នៅថ្ងៃទី៣០ ខែកញ្ញា
ឆ្នាំ២០១៥នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហោះសារនៅក្នុងទំព័រ
Facebook ផ្លូវការរបស់សម្តេច ថា សម្តេចសូមអរគុណប្រជាពលរដ្ឋខ្មែរ ដែលបានចូលរួមថែរក្សាសន្តិភាព ដល់សង្គមជាតិយើង
ដែលជាសេចក្តីត្រូវការចាំបាច់បំផុត ក្នុងការអភិវឌ្ឍប្រទេសជាតិអោយរីកចម្រើន។ សម្តេចតេជោ
និងគណៈប្រតិភូកម្ពុជា បានវិលត្រឡប់មកពីការចូលរួមកិច្ចប្រជុំកំពូលអង្គការសហប្រជាជាតិនៅទីក្រុង
New York
សហរដ្ឋអាមេរិកកាលពីម្សិលមិញនេះ ប្រកបដោយផ្លែផ្កាជាទីមោទនៈបំផុត។
សម្តេចតេជោបានលើកឡើងថា
ពេលនេះក៏ជារដូវបុណ្យភ្ជុំ ដែលប្រជាពលរដ្ឋខ្មែរទូទាំងប្រទេស បានចូលរួមកាន់បិណ្ឌតាំងពីថ្ងៃទី
២៨ ខែ កញ្ញា រហូតមកទល់ថ្ងៃនេះ គឺដល់ពិធីកាន់បិណ្ឌទី៣ហើយ។ ទន្ទឹមនឹងប្រជាពលរដ្ឋ
ជាពិសេស កម្មករ កម្មការិនីត្រូវទៅជួបជុំក្រុមគ្រួសារ នៅតាមបណ្តាខេត្តនានា សម្តេចតេជោ
បានស្នើឲ្យក្រសួង និង អាជ្ញាធរមានសមត្ថកិច្ចទូទាំងប្រទេសជួយពិនិត្យ រៀបចំការពារសុខសុវត្ថិភាពជូនប្រជាពលរដ្ឋអោយបានល្អបំផុត។
ជាមួយគ្នានេះដែរ សូមអាជ្ញាធរមានសមត្ថកិច្ចពិនិត្យតម្លៃសំបុត្ររថយន្តឈ្នួលគ្រប់ប្រភេទ កុំអោយតម្លើងថ្លៃក្នុងពេលរដូវបុណ្យទាន ជាពិសេសក្នុងពិធីបុណ្យភ្ជុំបិណ្ឌនេះតែម្តង។ជាមួយគ្នានេះដែរ
សម្តេចតេជោបានស្នើដល់បងប្អូនដែលបញ្ជាយាន្តយន្តគ្រប់ប្រភេទមេត្តាប្រុងប្រយ័ត្នក្នុងការបើកបរ
ដោយត្រូវគោរពច្បាប់ចរាចរណ៍ គោរពជីវិតខ្លួនឯង នឹងគោរពជិវិតអ្នកដ៏ទៃ និងស្នើដល់បងប្អូនដែលធ្វើដំណើរតាមទូក
កាណូត សុំមេត្តាកុំដឹកលើសចំណុះ នឹងកុំធ្វើដំណើរពេលធាតុអាកាសមិនល្អដែលនាំមកនូវគ្រោះថ្នាក់ជាយថាហេតុ។
សម្តេចតេជោបានបន្ថែមថា
ប្រជាពលរដ្ឋទូទាំងប្រទេសពិតជាបានយល់ច្បាស់ណាស់ថា ពេលដែលប្រទេសជាតិមានសុខសន្តិភាព
គឺប្រជាពលរដ្ឋកាន់តែមានឱកាសច្រើន ហើយជាពិសេស យើងទាំងអស់គ្នាបានចូលរួមជួបជុំក្រុមគ្រួសារអបអរសាទរពិធីបុណ្យភ្ជុំនេះជាដើម។ សម្តេចតេជោសង្កត់ធ្ងន់ថា ការឃោសនាញុះញុងបំពុលបរិយាកាសនយោបាយ ដែលធ្វើអោយចលាចល
គឺនឹងបំផ្លាញសេចក្តីសុខរបស់ប្រជាពលរដ្ឋ ហើយនឹងធ្វើអោយអន្តរាយដល់ជាតិទាំងមូល។
ទង្វើបែបនេះក៏ប្រាសចាកជាមួយនឹងទង្វើអ្នកកាន់ព្រះពុទ្ធសាសនាផងដែរ៕
No comments:
Post a Comment