ដំណើរទស្សនៈកិច្ចរបស់ប្រមុខរាជរដ្ឋាភិបាលកម្ពុជា ទៅចូលរួមកិច្ចប្រជុំកំពូល អាស៊ី-អឺរ៉ុប នាពេលខាងមុខនេះ បានបញ្ជាក់យ៉ាងច្បាស់ថា កម្ពុជានិងសហគមន៍អឺរ៉ុបនៅតែមើលឃើញពីការផ្តល់ផលប្រយោជន៍ឱ្យគ្នាទៅវិញទៅមកមិនអាចកាត់ផ្តាច់បាន និងតួនាទីដ៏សំខាន់បំផុតរបស់លោក ហ៊ុន សែន នៅក្នុងឆាកនយោបាយខ្មែរ ក៏ដូចជាទំនាក់ទំនងរវាងកម្ពុជា-អឺរ៉ុប ដោយផ្តោតសំខាន់លើសរសរស្តម៣ គឺនយោបាយ សេដ្ឋកិច្ច និងវប្បធម៌។ ASEM ក៏ជាវេទិកាដ៏សំខាន់មួយក្នុងការតម្រែតម្រង់របៀបរបបពិភពលោក នាពេលបច្ចុប្បន្ននេះ តាមរយៈការចូលរួមចំណែកដល់សន្តិភាព សន្តិសុខ ស្ថេរភាព និងការងើបឡើងនៃសេដ្ឋកិច្ច និងបញ្ហាប្រឈមរបស់ពិភពលោក និងនៅក្នុងតំបន់។ ការចូលរួមក្នុងកិច្ចប្រជុំកំពូលនេះក៏ជាសញ្ញាបញ្ជាក់អំពីការលើកកម្ពស់នូវភាពស្មើមុខគ្នារបស់កម្ពុជា លើឆាកអន្តរជាតិ ដែលជាឱកាសក្នុងការពង្រឹងកិច្ចសហប្រតិបត្តិការទ្វេភាគីជាមួយសមាជិកដ៏ទៃទៀត ដើម្បីជំរុញឱ្យមានការផ្លាស់ប្តូរផ្នែកពាណិជ្ជកម្ម ការវិនិយោគ និងទេសចរណ៍ផងដែរ។
ដូច្នេះ ការបំភ្លៃព័ត៌មានរបស់ក្រុមប្រឆាំងនៅលើឆាកអន្តរជាតិ ពីការដាក់សម្ពាធរបស់សហគមន៍អឺរ៉ុបមកលើរាជរដ្ឋាភិបាលកម្ពុជា គឺកាន់តែគ្មានន័យ និងគ្មានប្រសិទ្ធភាពអ្វីទាល់តែសោះ។ ការសម្រេចចិត្តរបស់សហគមន៍អឺរ៉ុប តែងតែឈរលើការផ្តល់ផលប្រយោជន៍ឱ្យគ្នាទៅវិញទៅមករវាងរដ្ឋនិងរដ្ឋ រវាងផលប្រយោជន៍របស់ប្រជាជនអឺរ៉ុប និងផលប្រយោជន៍របស់ប្រជាជនកម្ពុជាជាង១៦ លាននាក់មិនឈរលើសម្លេងមនុស្សដែលកំពុងមានទោសដោយអំណាចសាលដីការបស់តុលាការកំពូលចំនួនត្រឹម១១៨ នាក់នោះទេ។
តែផ្ទុយទៅវិញ រាល់សេចក្តីស្នើសុំរបស់ក្រុមប្រឆាំងចំពោះប្រទេសនានានៅលើឆាកអន្តរជាតិ គឺតែងតែបង្ហាញពីអំពើក្បត់ផលប្រយោជន៍ប្រជាជន និងប្រទេសជាតិជានិច្ច។ ទង្វើក្បត់ជាតិរបស់ក្រុមប្រឆាំងឧទ្ទាមក្រៅច្បាប់ទាំងនោះមិនបានគិតដល់ផលវិបាកដែលធ្លាក់មកលើប្រជាជនកម្ពុជានោះទេ។ ពួកគេតែងតែទាមទារឱ្យមានការកាត់ជំនួយពីបរទេស ដាក់សម្ពាធមកលើរាជរដ្ឋាភិបាលក្នុងការរឹតត្បិតពន្ធអនុគ្រោះនានាជាដើម។ ជាងនេះទៀត មានភស្តុតាងថ្មីៗបង្ហាញពីការចំណាយលុយដ៏ខ្ជះខ្ជាយរហូតដល់ជាង២៥ម៉ឺនដុល្លារ របស់មេក្បត់ជាតិ សម រង្ស៊ី ក្នុងការជួលក្រុមហ៊ុនផ្សព្វផ្សាយព័ត៌មានរបស់អាមេរិកមួយឱ្យសរសេរព័ត៌មានបង្ខូចកេរ្តិ៍ឈ្មោះកម្ពុជានៅលើឆាកអន្តរជាតិថែមទៀត។
ទោះបីជាបែបនេះក្តី រាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា នៅតែអាចជំនះបានរាល់ឧបសគ្គ និងឧបាយកលដ៏ពិសពុលរបស់ក្រុមប្រឆាំង ហើយខិតខំព្យាយាមពន្យល់ដល់សាធារណៈមតិជាតិ និងអន្តរជាតិ ឱ្យយល់កាន់តែច្បាស់ពីអំពើល្មើសច្បាប់របស់ក្រុមប្រឆាំង ដែលបានប្រព្រឹត្តិល្មើសម្តងហើយម្តងទៀតយ៉ាងងងើល ដែលធ្វើឱ្យទំហ៊ំនៃទោសក្បត់ជាតិរបស់ពួកគេកាន់តែធ្ងន់ធ្ងរមិនអាចអត់ឱនឱ្យបានឡើយ។
ជាងនេះទៅទៀត រាជរដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន កាន់តែទទួលបាននូវការគាំទ្រ និងគោរពស្រឡាញ់ពីប្រជាពលរដ្ឋទាំងក្នុង និងក្រៅប្រទេសកាន់តែច្រើនឡើងៗជាលំដាប់។ តាមការសិក្សាស្រាវជ្រាវ របស់កាសែតបរទេស Burson-Marsteller on World Leaders on Facebook ឆ្នាំ២០១៧ បានបញ្ជាក់ថា លោក ហ៊ុន សែន គឺជាវរៈជននយោបាយកម្ពុជា ដ៏មានប្រជាប្រិយភាព ដែលទទួលបានការទាក់ទាញពីប្រជាពលរដ្ឋជុំវិញពិភពលោកជាង៥៨លាននាក់ ទទួលបានចំណាត់ថ្នាក់ពិភពលោកធំទី៣ បន្ទាប់ពីប្រធានាធិបតីអាមេរិក Donald Trump និង ប្រធានាធិបតីឥណ្ឌា Narendra Modi ។
សម្រាប់ប្រជាពលរដ្ឋកម្ពុជា លោកនាយករដ្ឋមន្ត្រី ហ៊ុន សែន ត្រូវបានប្រជាពលរដ្ឋផ្តល់រហ័សនាមថ្មីមួយទៀតថាជា “នាយករដ្ឋមន្រ្តីថ្ពាល់ផ្អែម” ថែមទៀត ដោយហេតុថា នាយករដ្ឋមន្ត្រីរូបនេះត្រូវបានប្រពលរដ្ឋទាំងក្នុង និងក្រៅប្រទេសទន្ទឹងរង់ចាំចង់សុំថត Selfie សុំចាប់ដៃ សុំឱប សុំថើប គ្រប់ទីកន្លែងដោយសារការគោរពស្រឡាញ់អស់ពីបេះដូង។
ជារួម និរន្តរភាព នៃរាជរដ្ឋាភិបាលស្របច្បាប់គឺនៅតែត្រូវបានសហគមន៍អន្តរជាតិទទួលស្គាល់ និងផ្តល់ជំនួយទាំងសម្ភារៈ បច្ចេកទេស និងថវិកា ព្រមទាំងត្រូវបានអញ្ជើញឱ្យចូលរួមនៅក្នុងកិច្ចប្រជុំធំៗទាំងថ្នាក់តំបន់ និងពិភពលោក។ ដោយហេតុថា ប្រទេសជាមិត្តនៅអាស៊ីរបស់កម្ពុជា និងសហគមន៍អឺរ៉ុប នៅតែចាត់ទុកថារាជរដ្ឋាភិបាលកម្ពុជាគឺជាដៃគូសម្រាប់កិច្ចសហប្រតិបត្តិការដែលមិនអាចខ្វះបាន ទាំងវិស័យសេដ្ឋកិច្ច ពាណិជ្ជកម្ម ទេសចរណ៍ វប្បធម៌ និងភូមិសាស្ត្រនយោបាយ៕
ដោយ៖ សួន ចំរើន
No comments:
Post a Comment