ធព័ត៌មានវិទ្យា ជាមួយ ក្រុមប្រឹក្សាអ្នកច្បាប់កម្ពុជា នៃទីស្ដីការគណៈរដ្ឋមន្ត្រី ។

នៅក្នុង ជំនួបនេះក៏បានពិភាក្សាផងដែរផ្ដោតលើកិច្ចសហប្រតិបត្តិការ ក្នុងវិស័យដទៃៗទៀត ផងដែរ ក្នុងនោះសម្រាប់គោលបំណងដែលកម្ពុជាចង់នាំផ្លែស្វាយទៅកាន់សាធារណ រដ្ឋកូរ៉េ ភាគីកូរ៉េ បានចាប់អារម្មណ៍ ហើយអះអាងថា នឹងជួយសម្រួលដល់ការនាំចេញ ផ្លែស្វាយ របស់កម្ពុជា ទៅកាន់ កូរ៉េ នាពេលខាងមុខនេះ ៕

Thursday, March 17, 2016

ការរក្សាសុខសន្តិភាព គឺជាលក្ខខណ្ឌមិនអាចខ្វះបានសំរាប់ការអភិវឌ្ឍន៍ជាតិ

យោងតាមទំព័រហ្វេសប៊ុករបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលមាន ឈ្មោះថា Samdech Hun Sen, Cambodian Prime Minister បង្ហោះផ្សាយនៅថ្ងៃទី១៧ ខែមីនា ឆ្នាំ២០១៦ នេះបានឱ្យដឹងថា សម្តេចតេជោ បានផ្ញើសាររំលឹកដល់ថ្ងៃរដ្ឋប្រហារយោធាទម្លាក់ សម្តេចព្រះនរោត្តមសីហនុ និងផលវិបាកនៃសង្រ្គាមស៊ីវិល។

សម្តេចតេជោ បានលើកឡើងថា ថ្ងៃស្អែកគឺជាខួប ៤៦ ឆ្នាំ នៃរដ្ឋប្រហារយោធាទម្លាក់ សម្តេចព្រះនរោតម្ត សីហនុ ពីសំណាក់ពួក លន់ នុល (១៨ មិនា ១៩៧០-១៨មិនា ២០១៦)។ផ្តើមពី រដ្ឋប្រហារយោធានេះហើយ ដែលកម្ពុជាយើងធ្លាក់ចូលទៅក្នុងភ្នក់ភ្លើងសង្គ្រាម និងបន្ទាប់មកធ្លាក់ចូលទៅក្នុងរបបប្រល័យពូជសាសន៍ ប៉ុល ពត។ សង្គ្រាមបានដាក់មនុស្សគ្រប់រូប ពិសេសយុវជន ឱ្យស្ថិតនៅជាចំណាប់ខ្មាំង នៃសង្គ្រាមដែលគ្មានផ្លូវទី៣សំរាប់ជ្រើសរើសនោះទេ។ ស្ថិតនៅតំបន់ណា ត្រូវធ្វើទាហាន ឬបំរើឱ្យរបបគ្រប់គ្រងនៃតំបន់នោះ។

សម្តេចតេជោ ហ៊ុន សែន បានមានប្រសាសន៍បន្ថែមទៀតថា មានមនុស្សត្រូវស្លាប់ របួស ពិការយ៉ាងច្រើន និងខូចខាតទ្រព្យសម្បត្តិស្ទើរគ្មានសល់។ មកដល់របប ប៉ុល ពត របបនេះបានបំផ្លិចបំផ្លាញដល់ប្ញសគល់ជាមួយនឹងការស្លាប់ជីវិតមនុស្សរាប់លាននាក់។ សម្តេចតេជោ បានគូសបញ្ជាក់ថា ប្រទេសកម្ពុជាយើងបានប្រឹងរស់ ប្រឹងតស៊ូ ដើម្បីការរស់រានមានជីវិតរបស់ជាតិ និងប្រជាជន។ រាជរដ្ឋាភិបាលក៏បានខិតខំកសាងជាតិឡើងវិញជាមួយនឹងការខិតខំស្វែងរកសន្តិភាពតាមរយះកិច្ចព្រមព្រៀងក្រុងប៉ារីស និងចុងក្រោយតាមរយៈនយោបាយឈ្នះ-ឈ្នះ។

សម្តេចតេជោ បានមានប្រសាសន៍ថា ទោះបីសម្តេចជាជនរងគ្រោះនៃរដ្ឋប្រហារ នៃសង្គ្រាម និងរបបប្រល័យពូជសាសន៍ដូចប្រជាជនកម្ពុជាផ្សេងទៀតរហូតក្លាយខ្លួនជាជនពិការក្តី ក៏ប៉ុន្តែសម្តេច មានមោទនៈភាពដោយបានរួមចំណែកដឹកនាំប្រទេសពីសង្គ្រាមមកកាន់សន្តិភាព និងការអភិវឌ្ឍន៍រហូតសព្វថ្ងៃ។ សម្តេចតេជោ ហ៊ុន សែន ក៏បានអំពាវនាវឱ្យប្រជាជនកម្ពុជា រួបរួមជាមួយរាជរដ្ឋាភិបាល ថែរក្សាសន្តិភាពដែលយើងរកបានទាំងលំបាកឱ្យបានគង់វង្ស ដែលជាលក្ខខណ្ឌមិនអាចខ្វះបានសំរាប់ការអភិវឌ្ឍន៍៕