អភិបាលរងខេត្តស្វាយរៀង បាននាំយកទេយ្យទាន ប្រគេនដល់ព្រះសង្ឃសម្រាប់ត្រៀមចូលព្រះវស្សា ចំនួន៥វត្ត

ស្វាយរៀង៖ ថ្ងៃទី១៧ ខែកក្កដា ឆ្នាំ២០២១ លោក តូច ប៉ូលីវ៉ា អភិបាលរងខេត្តតំណាង អភិបាលខេត្ត និង លោក ជិន ប៊ុនធឿន តំណាង លោក ឌី វិជ្ជា និងលោកស្រី ហ៊ុន ម៉ាណា ដែលមានការចូលរួមពី លោក រាណ សុវណ្ណារិទ្ធិ សមាជិកក្រុមប្រឹក្សាខេត្ត លោក សុខា រាម អភិបាលស្រុករំដួល បាននាំយកទេយ្យទាន សម្ភារ និងថវិកា ដែលជាអំណោយរបស់អ្នកឧកញ៉ាព្រឹទ្ធមហាឧបាសិកាធម្មញ្ញាណវឌ្ឍនា ប៊ុន ស៊ាងលី មកប្រគេនដល់ព្រះសង្ឃសម្រាប់ត្រៀមចូលព្រះវស្សា ចំនួន៥វត្ត នៅក្នុងស្រុករំដួល រួមមាន វត្តពោធ៍មុន្នី (ឃុំស្វាយចេក) វត្តជ័យមុន្នី (ឃុំម៉ឺនជ័យ) វត្តធ្នង់ (ឃុំថ្នាធ្នង់) វត្តបុសមន (ឃុំបុសមន) វត្តសេកមាស(ឃុំពងទឹក)។

ក្នុងឱកាសនោះដែរ លោក តូច ប៉ូលីវ៉ា ផ្ដាំផ្ញើរសួរសុខទុក្ខពីសំណាក់ លោក ឌី វិជ្ជា និងលោកស្រី ហ៊ុន ម៉ាណា និងណែនាំដល់ព្រះសង្ឃ គណៈកម្មការអាចារ្យវត្ត ត្រូវអនុវត្តអោយបានខ្ជាប់ខ្ជួននូវវិធានការ ៣ការពារ និង៣កុំ របស់ក្រសួងសុខាភិបាល និងជួយផ្សព្វផ្សាយដល់ពុទ្ធបរិស័ទ្ធចំណុះជើងវត្តត្រូវមានការប្រុងប្រយ័ត្ន ត្រូវពាក់ម៉ាស់  លាងសម្អាតដៃជាមួយជែល ឬ សាប៊ូ និង រក្សាគម្លាត៕