សម្តេចតេជោ ហ៊ុន សែន ៖ គោលដៅអាស៊ាន “ចក្ខុវិស័យមួយ អត្តសញ្ញាណមួយ និងសហគមន៍មួយ” ដើម្បីសម្រេចជោគជ័យអាស៊ានត្រូវរួមគ្នា “ដោះស្រាយបញ្ហាប្រឈមទាំងអស់គ្នា”

សម្តេចតេជោ ហ៊ុន សែន ថ្លែងថា កិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ាន ពិតជាមានសារៈសំខាន់សម្រាប់យើងក្នុងការវាយតម្លៃវឌ្ឍនភាព កំណត់បញ្ហាប្រឈម កាលានុវត្តភាព និងកិច្ចការពាក់ព័ន្ធនានា ដើម្បីស្តារ និងពន្លឿនកិច្ចសហការអភិវឌ្ឍសង្គម-វប្បធម៌អាស៊ានក្រោយវិបត្តិនៃជំងឺកូវីដ១៩។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន បានថ្លែងបែបនេះ នៅថ្ងៃទី ១៣ ខែតុលា ឆ្នាំ២០២២ ក្នុងឱកាសអញ្ជើញជាអធិបតីភាពបើកកិច្ចប្រជុំក្រុមប្រឹក្សាសហគមន៍ សង្គម-វប្បធម៌អាស៊ានលើកទី២៨។

សម្តេចតេជោ ហ៊ុន សែន បានថ្លែងបន្តថា អាស៊ានគឺជាសហគមន៍ពហុវប្បធម៌ដែលតម្រូវឱ្យយើងខិតខំរួបរួមគ្នាក្នុងភាពចម្រុះសំដៅសម្រេចបាននូវការយល់ដឹងឱ្យបានកាន់តែទូលំទូលាយជាងមុន ក្នុងចំណោមប្រជាពលរដ្ឋរបស់យើង ជាពិសេសយុវជនអាស៊ាន ដើម្បីលើកកម្ពស់់ភាពធន់ និងការយោគយល់គ្នា ស្របតាមស្មារតីស្នូលរបស់អាស៊ាន “ចក្ខុវិស័យមួយ អត្តសញ្ញាណមួយ និងសហគមន៍មួយ” ដើម្បីសម្រេចបាននូវគោលដៅនេះ ក្នុងនាមប្រធានអាស៊ាន ឆ្នាំ២០២២ កម្ពុជា បានកំណត់មូលបទ “អាស៊ានរួមគ្នាធ្វើ ដោះស្រាយបញ្ហាប្រឈមទាំងអស់គ្នា”៕