រដ្ឋសភាបន្ត​សម័យ​ប្រជុំរដ្ឋសភា​លើក​ទី៥ នីតិ​កាល​ទី៥ ​ដោយ​ត្រូវពិនិត្យ​និងពិភា​ក្សាសេច​ក្តីព្រាង​ច្បាប់ចំនួនបី

សម្តេចអគ្គមហាពញាចក្រី  ហេង សំរិន ប្រធានរដ្ឋសភា នៅព្រឹកថ្ងៃចន្ទ ទី១១ ខែមករា ឆ្នាំ២០១៦ បានដឹកនាំកិច្ចប្រជុំគណៈកម្មាធិការ អចិន្រ្តៃយ៍ រដ្ឋសភា ដើម្បីពិនិត្យ និងអនុម័ត របៀបវារៈចំនួនបី ក្នុងនោះ កិច្ចប្រជុំបានអនុម័តកំណត់កាលបរិច្ឆេទបន្តសម័យប្រជុំរដ្ឋសភា លើកទី៥ នីតិកាលទី៥ នៅថ្ងៃពុធ ទី១៣ ខែមករា ឆ្នាំ២០១៦។

តាមលទ្ធលនៃកិច្ចប្រជុំគណៈកម្មាធិការអចិន្រ្តៃយ៍រដ្ឋសភានាព្រឹកនេះ សេចក្តីព្រាងច្បាប់ ចំនួនបី ដែលត្រូវរដ្ឋសភា នឹងលើកយកទៅពិភាក្សា និងអនុម័ត ក្នុងសម័យប្រជុំ នាព្រឹកថ្ងៃពុធ ទី១៣មករា នេះ ហើយនឹងមានការពិភាក្សានិងអនុម័តសេក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងស្តីពី ការបង្កើតធនាគារវិនិយោគហេដ្ឋារចនាសម្ព័ន្ធអាស៊ី។ ការពិភា​ក្សានិងអនុម័ត  សេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រង ឆ្នាំ២០១៤ និងការពិភាក្សានិង អនុម័ត សេចក្តីព្រាងច្បាប់ស្តីពី គណនេយ្យ និងសវនកម្ម។

នៅក្នុងកិច្ចប្រជុំគណៈកម្មាធិការ អចិន្រ្តៃយ៍ រដ្ឋសភា នាព្រឹកនេះ ក៏បានអនុម័តលើសេចក្តីព្រាងសេចក្តីសម្រេចស្តីពី បែបបទ នីតិវិធី និងវិធាន នៃការ តំាងសំណួរ ចម្លើយ និងការបំភ្លឺនៅរដ្ឋសភា ផងដែរ៕