តាមសេចក្តីប្រកាសរបស់ ឯកឧត្តម
កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៣
ខែមីនា ឆ្នាំ២០១៥នេះ បានឲ្យដឹងថា ក្រសួងការបរទេស និងសហប្រតិបត្តិការអន្តរជាតិកម្ពុជា
តាមរយៈស្ថានអគ្គកុងស៊ុលកម្ពុជាប្រចាំទីក្រុងក្វាងចូវ ប្រទេសចិន បានសហការជាមួយអាជ្ញាធរចិន
ជួយសង្គ្រោះស្រ្តីខ្មែរចំនួន៤នាក់ក្នុងនោះរួមមាន៖ ១- ឈ្មោះ សែ សុខណៃ រស់នៅខេត្តកំពង់ចាម, ២-
ឈ្មោះ ស៊ុន សុខគា រស់នៅរាជធានីភ្នំពេញ, ៣-
ឈ្មោះ សៅ ស្រីមិច រស់នៅខេត្ត កំពង់ស្ពឺ
និង ៤- ឈ្មោះ ស៊ន សុខា រស់នៅខេត្តកំពង់ចាម។
ជាមួយគ្នានេះដែរ ក្នុងនាមរាជរដ្ឋាភិបាល
ក្រសួងការបរទេស និងសហប្រតិបត្តិការអន្តរជាតិ ក៏បានធ្វើការអំពាវនាវដល់ពលរដ្ឋខ្មែរ
ជាពិសេស នារីខ្មែរដែលជាជន ងាយរងគ្រោះ សូមធ្វើការប្រុងប្រយ័ត្នខ្ពស់ កុំឲ្យចាញ់បោកតាមការអូសទាញ
បញ្ចុះ បញ្ចូលពីសំណាក់មេខ្យល់ ដែលប៉ុនប៉ងនាំបងប្អូនទៅធ្វើការ ឬទៅរៀបការជាមួយ
បុរសជនជាតិចិននៅប្រទេសចិន ដោយធ្វើការសន្យាកុហកថា នឹងទទួលបានលាភសក្ការៈ
ប្រាក់កាស់ជាច្រើនឲ្យសោះ។ កន្លងមក ក្រសួងក៏ដូចស្ថានទូត និងស្ថានអគ្គកុងស៊ុលកម្ពុជាប្រចាំនៅបរទេស
ជាពិសេសនៅប្រទេសចិនបានទទួលពាក្យបណ្តឹងយ៉ាងច្រើនពីជនរងគ្រោះ គ្រួសារជនរងគ្រោះ
និងតាមរយៈអង្គការមួយចំនួន។
ឯកឧត្តម កុយ គួង
ក៏បានឲ្យដឹងដែរថា បច្ចុប្បន្ន ក្រសួងការបរទេស ស្ថានទូត និងស្ថានអគ្គកុងស៊ុលកម្ពុជា
បាន និងកំពុងជួយសង្គ្រោះនារីខ្មែររងគ្រោះទាំងនោះមកកម្ពុជាវិញ ជាបន្តបន្ទាប់។
គួរបញ្ជាក់ថា ស្រ្តីខ្មែរទាំង៤រូបនេះ
បានរងគ្រោះដោយសារមេខ្យល់នាំយកទៅរៀបការ ជាមួយបុរសជនជាតិចិន នៅប្រទេសចិន នាពេលកន្លងទៅនេះ។
ស្រ្តីរងគ្រោះទាំង៤នាក់ នេះ ត្រូវបានបញ្ជូន មកដល់មាតុប្រទេសយើងវិញ កាលពីថ្ងៃ១២
ខែមីនា ឆ្នាំ២០១៥៕
អត្ថបទ៖ ច័ន្ទ ទេវី
No comments:
Post a Comment