លោកនាយករដ្ឋមន្រ្តី ហ៊ុន សែន៖ អ្នកវិភាគដែលមិនស្ថិតលើទស្សនៈប្រវត្តិសាស្រ្ត គឺជាការវិភាគតាមបែបល្ងង់ខ្លៅ

លោកនាយករដ្ឋមន្រ្តី ហ៊ុន សែន បានថ្លែងថា អ្នកវិភាគទាំងឡាយណាកដែលមិនស្ថិតលើទស្សនៈប្រវត្តិសាស្រ្តនោះទេទោះបីជាបណ្ឌិតប៉ុណ្ណាក៏ដោយ គឺជាការវិភាគតាមបែបល្ងង់ខ្លៅដែលលោកបានហៅថា «ល្ងង់ទូ»។ លោកបានថ្លែងដូចនេះ នៅព្រឹកថ្ងៃទី២២ ខែមករា ឆ្នាំ២០២១ ក្នុងពិធីសម្ពោធសមិទ្ធផលថ្មីរបស់ ក្រសួងសាធារណការ និងដឹកជញ្ជូន រួមមានអគារទីស្តីការថ្មី និងវិទ្យាស្ថាន «តេជោសែន សាធារណការ និងដឹកជញ្ជូន»។

លោកនាយករដ្ឋមន្រ្តី ហ៊ុន សែន បានមានប្រសាសន៍ថា អ្នកវិភាគមួយចំនួន មិនដែលបានទទួលស្គាល់នូវការលំបាករបស់កម្ពុជា មិនទទួលស្គាល់ការរំដោះជាតិចេញពីរបបប្រល័យពូជសាសន៍ មិនទទួលស្គល់នយោបាយឈ្នះឈ្នះ គឺជ្រើសរើសយកតែមុំបច្ចុប្បន្នមកធ្វើការវិភាគ ដែលមិនសមហេតុសមផលទាល់តែសោះ។

លោកនាយករដ្ឋមន្រ្តី ហ៊ុន សែន ក៏បានគូសបញ្ជាក់ថា សម្រាប់រូបលោកក្នុងការវិភាគអំពីស្ថានភាពនយោបាយជាតិ និងអន្តរជាតិ លោកតែងតែឈរលើវិធីសាស្រ្ត៣យ៉ាងជានិច្ចគឺ៖ ទី១- វិធីសាស្រ្ត ប្រវត្តិសាស្រ្ត ទី២- វិធីសាស្រ្តវិចារវិទ្យា និងទី៣- វិធីសាស្រ្តតក្កវិទ្យា៕