លោកនាយករដ្ឋមន្ត្រី ហ៊ុន សែន៖ ដើម្បីលើកកម្ពស់ជីវភាពប្រជាជន ចាំបាច់ត្រូវតែអភិវឌ្ឍ

 លោកនាយករដ្ឋមន្ត្រី ហ៊ុន សែន បានថ្លែងថា មានជនអគតិមួយចំនួនបានរិះគន់ទៅលើការអភិវឌ្ឍនៅក្នុងប្រទេសកម្ពុជា ដូចជាចោទប្រកាន់ថា លុបបឹង បួរ នាំឱ្យមានគ្រោះទឹកជំនន់។ លោកបានថ្លែងនៅព្រឹកថ្ងៃទី២២ ខែមករា ឆ្នាំ២០២១ ក្នុងពិធីសម្ពោធសមិទ្ធផលថ្មីរបស់ ក្រសួងសាធារណការ និងដឹកជញ្ជូន រួមមានអគារទីស្តីការថ្មី និងវិទ្យាស្ថាន «តេជោសែន សាធារណការ និងដឹកជញ្ជូន»។

លោកនាយករដ្ឋមន្ត្រី ហ៊ុន សែន បានថ្លែងថា ជំនាន់មុនលុប បឹង បួរ ជាឧទាហរណ៍ បឹងកេងកង និងបឹងផ្សេងៗទៀត ដើម្បីពង្រីកទំហំដី សាងសងអាគារ ចុះហេតុអ្វីជំនាន់នេះ លុបបឹងមិនបាន ដើម្បីការអភិវឌ្ឍ។ លោកនាយករដ្ឋមន្ត្រី បានបន្តថា បើប្រៀបធៀបទៅបណ្តាប្រទេសដទៃទៀត គឺមានការលុបទៅដល់សមុទ្រផង ចុះហេតុអ្វីកម្ពុជា ធ្វើមិនបាន? អ្នកដែលរិះគន់រាជរដ្ឋាភិបាល ក្នុងការលុបបឹង ជាការច្រណែន មកលើការអភិវឌ្ឍកម្ពុជាឬ?

លោកនាយករដ្ឋមន្ត្រី ហ៊ុន សែន បានជំរុញអោយវិស័យឯកជន និងរដ្ឋ រួមគ្នាអភិវឌ្ឍ កសាងប្រទេសដើម្បីលើកកម្ពស់ជីវភាពប្រជាជនឱ្យមានការរីកចម្រើន ហើយប្រទេសជាតិ ក៏កាន់តែអភិវឌ្ឍថែមទៀតផង៕