(ភ្នំពេញ)៖ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ
នៅថ្ងៃទី០២ ខែធ្នូ ឆ្នាំ២០១៩នេះ បានចេញសេចក្តីបំភ្លឺមួយ ឆ្លើយតបនឹងការចុះផ្សាយរបស់
វិទ្យុអាស៊ីសេរី កាលពីថ្ងៃទី២៩ ខែវិច្ឆិកា ឆ្នាំ២០១៩
ដោយបានចោទប្រកាន់មិនត្រឹមត្រូវលើ លោក ស ខេង ឧបនាយករដ្ឋមន្ត្រី
រដ្ឋមន្ត្រីក្រសួងមហាផ្ទៃ ថាបានបញ្ជាឲ្យចាប់រាល់មុខសញ្ញាដែលចូលរួមទទួលដំណើរ លោក សម
រង្ស៉ី ដោយមិនយល់មុខ។
អ្នកនាំពាក្យក្រសួងមហាផ្ទៃ
បានសម្តែងការសោកស្តាយចំពោះពាក្យខ្វះការពិត និងគ្មានគុណធម៌ ហើយចាត់ទុកថា
ការផ្សព្វផ្សាយរបស់វិទ្យុអាស៊ីសេរីបែបនេះ អាចនាំឱ្យសាធារណជន
មានការយល់ច្រឡំលើការដឹកនាំរបស់ លោក ស ខេង និងក្រសួងមហាផ្ទៃ
ថាបានធ្វើការដោយឥតក្រែងរអែង និងមិនគោរពច្បាប់ទម្លាប់ជាធរមាន ក៏ដូចជាមានន័យថា
កម្ពុជាមិនមែនជាប្រទេសប្រកាន់នីតិរដ្ឋ។
អ្នកនាំពាក្យក្រសួងមហាផ្ទៃ បានគូសបញ្ជាក់ថា លោក ស ខេង
ក្នុងឋានៈជា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃរាជរដ្ឋាភិបាលកម្ពុជា
ដែលកើតចេញពីការបោះឆ្នោតតាមបែបប្រជាធិបតេយ្យ តែងតែគោរពជាដរាបតាមរដ្ឋធម្មនុញ្ញកម្ពុជា
ហើយក្នុងឋានៈនេះ សម្តេចតែងតែផ្តោតការយកចិត្តទុកដាក់ជាពិសេសលើ មាត្រា៤១
នៃរដ្ឋធម្មនុញ្ញ ដែលចែងថា «ប្រជាពលរដ្ឋខ្មែរ
មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន
សេរីភាពខាងការបោះពុម្ពផ្សាយសេរីភាពខាងការប្រជុំ។ ជនណាក៏ដោយ
មិនអាចឆ្លៀតប្រើសិទ្ធិនេះដោយរំលោភ នាំឲ្យប៉ះពាល់ដល់កិត្តិយសរបស់អ្នកដទៃ
ដល់ទំនៀមទម្លាប់ល្អរបស់សង្គម ដល់សណ្តាប់ធ្នាប់សាធារណៈ និងដល់សន្តិសុខជាតិបានឡើយ»។
ជាមួយគ្នានេះ
ក្នុងនាមជាអ្នកទទួលខុសត្រូវលើស្ថាប័នបម្រើឲ្យការងារថែរក្សាសន្តិសុខ
សណ្តាប់ធ្នាប់សាធារណៈ និងសុវត្ថិភាពសង្គម លោក ស ខេង តែងតែណែនាំដល់មន្ត្រីក្រោមឱវាទ
និងកងកម្លាំងពាក់ព័ន្ធទាំងអស់ត្រូវធ្វើសកម្មភាពឲ្យបានត្រឹមត្រូវតាមផ្លូវច្បាប់
និងត្រូវចៀសវាងដាច់ខាតដូវការប្រើប្រាស់អំពើហិង្សា។
អ្នកនាំពាក្យក្រសួងមហាផ្ទៃ បានបញ្ជាក់បន្ថែមទៀតថា
ការផ្សាយខុសផ្សេងៗទៀត ដែលមិនគួរឲ្យជឿនោះ គឺវិទ្យុអាស៊ីសេរីនេះបាននិយាយថា៖
កងរាជអាវុធហត្ថស្ថិតក្រោមការគ្រប់គ្រងរបស់ក្រសួងមហាផ្ទៃ។ នេះជាការចុះផ្សាយខុសស្រឡះ
ហើយហាក់មានចេតនាមិនល្អមកលើលោក ស ខេង។ ម្យ៉ាងទៀតសូម្បីតែភូមិកំណើតរបស់លោក ស ខេង
ក៏វិទ្យុនេះមិនស្រាវជ្រាវឲ្យច្បាស់សិន សឹមផ្សាយទេ។ តាមពិតភូមិកំណើតរបស់ លោក ស ខេង
ក៏ឈ្មោះភូមិអណ្តូងស្អាត (អណ្តូងបុរាណដែលមានទឹកថ្លាស្អាត) ពុំមាន
ឈ្មោះភូមិអណ្តូងស្នាក ស្ថិតក្នុងឃុំក្របៅ ស្រុកកំចាយមារ ខេត្តព្រៃវែង នោះទេ។
អ្នកនាំពាក្យក្រសួងមហាផ្ទៃ
នៅតែទទួចអំពាវនាវឲ្យវិទ្យុអាស៊ីសេរី ត្រូវផ្សព្វផ្សាយព័ត៌មានពិតតប្រកបដោយវិជ្ជាជីវៈ
ថ្លៃថ្នូរ មានការទទួលខុសត្រូវខ្ពស់ ព្រមទាំងធ្វើឲ្យសាធារណជន បានទទួលនូវព័ត៌មានពិត
និងត្រឹមត្រូវ ដែលមានផលប្រយោជន៍ដល់ សង្គមជាតិកម្ពុជា៕
ខាងក្រោមនេះជាសេចក្តីបំភ្លឺរបស់ក្រសួងមហាផ្ទៃ៖
No comments:
Post a Comment