លោកនាយករដ្ឋមន្រ្តី ហ៊ុន សែន អញ្ជើញជួបពិភាក្សាការងារជាមួយឯកអគ្គរដ្ឋទូតអូស្ត្រាលីដែលត្រូវចប់បេសកកម្មកាទូតនៅកម្ពុជា

នៅវិមានសន្តិភាព នាព្រឹកថ្ងៃចន្ទ ទី០២ ខែធ្នូ ឆ្នាំ២០១៩នេះ លោកនាយករដ្ឋមន្រ្តី ហ៊ុន សែន បានទទួលជួបពិភាក្សាការងារជាមួយលោកស្រី Angela Corcoran ឯកអគ្គរដ្ឋទូតអូស្ត្រាលី ប្រចាំនៅព្រះរាជាណាចក្រកម្ពុជា ដែលត្រូវបានបញ្ចប់បេសកកម្មកាទូតនៅព្រះរាជាណាចក្រកម្ពុជា។

លោកស្រី Angela Corcoran បានគោរពសម្ដែងនូវការអរគុណយ៉ាងជ្រាលជ្រៅជាទីបំផុតជូនចំពោះលោកនាយករដ្ឋមន្រ្តី ដែលលោកបានចំណាយពេលវេលាជួបពិភាក្សាការងារជាមួយលោកស្រីនាពេលនេះ មុននឹងលោកស្រីចាកចេញពីព្រះរាជាណាចក្រកម្ពុជា។ នៅក្នុងជំនួបនេះ លោកស្រី Angela Corcoran បានគោរពជូនពរដល់អ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ដែលត្រូវជាមាតាក្មេករបស់លោកនាយករដ្ឋមន្រ្តី សូមឱ្យអ្នកឧកញ៉ា បានជាសះស្បើយពេលដ៏ឆាប់ខាងមុខនេះ។ ជាមួយនោះដែរលោកស្រីក៏បានសម្ដែងនូវអំណរគុណចំពោះ រាជរដ្ឋាភិបាលកម្ពុជា ដែលបានបំពាក់មេដាយ ជូនលោកស្រីសម្រាប់ការចូលរួមចំណែកក្នុងការអភិវឌ្ឍកម្ពុជា ជាពិសេសលើវិស័យដោះមីននោះ។ ជាថ្មីម្តងទៀត លោកស្រីក៏បានសម្ដែងនូវអំណរសាទរយ៉ាងខ្លាំងដល់កម្ពុជាដែលបានទទួលការអភិវឌ្ឍយ៉ាងឆាប់រហ័សជាទីបំផុតក្នុងរយៈពេលប៉ុន្មានឆ្នាំចុងក្រោយនេះ។ លោកស្រី Angela Corcoran បានអញ្ជើញមកកម្ពុជាកាលពីឆ្នាំ១៩៩៣ និង១៩៩៤ ដោយពេលនោះលោកស្រីបានមានប្រសាសន៍ថា កាលពីឆ្នាំនោះទីក្រុងភ្នំពេញ គឺជាទីក្រុងដែលមិនមានមនុស្សរស់នៅច្រើនទេ ក៏ប៉ុន្តែពេលនេះ លោកស្រីមានការភ្ញាក់ផ្អើល ហើយក៏បានកត់សំគាល់ឃើញថា កម្ពុជាពេលនេះមានការអភិវឌ្ឍគួរជាទីមោទនៈជាទីបំផុត។ លើសពីនេះទៀត លោកស្រីក៏បានសម្តែងនូវការសប្បាយរីករាយដែលប្រទេសអូស្ត្រាលីបានចូលរួមចំណែកក្នុងការអភិវឌ្ឍកម្ពុជាឲ្យមានការរីកចំរើនរហូតដល់ថ្ងៃនេះ។

លោកស្រីក៏បានជម្រាបជូនលោកនាយករដ្ឋមន្រ្តីផងដែរថា រដ្ឋាភិបាលអូស្ត្រាលីបានត្រៀមខ្លួនជាស្រេចក្នុងការបន្តជួយ និងចូលរួមចំណែកក្នុងការជំរុញ និងពង្រីកពាណិជ្ជកម្ម សេដ្ឋកិច្ចកម្ពុជាឱ្យកាន់តែរឹងមាំនិងធំធាត់ថែមទៀត ហើយក៏ត្រៀមជាស្រេចក្នុងការជំរុញកិច្ចសហប្រតិបត្តិការ ជាពិសេសរវាងយុវជននិងយុវជននៃប្រទេសយើងទាំងពីរផងដែរ។

ជាការឆ្លើយតប លោកនាយករដ្ឋមន្ត្រី បានថ្លែងអំណរគុណចំពោះការជូនពរដល់អ្នកឧកញ៉ាមហាឧបាសិកា ដែលជាមាតាក្មេករបស់លោកសូមឱ្យបានជាសះស្បើយក្នុងពេលឆាប់ៗខាងមុខនេះ។ លោកនាយករដ្ឋមន្ត្រី ក៏បានសម្តែងនូវភាពរីករាយ និងសូមថ្លែងអំណរគុណផងដែរចំពោះការបំពេញបេសកកម្មកាទូតរបស់លោកស្រីនៅកម្ពុជា។ តាមរយៈបេសកកម្មរបស់លោកស្រីគឺបានជំរុញនិងពង្រឹងកិច្ចសហប្រតិបត្តិការរវាងប្រទេសទាំងពីរក្នុងនោះលោកស្រីបានជំរុញអោយមានទំនាក់ទំនងរវាងយុវជន និងយុវជន និងដំណើរទស្សនកិច្ចសិក្សារបស់យុវជនអូស្ត្រាលីមកកាន់កម្ពុជា ហើយនឹងជំរុញឲ្យមានការនាំចូលទំនិញប្រមាណជា៩០% ទៅ៩៧% ពីកម្ពុជាចូលទៅអូស្ត្រាលីផងដែរ។ ទន្ទឹមនឹងនេះ លោកនាយករដ្ឋមន្រ្តីបានមានប្រសាសន៍ថា នេះគឺជាមូលដ្ឋានដ៏ល្អដែលអាចលើកស្ទួយទំនាក់ទំនងរវាងប្រទេសយើងទាំងពីរ។

តាមរយៈការជំរុញពាណិជ្ជកម្ម និងការវិនិយោគរវាងប្រទេសទាំងពីរ លោកនាយករដ្ឋមន្រ្តី ហ៊ុន សែន ក៏បានថ្លែងអំណរគុណផងដែរចំពោះរដ្ឋាភិបាលអូស្ត្រាលី ដែលកន្លងមកបានជួយដល់កម្ពុជាយើង ជាពិសេស លើផ្នែកកសិកម្ម បានការបង្កើតវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (CARDI) ដែលបានជួយក្នុងការសិក្សាស្រាវជ្រាវ ធ្វើឲ្យអង្ករកម្ពុជាយើងទទួលបានចំណាត់ថ្នាក់លេខ១ នៅលើឆាកអន្តរជាតិក្នុងរយៈពេល៣ឆ្នាំជាប់គ្នានេះ។

ជាថ្មីម្តងទៀត លោកនាយករដ្ឋមន្ត្រី បានជូនពរ លោកស្រី Angela Corcoran សូមទទួលបាន នូវសុខភាពល្អ និងជោគជ័យក្នុងបេកសកកម្មថ្មីៗជាបន្តបន្ទាប់ទៀត៕