ថ្ងៃនេះជាគម្រប់ខួប៤៤ឆ្នាំ នៃការចូលបម្រើកងទ័ព, នាយឧត្តមសេនីយ៍ សៅ សុខា ផ្ញើសារជូនអាវុធហត្ថថា «ខ្ញុំម្នាក់ឯងមិនអាចកសាងកេរ្តិ៍ឈ្មោះ កិត្តិយស តម្លៃសម្រាប់កងរាជអាវុធហត្ថ និងកិច្ចការធំតូចជាច្រើនបានឡើយ បើគ្មានការចូលរួមពីបងប្អូន»

(FN-ភ្នំពេញ)៖ នៅថ្ងៃទី២១ ខែកក្កដា ឆ្នាំ២០២២នេះ ជាគម្រប់ខួប៤៤ឆ្នាំ ដែលនាយឧត្តមសេនីយ៍ សៅ សុខា បានចូលបម្រើកងទ័ព រហូតទទួលបានតំណែងជាមេបញ្ជាការកងទ័ពកំពូលម្នាក់នាពេលបច្ចុប្បន្ន នៅក្នុងជួររាជរដ្ឋាភិបាលកម្ពុជា។ សម្រាប់ការកាន់តំណែងជាអគ្គមេបញ្ជាការរងកងយោធពលខេមភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នាយឧត្តមសេនីយ៍ សៅ សុខា បានដឹកនាំស្ថាប័នកងកម្លាំងមួយនេះមានការរីកចម្រើនយ៉ាងខ្លាំង និងបានក្លាយជាសេនាធិការ ដ៏រឹងមាំមួយរបស់ក្រសួងការពារជាតិ និងរាជរដ្ឋាភិបាលលើកិច្ចការងាររក្សាសន្តិភាព សន្តិសុខ និងសណ្តាប់ធ្នាប់សង្គម ជាពិសេសបានចូលរួមទប់ស្កាត់ និងការបង្ក្រាបចលនាខុសច្បាប់ផ្សេងៗដែលប៉ុនប៉ងបំផ្លាញសេចក្តីសុខរបស់ប្រជាពលរដ្ឋខ្មែរ។

ក្រៅពីនេះកម្លាំងអាវុធហត្ថ ក្រោមការដឹកនាំរបស់នាយឧត្តមសេនីយ៍ សៅ សុខា ក៏បានចូលរួមការងារបង្ក្រាបបទល្មើសជាច្រើននៅក្នុងសង្គម និងការជួយសង្គ្រោះប្រជាពលរដ្ឋគ្រប់រូបភាពដែលកើតមានឡើង។ សម្រាប់កងកម្លាំងអាវុធហត្ថទាំងអស់ នាយឧត្តមសេនីយ៍ សៅ សុខា មានទិសស្លោកជាត្រីវិស័យបង្ហាញផ្លូវសម្រាប់របៀបធ្វើការរួមមាន៖

*ទី១៖ ចំពោះប្រទេសជាតិត្រូវតែការពារ

*ទី២៖ ចំពោះប្រជាត្រូវតែបម្រើ

*ទី៣៖ ចំពោះច្បាប់ត្រូវតែគោរព

*ទី៤៖ ចំពោះបទល្មើសត្រូវតែបង្រ្កាប។

ក្នុងឱកាសគម្រប់ខួប៤៤ឆ្នាំ នៃការចូលបម្រើកងទ័ពរបស់យុវជនកំព្រា សៅ សុខា (២១ កក្កដា ១៩៧៨-២១ កក្កដា ២០២២) កូនចៅជាយោធិន នៃកងរាជអាវុធហត្ថគ្រប់ថ្នាក់ បានកោតសរសើរនូវវីរភាពអង់អាចក្លាហាន ឆន្ទៈមោះមុត សេចក្តីស្មោះត្រង់ ការទទួលខុសត្រូវខ្ពស់ និងភាពដឹកនាំដ៏ឈ្លាសវៃ មានគុណធម៌ ក្រមសីលធម៌ វិជ្ជាជីវៈ កសាងកងរាជអាវុធហត្ថរីកចម្រើនគ្រប់ផ្នែក គ្រប់វិស័យ ចាប់ពីការហូប ការស្លៀកពាក់ ស្នាក់នៅ កន្លែងធ្វើការ អប់រំបណ្ដុះបណ្ដាលធនធានមនុស្ស បំពាក់មធ្យោបាយ យុទ្ធោបករណ៍ និងការងារទំនាក់ទំនង ជួយសង្គម ។ល។

ក្រោយពីទទួលបានសាររបស់កូនចៅក្រោមឱវាទតាមប្រព័ន្ធទំនាក់ទំនងនានា នាយឧត្តមសេនីយ៍ បានឆ្លើយតបដូចខាងក្រោម៖

ជាបឋមខ្ញុំថ្លែងនូវពាក្យថា «អរគុណ» នូវការលើកទឹកចិត្តខ្ញុំ ខ្ញុំរីករាយទទួលដោយស្មោះសបំផុត។ ប៉ុន្តែខ្ញុំម្នាក់ឯងមិនអាចកសាងកេរ្តិ៍ឈ្មោះ កិត្តិយស តម្លៃសម្រាប់កងរាជអាវុធហត្ថ និងកិច្ចការធំតូចជាច្រើនបានឡើយ បើគ្មានបងប្អូនដែលមានមនសិការ ស្រឡាញ់ គាំទ្រចូលរួម។ ឆ្លៀតឱកាសនេះខ្ញុំសូមចែករំលែកពាក្យពេចន៍សរសើរលើកទឹកចិត្តខ្ញុំ ជូនទៅបងប្អូនទាំងអស់គ្នាម្នាក់បន្តិចៗស្មើៗគ្នា ពិសេសសូមគ្រប់គ្នាព្រមទាំងក្រុមគ្រួសារប្រកបតែនិងសុខភាពល្អកម្លាំងមាំមួនជន្មាយុវែង ចម្រុងចម្រើនការប្រកបមុខរបប ជោគជ័យការងារបម្រើរដ្ឋ មានសុភមង្គល និងជួបតែសំណាងល្អជានិច្ច។

នាយឧត្តមសេនីយ៍ បានបន្ដថា យើងរស់នៅ ធ្វើការជាមួយគ្នា ២៩ឆ្នាំហើយ ពិសេស ២៣ឆ្នាំដែលខ្ញុំទទួលខុសត្រូវជាមេបញ្ជាការ ខ្ញុំសូមបងប្អូនមេត្តាយោគយល់ និងអព្យាស្រ័យ នូវរាល់ពាក្យសំដី អាកប្បកិរិយា មាត់ធំ មាត់តូច កាយវិការខ្វះការគោរព ឬទង្វើរទាំងឡាយណាដែលធ្វើអោយប៉ះពាល់អារម្មណ៍បងប្អូនកើតជាការមិនសប្បាយចិត្ត សូមមេត្តាអនុគ្រោះឲ្យខ្ញុំផង ក្នុងការផ្តល់គុណតម្លៃ នៃការខិតខំជាតួនាទី មុខតំណែង ឋានន្តរស័ក្កិ ឬការទាក់ទងប្រចាំថ្ងៃមិនបានស្មើៗគ្នា។ ខ្ញុំគ្មានគំនិតបក្ខពួកនិយម គ្រួសារនិយម អាត្មានិយម តំបន់និយមនោះទេ តែដូចបងប្អូនដឹងស្រាប់ហើយនំមួយដុំតូចតែអ្នកដែលត្រូវទទួលទានមានគ្នាច្រើន ខ្លះនៅជិត ខ្លះនៅឆ្ងាយ ខ្លះបាន ខ្លះអត់ ខ្ញុំដឹងខ្ញុំយល់ តែខ្ញុំមិនដឹងត្រូវធ្វើយ៉ាងម៉េចមាន តែពាក្យអង្វរកសូមមេត្តា យោគយល់ឲ្យខ្ញុំតែប៉ុណ្ណោះ។ សូមអរគុណ សង្ឃឹម ជឿជាក់លើ បងប្អូនទាំងអស់ នឹងរួមទទួលរែកពន់កិច្ចការតូចធំដែលមានប្រយោជន៍ដល់ប្រជាជន និងប្រទេសជាតិបន្តដើម្បីថែរក្សាតម្លៃ កិត្តិយស កេរ្ត៍ឈ្មោះកងរាជអាវុធហត្ថតទៅមុខទៀត។

ខ្ញុំអស់ឪពុក ម្តាយ បងប្អូន តែខ្ញុំមានបងប្អូនទាំងអស់គ្នារាប់អាន ស្រឡាញ់ គាំទ្រ ចែករំលែក យកអាសាខ្ញុំ ខ្ញុំពិតជាសំណាង។ សូមបងប្អូនគ្រប់រូបមេត្តាទទួល នូវក្តីគោរព ស្រឡាញ់ ដឹងគុណពីខ្ញុំចំពោះបងប្អូនជានិច្ច។

សូមបញ្ជាក់ថា ស្ថាប័នកងរាជអាវុធហត្ថត្រូវបានបង្កើតឡើងកាលពីថ្ងៃទី១៤ ខែកក្កដា ឆ្នាំ១៩៩៣ ពោលបន្ទាប់ពីការបោះឆ្នោតលើកដំបូង ដែលរៀបចំដោយអាជ្ញាធរបណ្តោះអាសន្ន នៃអង្គការសហប្រជាជាតិប្រចាំនៅកម្ពុជា ហៅកាត់ «អ៊ុនតាក់»។ តាមក្រឹត្យចុះថ្ងៃទី១៤ កក្កដា ១៩៩៣ ការបង្កើតអគ្គសេនាធិការដ្ឋាននៃកងទ័ពជាតិកម្ពុជា នៅក្នុងរចនាសម្ព័ន្ធចាត់តាំងអគ្គសេនាធិការដ្ឋាន ក៏មានកងអាវុធហត្ថផងដែរ។

បន្ទាប់មកនៅថ្ងៃទី២១ ខែធ្នូ ឆ្នាំ១៩៩៤ រាជរដ្ឋាភិបាលបានចេញនូវអនុក្រឹត្យលេខ៧៧ ស្តីពី តួនាទី ភារកិច្ច និងរចនាសម្ព័ន្ធទូទៅកងរាជអាវុធហត្ថ និងក្រមនីតិវិធីព្រហ្មទណ្ឌ ដែលរដ្ឋសភាបានអនុម័តកាលពីថ្ងៃទី៧ ខែមិថុនា ឆ្នាំ២០០៧ បានចែងច្បាស់កំណត់សមត្ថកិច្ចរបស់កងរាជអាវុធហត្ថ ក្នុងគម្ពីទី២ មាតិកាទី៤ ជំពូកទី៤។

នាយឧត្តមសេនីយ៍ សៅ សុខា បានលើកឡើងថា យោងទៅតាមឯកសារគតិយុត្តខាងលើ ២៩ឆ្នាំកន្លងផុតទៅ កងរាជអាវុធហត្ថ បានកសាងហេដ្ឋារចនាសម្ពន្ធទាំងរឹងទាំងទន់ផង និងប្រតិបត្តិនូវតួនាទី ភារកិច្ចដែលមានចែងក្នុងលិខិតបទដ្ឋានគតិយុត្ត ក្នុងការរួមចំណែក ការពារសន្តិសុខ រក្សាសណ្តាប់ធ្នាប់ បង្ក្រាបបទល្មើស ពង្រឹងការអនុវត្តកសាងព្រះរាជាណាចក្រកម្ពុជា ជាប្រទេសនីតិរដ្ឋ។

តាមរយៈស្នាដៃ និងសមិទ្ធផលទាំងនេះ កងរាជអាវុធហត្ថ ទទួលបាននូវការទុកចិត្តពីរាជរដ្ឋាភិបាល ពីសាធារណជន និងបានប្រគល់បន្ថែមនូវភារកិច្ច ឲ្យធ្វើការសហការជាមួយក្រសួង ស្ថាប័ននានា យ៉ាងមានប្រសិទ្ធភាព។

ដោយឡែកចន្លោះពេល២ឆ្នាំកន្លងមកនេះ ដោយសារការរីករាលដាលនៃជំងឺឆ្លងកូវីដ-១៩ ខួបលើកទី២៨ មិនបានប្រារព្ធពិធីអបអរសាទរនោះទេ ទើបតែឆ្នាំនេះ កម្ពុជាក្រោមការដឹកនាំឈ្លាសវៃរបស់រាជរដ្ឋាភិបាល និងដោយបានការចូលរួមពីប្រជាពលរដ្ឋគ្រប់មជ្ឈដ្ឋាន ព្រមទាំងមានការណែនាំក្រសួងជំនាញ គឺក្រសួងសុខាភិបាល កម្ពុជាគ្រប់គ្រងបានស្ថានភាពជំងឺកូវីដ-១៩ ទើបថ្ងៃនេះយើងមកជួបជុំគ្នា រំលឹកខួបលើកទី២៩ ឡើងវិញ៕

វិភាគអន្តរជាតិ៖ តើ «ប្រជាធិបតេយ្យ» របស់សហរដ្ឋអាមេរិក លែងជាគំរូសម្រាប់ពិភពលោក មែនទេ?

(តូក្យូ)៖ កាលពីជាង៣០ឆ្នាំមុន សហភាពសូវៀតបានដួលរំលំ ដោយសារតែបណ្ដារដ្ឋមួយភាគធំ ដែលស្ថិតក្រោមដែនឥទ្ធិពលរបស់ខ្លួនបាត់បង់ជំនឿចិត្ត និងងាកមក ជឿជាក់ថាការដឹកនាំប្រទេសតាមបែបប្រជាធិបតេយ្យ និងនីតិរដ្ឋតាមបែបលោកខាងលិច គឺល្អប្រសើរជាងរបបកុម្មុយនិស្ដសូវៀត។ នៅពេលនោះ ស្ថាប័ននយោបាយ ដ៏រឹងមាំ និងប្រកបដោយការបើកចំហរបស់សហរដ្ឋអាមេរិក ទទួលបានការកោតសរសើរយ៉ាងខ្លាំងពីមនុស្សរាប់លាននាក់ ដែលប្រាថ្នាចង់រស់នៅក្រោមប្រព័ន្ធនយោបាយ មួយជាទីដែលមេដឹកនាំត្រូវបានជ្រើសរើសតាមរយៈការបោះឆ្នោតដោយស្របច្បាប់ សេរី និងយុត្តិធម៌។

ផ្អែកលើហេតុផលជាច្រើន បច្ចុប្បន្នសហរដ្ឋអាមេរិក នៅតែជាកំពូលមហាអំណាចលេខ១ នៅលើពិភពលោក ដោយមានប្រភពធនធានធម្មជាតិដ៏មហាសាល, មានសេដ្ឋកិច្ចដ៏រស់រវើក ប្រព័ន្ធហិរញ្ញវត្ថុដ៏រឹងមាំ បច្ចេកវិទ្យាស្ដង់ដារពិភពលោក ព្រមទាំងមានយោធាខ្លាំងក្លាដែលជះឥទ្ធិពលទៅកាន់គ្រប់តំបន់ទាំងអស់នៅលើ ពិភពលោក។ ក៏ប៉ុន្តែ ប្រជាធិបតេយ្យរបស់សហរដ្ឋអាមេរិកបែរជាកំពុងផុយស្រួល និងរងការគំរាមកំហែង ហើយសម្ព័ន្ធមិត្តអាមេរិកបានត្រឹមតែបង្ហាញការខកចិត្ត តែប៉ុណ្ណោះ។

ជាការពិតណាស់ វាមិនមែនជារឿងសាមញ្ញទេ ដែលប្រធានាធិបតីអាមេរិកម្នាក់កំពុងកាន់អំណាចមានប្រជាប្រិយភាពអន់បំផុត។ បើតាមការស្ទង់មតិចេញផ្សាយកាលពី ពេលថ្មីៗនេះ ប្រជាជនអាមេរិកមានត្រឹមតែ ៣៩ភាគរយដែលគាំទ្រការដឹកនាំរបស់លោក ចូ បៃដិន ហើយនេះគឺជាអត្រាគាំទ្រទាបជាងលោក ដូណាល់ ត្រាំ ទៅទៀត បើគិតត្រឹមរយៈពេលដឹកនាំប្រទេសដូចគ្នា។ មួយវិញទៀត តាមរយៈអត្រាគាំទ្រដ៏ទាបនេះ លោក បៃដិន ពិបាកនឹងរំពឹងថាគណបក្សប្រជាធិបតេយ្យរបស់លោកអាចនឹង ទទួលបានជ័យជម្នះក្នុងការបោះឆ្នោតពាក់កណ្ដាលអាណត្តិនៅខែវិច្ឆិកា ឆ្នាំ២០២២ ដោយសារតែអតិផរណា ការកើនឡើងនៃឧក្រិដ្ឋកម្ម និងភាពចលាចល នៅឯតំបន់ព្រំដែនរវាងអាមេរិក និងម៉ិកសិកជាដើម។

តែនេះគ្រាន់តែជាបញ្ហាបន្ទាប់ផ្សំប៉ុណ្ណោះ ដ្បិតបញ្ហាធំគឺស្ថិតនៅត្រង់ដំបៅផ្ទៃក្នុងរបស់សហរដ្ឋអាមេរិកខ្លួនឯង។ មានព្រឹត្តិការណ៍ធំៗចំនួន២ ក្នុងនោះរួមមានសំណុំរឿង លោក ដូណាល់ ត្រាំ និងការលុបចោលសិទ្ធិរំលូតកូនរបស់ស្ត្រីអាមេរិក ដែលបាន និងកំពុងធ្វើឱ្យនយោបាយអាមេរិកបែកបាក់ បំផ្លាញសុចរិតភាពនៃស្ថាប័ននយោបាយ និងបង្កឱ្យមានការខឹងសម្បារនៅទូទាំងសហរដ្ឋអាមេរិក ហើយដែលនេះនាំឱ្យមានការភ័យខ្លាចថាជម្លោះ ឬចលាចលកាន់ខិតជិតមកដល់។ កាលពីប៉ុន្មានសប្ដាហ៍មុន គណៈកម្មាធិការមួយនៃសភាតំណាងរាស្ត្រអាមេរិក ដែលទទួលស៊ើបអង្កេតលើកុបកម្មដ៏ហិង្សានៅឯវិមានកាពីតូល កាលពីថ្ងៃទី៦ ខែមករា ឆ្នាំ២០២១ បានបង្ហាញ ភស្ដុតាងដែលអាចបញ្ជាក់ថាអតីតប្រធានាធិបតីអាមេរិក លោក ដូណាល់ ត្រាំ ជាអ្នកញុះញង់ឱ្យក្រុមអ្នកគាំទ្ររូបលោកសម្រុកចូល និងវាយប្រហារលើវិមានកាពីតូល ដើម្បីរារាំងការប្រកាសជ័យជម្នះរបស់លោក ចូ បៃដិន។

ជាងនេះទៅទៀត ភស្តុតាងក៏បានបង្ហាញដែរថាលោក ត្រាំ មិនត្រឹមតែចង់សម្រេចបំណងដោយចោទថាការបោះឆ្នោតត្រូវបានលួចបន្លំប៉ុណ្ណោះទេ ពោលគឺលោកក៏បាន ព្យាយាមសម្រេចបំណងដោយប្រើកម្លាំងបាយផងដែរ។ តែទោះជាបែបនេះក្ដី គ្មានមនុស្សណាម្នាក់ក្នុងទីក្រុងវ៉ាស៊ីនតោនមានជំនឿចិត្តថាលោក ដូណាល់ ត្រាំ និងមនុស្ស ជំនិតមួយចំនួនរបស់លោកនឹងត្រូវបាននាំខ្លួនឡើងតុលាការ ឬក៏ទទួលខុសត្រូវនៅចំពោះមុខច្បាប់ឡើយ។ ផ្ទុយទៅវិញ ការស្ទង់មតិបែរជាបង្ហាញថាលោក ត្រាំ នៅតែមាន ឥទ្ធិពលធំនៅក្នុងគណបក្សសាធារណរដ្ឋ ហើយអាចនឹងជាប់ឈ្មោះជាបេក្ខជនប្រធានាធិបតីសាជាថ្មីទៀតផងសម្រាប់ការបោះឆ្នោតនៅឆ្នាំ២០២៤ខាងមុខ ប្រសិនបើ លោកសម្រេចចិត្តចូលរួមប្រកួតប្រជែង។

ម្លោះហើយថាតើប្រជាជនអាមេរិកាំងអាចរំពឹងបានទេថា ប្រជាជនដទៃនៅជុំវិញពិភពលោកនឹងនៅតែមានជំនឿលើប្រជាធិបតេយ្យអាមេរិក នៅពេលដែល ៧០ភាគរយ នៃអ្នកគាំទ្រគណបក្សសាធារណរដ្ឋមិនទទួលស្គាល់លោក ចូ បៃដិនជាប្រធានាធិបតីស្របច្បាប់ ហើយភាគច្រើនក្នុងចំណោមពួកគេថែមទាំងនិយាយថាត្រៀមខ្លួន ជាស្រេចដើម្បីបោះឆ្នោតគាំទ្រមនុស្សម្នាក់ដូចជាលោក ត្រាំ ដែលញុះញង់ឱ្យមានកុបកម្ម និងអំពើហិង្សានៅតាមកញ្ចក់ទូរទស្សន៍ទៅវិញ?

ដូច្នេះ វាមានហេតុផលត្រឹមត្រូវជាច្រើននៅពីក្រោយការភ័យខ្លាចថាការបោះឆ្នោតប្រធានាធិបតីឆ្នាំ២០២៤ អាចនឹងបង្កឱ្យមានអំពើហិង្សានៅក្នុងសហរដ្ឋអាមេរិក ហើយ ប្រជាជនអាមេរិកមួយភាគធំ នឹងច្រានចោលភាពស្របច្បាប់នៃការបោះឆ្នោត មិនថាបេក្ខជនរូបណាឈ្នះនៅក្នុងការបោះឆ្នោតនេះនោះទេ។ ពោលគឺប្រសិនបើលោក ត្រាំ សម្រេចចិត្តចូលរួមប្រកួតប្រជែង ហើយលោកទទួលបរាជ័យ ឬក៏បេក្ខជនដែលគាំទ្រដោយលោក ត្រាំទទួលបរាជ័យ នោះច្បាស់ណាស់ក្រុមអ្នកស្មោះស័្មគ្រ និងគាំទ្រ លោក ត្រាំ នឹងស្រែកតវ៉ាថាការបោះឆ្នោតត្រូវបានលួចបន្លំ ខណៈក្រុមមន្ត្រីគាំទ្រលោក ត្រាំ នៅតាមរដ្ឋនីមួយៗអាចនឹងបដិសេធទទួលស្គាល់ ឬអាចព្យាយាម រកមធ្យោបាយកែប្រែលទ្ធផលបោះឆ្នោត។

ដោយឡែក ប្រសិនបើលោក ត្រាំ ឬបេក្ខជនគាំទ្រដោយលោក ត្រាំ ទទួលបានជ័យជម្នះវិញ នោះក្រុមមនុស្សដែលស្អប់លោក ត្រាំ អាចនឹងនាំគ្នាតវ៉ាប្រឆាំងនឹងលទ្ធផល បោះឆ្នោត ដោយចោទថាការបោះឆ្នោតត្រូវបានលួចបន្លំ។ ក្នុងន័យនេះ ទោះជាលោក ត្រាំ ឬលោក បៃដិន មិនមែនជាបេក្ខជនប្រធានាធិបតីក៏ដោយ ក៏អាមេរិកនឹងនៅតែ ប្រឈមមុខនឹងបញ្ហាភាពស្របច្បាប់នៃការបោះឆ្នោតដដែល។

ចំណែកឯ ព្រឹត្តិការណ៍ធំមួយទៀត នោះគឺ «ការលុបចោលសិទ្ធិរំលូតកូនរបស់ស្ត្រីអាមេរិក» ពីសំណាក់តុលាការកំពូលអាមេរិក។ ការសម្រេចចិត្តដ៏ចម្រូងចម្រាសនេះ បាន នាំឱ្យមានការរិះគន់ និងថ្កោលទោសយ៉ាងខ្លាំងទាំងពីប្រជាជនអាមេរិក ព្រមទាំងពីបណ្ដាប្រទេសដែលជាសម្ព័ន្ធមិត្តអាមេរិក ហើយប្រជាជនអាមេរិកដល់ទៅ ២ភាគ៣ ត្រូវបានគេរាយការណ៍ថាបានជំទាស់នឹងការសម្រេចចិត្តរបស់តុលាការកំពូល។ កាន់តែសំខាន់ជាងនេះទៅទៀត ការសម្រេចចិត្តរបស់តុលាការកំពូលអាមេរិកបានបង្កភាព រង្គោះរង្គើរខាងនយោបាយ ដែលអាចនឹងនាំឱ្យមានការបែកបាក់គ្នានៅទូទាំងសហរដ្ឋអាមេរិក។ ការស្ទង់មតិបានបង្ហាញថាការសម្រេចចិត្តនេះអាចនឹងបំផ្លាញសុចរិតភាព នៃតុលាការកំពូលអាមេរិក ក្នុងនាមជាស្ថាប័នមួយដែលធ្លាប់តែទទួលបានការគាំទ្រពីប្រជាជនអាមេរិក ខ្លាំងជាងប្រធានាធិបតី ឬសភាទៅទៀត ហើយមិនតែប៉ុណ្ណោះវា ក៏អាចនឹងបង្កឱ្យមានអំពើហិង្សាផងដែរ។

តួយ៉ាង កាលពីខែមិថុនាកន្លងទៅ បុរសម្នាក់រស់នៅក្នុងរដ្ឋកាលីហ្វ័រញ៉ា ត្រូវបានចោទប្រកាន់ពីបទព្យាយាមសម្លាប់ចៅក្រមតុលាការកំពូលអាមេរិក លោក ប្រេត កាវ៉ាន់ណាស់ (Brett Kavanaugh)។ ក្រុមរដ្ឋអាជ្ញាបានឱ្យដឹងថា បុរសរូបនេះមានការខឹងសម្បារយ៉ាងខ្លាំងចំពោះការសម្រេចចិត្តលុបចោលសិទ្ធិរំលូតកូនរបស់ស្ត្រី អាមេរិក ហើយរូបគេបារម្ភខ្លាចថាលោក កាវ៉ាន់ណាស់ អាចនឹងបន្ធូបន្ថយច្បាប់គ្រប់គ្រងកាំភ្លើង។

មែនទែនទៅ សំណុំរឿងកុបកម្មកាលពីថ្ងៃទី៦ ខែមករា ឆ្នាំ២០២១ វាបានបង្ហាញរួចទៅហើយពីហានិភ័យថាការចោទសួរពីភាពស្របច្បាប់នៃស្ថាប័ននយោបាយ នឹងបង្ក ទៅជាអំពើហិង្សា។ ក្រសួងសន្តិសុខមាតុភូមិអាមេរិក បានព្រមានឱ្យមន្ត្រីប៉ូលិសនៅតាមតំបន់នានា និងទីភ្នាក់ងារស៊ើបការណ៍សម្ងាត់អាមេរិកមានការប្រុងប្រយ័ត្ន និងត្រៀមខ្លួនដោះស្រាយការកើនឡើងអំពើហិង្សាជ្រុលនិយមរបស់ក្រុមអ្នកស្ដាំ និងឆ្វេងនិយម បន្ទាប់ពីការសិក្សាថ្មីមួយរកឃើញថាយុវជនអាមេរិកជិត ៤០ភាគរយ បង្ហាញការគាំទ្រក្នុងការចូលរួម «ធ្វើបដិវត្តន៍នយោបាយ» បើទោះជាបង្កឱ្យមានអំពើហិង្សាក៏ដោយ។

ខណៈសហរដ្ឋអាមេរិកកំពុងប្រឈមមុខនឹងការបែកបាក់នយោបាយយ៉ាងជ្រៅជាងពេលណាៗទាំងអស់ ដែលបង្កឱ្យមានការខឹងសម្បារ និងបញ្ហាប្រឈមជាច្រើនដល់ ភាពស្របច្បាប់នៃស្ថាប័ននយោបាយអាមេរិក ពិភពលោកទាំងមូលកំពុងភ័យខ្លាចថាប្រជាធិបតេយ្យអាមេរិក អាចដូចអ្វីដែលអតីតប្រធានាធិបតីអាមេរិក លោក រ៉ូណាល់ រីហ្គិន បានលើកឡើង នោះគឺ «ទីក្រុងដ៏ចែងចាំងមួយនៅភ្នំ បែរជាកំពុងស្ថិតនៅក្រោមការគំរាមកំហែងទៅវិញ»៕ ដោយ៖ Fresh News

សម្ដេចតេជោ ហ៊ុន សែន ទទួលជួបពិភាក្សាការងារជាមួយសាស្ត្រាចារ្យសកលវិទ្យាធិការ នៃសកល​វិទ្យាល័យ Krirk និងជាសមាជិកក្រុមប្រឹក្សាភិបាល នៃមជ្ឈមណ្ឌលត្រៀមបង្ការគ្រោះមហន្តរាយអាស៊ី

នៅវិមានសន្តិភាព ព្រឹកថ្ងៃពុធ ៧រោច ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី២០ ខែកក្កដា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញាតិឱ្យ សាស្ត្រាចារ្យបណ្ឌិត Krasae Chanawougse សកលវិទ្យាធិការ នៃសកលវិទ្យាល័យ Krirk និងជាសមាជិកក្រុមប្រឹក្សាភិបាល នៃមជ្ឈមណ្ឌលត្រៀមបង្ការគ្រោះមហន្តរាយអាស៊ី ចូលជួបសម្ដែងការគួរសម និងពិភាក្សាការងារ។

ឯកឧត្តម សាស្ត្រាចារ្យបណ្ឌិត Krasae Chanawougse បានគោរពជម្រាបជូនសម្ដេចតេជោថា ឯកឧត្តម បានមកកាន់ព្រះរាជាណាចក្រកម្ពុជានៅពេលនេះ គឺមានគោលបំណង៣ ទី១-គឺគោរពរាយការណ៍ជូនសម្ដេចតេជោ អំពីវឌ្ឍនភាពនៃមជ្ឈមណ្ឌលត្រៀមបង្ការគ្រោះមហន្តរាយ ដែលមជ្ឈមណ្ឌលនេះ មកដល់ពេលនេះ បានក្លាយខ្លួនទៅជាមជ្ឈមណ្ឌលអន្តរជាតិ ។ ទី២-គោរពជូនអាហារូបករណ៍ឈ្មោះសម្ដេចតេជោចំនួន ៤០ ដែលអាហារូបករណ៍នោះ មានបញ្ចូលទាំងថ្លៃសាលា ថ្លៃស្នាក់នៅ អាហារ ៣ពេល និងប្រាក់ឧបត្ថម្ភសម្រាប់សិស្សទៅសិក្សានៅប្រទេសថៃ និងទី៣-គោរពសុំការអនុញ្ញាតជួបសម្ដេចតេជោសារជាថ្មីនាឆ្នាំក្រោយ។

ជាការឆ្លើយតប សម្ដេចតេជោ ហ៊ុន សែន បានសម្ដែងនូវការអបអរសាទរ និងរីករាយដែលមជ្ឈមណ្ឌលត្រៀមបង្ការគ្រោះមហន្តរាយអាស៊ី ត្រូវបានក្លាយជាមជ្ឈមណ្ឌលអន្តរជាតិ។ សម្តេចតេជោបានផ្ដល់ជាអនុសាសន៍ថា គប្បីធ្វើយ៉ាងណាជំរុញឲ្យអង្គការនេះ មានសកម្មភាពដោះស្រាយទប់ស្កាត់គ្រោះមហន្តរាយជាក់លាក់។

សម្តេចតេជោនាយករដ្ឋមន្ត្រី បានថ្លែងអំណរគុណជូនចំពោះឯកឧត្តម ដែលបានផ្ដល់អាហារូបករណ៍ដាក់ឈ្មោះសម្ដេចតេជោ សម្រាប់សិស្សកម្ពុជា ទៅសិក្សានៅប្រទេសថៃ ។ សម្ដេចក៏បានសុំឲ្យឯកឧត្ដម បន្តពិភាក្សាជាមួយឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដើម្បីជ្រើសរើសសិស្សកម្ពុជាទៅសិក្សានៅប្រទេសថៃ។

ដោយឡែកចំពោះការស្នើសុំជួបសម្ដេចតេជោសារជាថ្មីនៅឆ្នាំក្រោយនោះ សម្តេចតេជោ បានសម្ដែងនូវសេចក្ដីរីករាយ នឹងជួបឯកឧត្តមរាល់ពេល ដែលឯកឧត្តមអញ្ជើញមកព្រះរាជាណាចក្រកម្ពុជា ៕

ក្រសួងការងារនឹងចុះធ្វើជំរឿន និងផ្ទៀងផ្ទាត់ទិន្នន័យចាក់វ៉ាក់សាំងរបស់កម្មករនិយោជិត នៅតាមរោងចក្រ សហគ្រាស

(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ នឹងចុះធ្វើជំរឿន និងផ្ទៀងផ្ទាត់ទិន្នន័យចាក់វ៉ាក់សាំងរបស់កម្មករនិយោជិត និងបច្ចុប្បន្នភាពព័ត៌មានរោងចក្រ សហគ្រាស និងចំនួនកម្មករនិយោជិត ព្រមទាំងការបង្កើតក្រុមការងារសុវត្ថិភាព និងសុខភាពការងារប្រចាំរោងចក្រ សហគ្រាស។ 

ជាមួយគ្នានេះដែរ ក្រសួងការងារ បានក្រើនរំឮក ដល់ម្ចាស់រោងចក្រសហគ្រាស ត្រូវសហការជាមួយអាជ្ញាធរមូលដ្ឋានរាជធានី ខេត្ត និងមន្ទីរការងារ និងបណ្ដុះបណ្ដាលវិជ្ជាជីវៈរាជធានី ខេត្ត និងណែនាំកម្មករនិយោជិតឱ្យទៅចាក់វ៉ាក់សាំងដូសជំរុញ ព្រមទាំងត្រូវបំពេញព័ត៌មាននៃការចាក់វ៉ាក់សាំង ក្នុងប្រព័ន្ធគ្រប់គ្រងទិន្នន័យរួមពាក់ព័ន្ធវិស័យការងារតាមរយៈគេហទំព័រ https://lacms.mlvt.gov.kh (https://lacms.mlvt.gov.kh/)។

ទន្ទឹមនឹងនេះ ម្ចាស់ ឬនាយករោងចក្រ សហគ្រាស ត្រូវធ្វើបច្ចុប្បន្នភាពព័ត៌មានរោងចក្រ សហគ្រាស ចំនួនកម្មករនិយោជិតតាមរយៈគេហទំព័រខាងលើ និងរៀបចំបង្កើតក្រុមការងារសុវត្ថិភាព និងសុខភាពការងារប្រចាំរោងចក្រ សហគ្រាសឱ្យបានត្រឹមត្រូវ។ សម្រាប់ព័ត៌មានបន្ថែម ម្ចាស់ ឬនាយក រោងចក្រ សហគ្រាស អាចសាកសួរព័ត៌មានក្នុងក្រុម «សម្រាប់និយោជក» តាមរយៈតេឡេក្រាម https://t.me/EmployerChat។

អធិការការងារនឹងចុះត្រួតពិនិត្យទិន្នន័យចាក់វ៉ាក់សាំងរបស់កម្មករនិយោជិត បច្ចុប្បន្ន ភាពព័ត៌មានរោងចក្រ សហគ្រាស និងចំនួនកម្មករនិយោជិត ព្រមទាំងការបង្កើតក្រុមការងារសុវត្ថិភាព និងសុខភាពការងារប្រចាំរោងចក្រ សហគ្រាស។ ក្នុងករណីម្ចាស់ ឬនាយករោងចក្រ សហគ្រាសមិនបានអនុវត្តតាមខ្លឹមសារនៃសេចក្ដីជូនដំណឹងនេះ ត្រូវចាត់ទុកថាល្មើសនឹងមាត្រា ៣៨២ នៃច្បាប់ស្តីពីការងារ ដែលត្រូវទទួលរងការពិន័យ និងចាត់វិធានការតាមផ្លូវច្បាប់ពីអធិការការងារ។

ក្រសួងការងារ និងបណ្តុះបណ្តាលវិជ្ជាជីវៈ សង្ឃឹមយ៉ាងមុតមាំថា ម្ចាស់ ឬនាយករោងចក្រ សហគ្រាសទាំងអស់អនុវត្តបានត្រឹមត្រូវតាមសេចក្តីជូនដំណឹងនេះ ប្រកបដោយប្រសិទ្ធភាពខ្ពស់៕

សេចក្ដីប្រកាសព័ត៌មាន លើលទ្ធផលនៃសន្និសីទសារព័ត៌មានស្ដីពី "សមិទ្ធផលសម្រេចបានរយៈពេល ៥ឆ្នាំ របស់ក្រសួងកសិកម្ម រុក្ខាប្រមាញ់ និងនេសាទ"

ក្រសួងការងារ៖ អតីតបុគ្គលិកណាហ្គាវើលដ៍ ៥នាក់បន្ថែមទៀត ព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុន

(ភ្នំពេញ)៖ ការិយាល័យអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា គិតត្រឹមថ្ងៃទី១៩ ខែកក្កដា ឆ្នាំ២០២២នេះ មានអតីតបុគ្គលិកណាហ្គាវើលដ៍ ចំនួន ៥រូបបន្ថែមទៀត ក្នុងចំណោមអតីតបុគ្គលិកដែលមិនទាន់ឯកភាពទទួលយកការទូទាត់ប្រាក់បំណាច់បញ្ចប់កិច្ចសន្យា បានមកទទួលយកដំណោះស្រាយតាមរយៈការធ្វើលិខិតព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុនរួចហើយ។

តាមរយៈសេចក្តីប្រកាសព័ត៌មាន របស់ក្រសួងការងារ បានឱ្យដឹងថា គិតមកដល់ថ្ងៃនេះ មានអតីតបុគ្គលិកសរុបចំនួន ២១៥រូប ក្នុងចំណោម ៣៧៣រូប បានយល់ព្រមទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម ១៥៨រូប។

ការិយាល័យអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា នាពេលកន្លងមក មានបងប្អូនអតីតបុគ្គលិកក្រុមហ៊ុន ណាហ្គាវើលដ៍ មួយចំនួន បានគោរពស្នើសុំ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្រសួងការងារ និងបណ្តុះបណ្តាលវិជ្ជាជីវៈ ឱ្យជួយអន្តរាគមន៍ ក្រុមហ៊ុនផ្តល់ប្រាក់បំណាច់បញ្ចប់កិច្ចសន្យាការងារស្របតាមច្បាប់ស្តីពីការងារ ចំពោះបងប្អូនអតីតបុគ្គលិកដែលត្រូវបានបញ្ឈប់ពីការងាររួម និងស្វែងរកឱកាសការងារថ្មី ដើម្បីទទួលបានប្រាក់ចំណូលទៀងទាត់សម្រាប់ផ្គត់ផ្គង់ជីវភាពគ្រួសារ។

នាពេលកន្លងមក មន្ត្រីជំនាញរបស់ក្រសួងការងារ និងបណ្តុះបណ្តាលវិជ្ជាជីវៈ បានធ្វើការពិនិត្យផ្ទៀងផ្ទាត់ការទូទាត់ប្រាក់បំណាច់បញ្ចប់កិច្ចសន្យាការងារជាមួយតំណាងក្រុមហ៊ុន ហើយពិនិត្យឃើញថា ការទូទាត់ចំនួន ៤ចំណុច គឺបានត្រឹមត្រូវស្របតាមច្បាប់ និងលិខិតបទដ្ឋានគតិយុត្តិពាក់ព័ន្ធនឹងការបញ្ឈប់ពីការងាររួម។

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹងត្រៀមខ្លួនដើម្បីជួយសម្របសម្រួលពាក់ព័ន្ធនឹងការជួយស្វែងរកឱកាសការងារថ្មីសម្រាប់បងប្អូនអតីតបុគ្គលិកផងដែរ៕

វិភាគអន្តរជាតិ៖ តើសហរដ្ឋអាមេរិក អាចជួយអ៊ុយក្រែនបានយូរប៉ុនណា?

(វ៉ាស៊ីនតោន)៖ ប្រធានាធិបតីអាមេរិក លោក ចូ បៃដិន បានសន្យាថានឹងបន្តផ្ដល់ការគាំទ្រដល់អ៊ុយក្រែន «ដរាបណាអ៊ុយក្រែនត្រូវការ»។ ដោយគ្រាន់តែគិតពី ជំនួយយោធាតែមួយមុខ រដ្ឋបាលលោក បៃដិនបានផ្ដល់ជំនួយដល់ទៅជាង ៨ពាន់លានដុល្លារមកទល់នឹងពេលនេះ ហើយកាលពីខែឧសភាកន្លងទៅ សភាទាំង២ របស់សហរដ្ឋអាមេរិក ក៏បានអនុម័តផងដែរនូវកញ្ចប់ជំនួយ ៤០ពាន់លានដុល្លារដែលជាកញ្ចប់ថវិកាមានទំហំធំជាងការស្នើសុំរបស់លោក បៃដិន និងច្រើនជាង កញ្ចប់ថវិកាយោធាប្រចាំឆ្នាំរបស់បណ្ដាប្រទេសនៅអឺរ៉ុបទៅទៀត ដើម្បីជួយអ៊ុយក្រែន និងដោះស្រាយផលវិបាកជាសកលបង្កឡើងដោយសង្រ្គាម។

ក៏ប៉ុន្តែ ខណៈសង្រ្គាមនៅអ៊ុយក្រែនបានឈានចូលជិតដល់ខែទី៦ ជាមួយការរំពឹងថាសង្រ្គាមនេះនឹងបន្តអូសបន្លាយពេលយូរតទៅមុខទៀត សម្ព័ន្ធមិត្តជិតស្និទ្ធ របស់លោក ចូ បៃដិន បាននាំគ្នាចោទសួរថាតើសហរដ្ឋអាមេរិកអាចនឹងហត់នឿយ ឬក៏អាចនឹងបន្តជួយអ៊ុយក្រែនដល់ពេលណា នៅក្នុងបរិបទដែលសូម្បីតែ ប្រជាប្រិយភាពរបស់លោក បៃដិន ខ្លួនឯងក៏កំពុងដាំក្បាលចុះក្រោមផងដែរ។ លោក បៃដិនកំពុងប្រឈមមុខនឹងបញ្ហាក្រពុលមុខជាច្រើនដូចជា អតិផរណា និងការឡើងថ្លៃប្រេងឥន្ធនៈដែលបាន និងកំពុងបង្កផលប៉ះពាល់ដល់ «អំណាចទិញ» របស់ប្រជាជនអាមេរិក រីឯគណបក្សសាធារណរដ្ឋត្រូវបានគេថាអាចនឹង ដណ្ដើមបានអាសនៈភាគច្រើននៅក្នុងការបោះឆ្នោតពាក់កណ្ដាលអាណត្តិនៅខែវិច្ឆិកា ឆ្នាំ២០២២ ឬក៏អាចត្រឡប់ទៅគ្រប់សភាតំណាងរាស្ត្រ រួមទាំងព្រឹទ្ធសភា សាជាថ្មីក៏ថាបាន។

លោក គ្រីស ខូន (Chris Coons) ជាសមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ និងជាមិត្តជិតស្និទ្ធម្នាក់របស់លោក បៃដិន ដែលមានពេលខ្លះគេ ហៅរូបលោកថា «រដ្ឋមន្ត្រីការបរទេសស្រមោល» របស់លោក បៃដិន ធ្លាប់បានលើកឡើងពីការព្រួយបារម្ភពីការប្ដេជ្ញាចិត្តនៃប្រជាជនអាមេរិក និងរដ្ឋបាលលោក បៃដិន ចំពោះអ៊ុយក្រែន។ ថ្លែងប្រាប់កាសែត The Economist កាលពីមិថុនាកន្លងទៅ លោក គ្រីស ខូន បានគូសបញ្ជាក់ដូច្នេះថា «ខ្ញុំពិតជាមានការព្រួយបារម្ភពី ការប្ដេជ្ញាចិត្តរបស់ប្រជាជនអាមេរិក និងមេដឹកនាំរបស់ពួកគេ ក្នុងការបន្តផ្ដល់ការគាំទ្រ ដារាបណាសង្រ្គាមនៅតែអូសបន្លាយ។ ពីព្រោះថាមេដឹកនាំរុស្ស៉ី លោក វ្ល៉ាឌីមៀ ពូទីន កំពុងរង់ចាំមើលលោកខាងលិចហត់នឿយ»។

ជាការពិតណាស់ ជំនួយដែលសហរដ្ឋអាមេរិកផ្ដល់ឱ្យអ៊ុយក្រែន គឺមានរយៈពេលរហូតដល់ដំណាច់ឆ្នាំសារពើពន្ធនៅថ្ងៃទី៣០ ខែកញ្ញា ឆ្នាំ២០២២។ ប៉ុន្តែ គ្មាន នរណាម្នាក់ដឹងថាតើលុយទាំងនោះនឹងត្រូវចាយអស់នៅពេលណានោះទេ។ មិនតែប៉ុណ្ណោះ មានមនុស្សតិចតួចណាស់ នៅក្នុងសភាអាមេរិកទាំង២ដែលជឿជាក់ ថានឹងមានកញ្ចប់ថវិកាដ៏ធំថ្មីមួយទៀតសម្រាប់អ៊ុយក្រែន ត្រូវបានអនុម័តនៅមុនការបោះឆ្នោតពាក់កណ្ដាលអាណត្តិ ហើយមនុស្សភាគច្រើនជឿថាការអនុម័ត កញ្ចប់ថវិកានៅពេលខាងមុខអាចនឹងមានផលលំបាកច្រើន។

ម្យ៉ាងវិញទៀត នៅចំពោះមុខការបាក់បែកនយោបាយកាន់តែជ្រៅរវាងក្រុមអ្នកសាធារណរដ្ឋ និងប្រជាធិបតេយ្យ វាប្រហែលជាមិនមែនជារឿងភ្ញាក់ផ្អើលអ្វីទេដែល ក្រុមអ្នកសាធារណរដ្ឋអាចនឹងនាំគ្នាចោទសួរ ឬប្រឆាំងនឹង «សង្រ្គាមប្រូកស៊ី» របស់រដ្ឋបាលប្រធានាធិបតីរបស់លោក ចូ បៃដិននៅអ៊ុយក្រែន។ តួយ៉ាង ការស្ទង់មតិ មួយធ្វើឡើងដោយសាកលវិទ្យាល័យ University of Maryland បានរកឃើញថាគម្លាតនៃការគំាទ្រចំពោះអ៊ុយក្រែនរវាងអ្នកប្រជាធិបតេយ្យ និងសាធារណរដ្ឋ មានទំហំធំ ហើយការគាំទ្ររបស់ប្រជាជនអាមេរិកចំពោះអ៊ុយក្រែនប្រយុទ្ធប្រឆាំងនឹងការឈ្លានពានពីសំណាក់រុស្ស៉ី ក៏បានថយចុះដែរ បើធៀបទៅនឹងកាលពី ខែមីនាកន្លងទៅ។

បើតាមការស្ទង់មតិនេះដដែល នៅក្នុងចំណោមអ្នកប្រជាធិបតេយ្យ មាន ៧៨ភាគរយ យល់ព្រមទទួលយកការឡើងថ្លៃប្រេងឥន្ធនៈ និង ៧២ភាគរយថានឹងអត់ធ្មត់ ទៅនឹងអតិផរណា ដើម្បីជួយអ៊ុយក្រែន។ ចំណែកឯ នៅក្នុងចំណោមអ្នកសាធារណរដ្ឋវិញ មានតែ ៤៤ភាគរយ និង៣៩ភាគរយប៉ុណ្ណោះដែលគិតដូចគ្នានេះ។

ក្រុមមន្ត្រីអាមេរិកបានឱ្យដឹងថាមានកត្តាចំនួន៣ ដែលទំនងជានឹងជះឥទ្ធិពលលើការគាំទ្រដល់អ៊ុយក្រែន។ កត្តាទី១ នោះគឺភាពស្មុគស្មាញរបស់សភាអាមេរិកទាំង២ នៅក្រោយការបោះឆ្នោតពាក់កណ្ដាលអាណត្តិ។ ប្រសិនបើគណបក្សសាធារណរដ្ឋអាចនឹងគ្រប់គ្រងសភាណាមួយ ឬក៏គ្រប់គ្រងទាំងសភាតំណាងរាស្ត្រ និងព្រឹទ្ធសភា នោះថាតើក្រុមមួយណានៅក្នុងគណបក្សមួយនេះដែលនឹងមានអំណាចធំនៅក្នុងដៃ? ពោលគឺថាតើអំណាចនឹងស្ថិតនៅក្នុងដៃមនុស្សដូចជាលោក មីត ម៉ាកខុនណែល (Mitch McConnell) ជាប្រធានព្រឹទ្ធសភាសំឡេងភាគតិច ដែលបានបំពេញទស្សនកិច្ចទៅកាន់ទីក្រុងកៀវ ដើម្បីបង្ហាញការគាំទ្រដល់លោក ហ្សេលេនស្គី? ឬក៏ក្រុមមនុស្សដែលស្មោះស័្មគ្រជាមួយលោក ដូណាល់ ត្រាំ និងនយោបាយ «ធ្វើឱ្យអាមេរិកអស្ចារ្យម្ដងទៀត» របស់លោក?

លោក ដូណាល់ ត្រាំ នៅតែមានអំណាចខ្លាំងនៅក្នុងបក្សសាធារណរដ្ឋ ហើយលោកធ្លាប់បានថ្កោលទោសកញ្ចប់ថវិកាជំនួយ ៤០ពាន់លានដុល្លាររបស់អាមេរិក សម្រាប់អ៊ុយក្រែន ដោយគូសបញ្ជាក់ដូច្នេះថា «ក្រុមអ្នកប្រជាធិបតេយ្យបានបញ្ជូនកញ្ចប់ជំនួយ ៤០ពាន់លានដុល្លារបន្ថែមទៀតទៅឱ្យអ៊ុយក្រែន ខណៈប្រជាជន អាមេរិកជាឪពុកម្ដាយ កំពុងតស៊ូចិញ្ចឹមកូនៗរបស់ខ្លួនទាំងលំបាក»។

កត្តា២ គឺថាតើសម្ព័ន្ធមិត្តអាមេរិកណាខ្លះ ជាពិសេសនៅក្នុងតំបន់អឺរ៉ុបដែលមានឆន្ទៈចង់បន្តជួយអ៊ុយក្រែនប្រឆាំងនឹងរុស្ស៉ី។ បណ្ដាប្រទេសអឺរ៉ុបមួយចំនួនដែលមាន ព្រំដែនជាប់ជាមួយរុស្ស៉ី សុទ្ធតែបារម្ភពីការកាត់ផ្ដាច់ការផ្គត់ផ្គង់ថាមពលទាំងស្រុងពីរុស្ស៉ី លំហូរជនអន្តោប្រវេសន៍ និងការគំរាមកំហែងដោយយោធារបស់រុស្ស៉ី ដ្បិត ពួកគេនឹងងាយរងគ្រោះបំផុត បើជម្លោះរាលដាលកាន់តែធំ។ បានន័យថាទោះជាពួកគេចង់ជួយអ៊ុយក្រែន តែក៏ត្រូវគិតគូពីសុវត្ថិភាពប្រជាជន និងផលប្រយោជន៍ ជាតិរបស់ពួកគេដែរ។

ចំណែកឯ កត្តាទី៣ ដែលជាកត្តាធំបំផុត នោះគឺស្ថានការណ៍ជាក់ស្ដែងនៅឯសមរភូមិ។ ប្រសិនបើលោក ចូ បៃដិនអាចបង្ហាញសម្ព័ន្ធមិត្តថាអ៊ុយក្រែនកំពុងឈ្នះនៅ ក្នុងសង្រ្គាម ជាជាងជាប់ផុងនៅក្នុងសង្រ្គាមរុំារ៉ៃ នោះច្បាស់ណាស់ ការស្វែងរកការគាំទ្រពីសម្ព័ន្ធមិត្តគឺជារឿងងាយស្រួល។ ប៉ុន្តែ សង្រ្គាមអ៊ុយក្រែនសព្វថ្ងៃ បាន និងកំពុងវិវត្តន៍ទៅរកសង្រ្គាមរុំារ៉ៃទៅហើយ។ អ៊ុយក្រែនបានទទួលជោគជ័យ ក្នុងប្រើប្រាស់ប្រព័ន្ធមីស៊ីល HIMARS ដើម្បីវាយប្រហារលើទីបញ្ជាការ និងមូលដ្ឋាន ជាច្រើនរបស់កងទ័ពរុស្ស៉ីនៅឯសមរភូមិមុខ។ តែទោះជាយ៉ាងនេះក្ដី កងទ័ពអ៊ុយក្រែននៅតែជួបបញ្ហាប្រឈម ដោយចាញ់ប្រៀបរុស្ស៉ីខាងសព្វាវុធ ហើយលើសពីនេះទៅទៀត គោលដៅរបស់លោក ចូ បៃដិន នៅក្នុងសង្រ្គាមអ៊ុយក្រែនមិនមានភាពច្បាស់លាស់ទេ។ រដ្ឋបាលរបស់លោកបានឈប់និយាយពីការ ជួយឱ្យអ៊ុយក្រែន យកឈ្នះលើរុស្ស៉ី ហើយបែរជានាំគា្នត្រឡប់មកនិយាយថាធ្វើយ៉ាងណាដើម្បីកុំឱ្យអ៊ុយក្រែនបរាជ័យទៅវិញ។

គួរបញ្ជាក់ថា ទីក្រុងវ៉ាស៊ីនតោនបានបញ្ជូនប្រព័ន្ធមីស៊ីល HIMARS និងអាវុធជាច្រើនទៅឱ្យអ៊ុយក្រែន តែគោលបំណងធំមួយទៀតរបស់លោក បៃដិនផ្ទាល់នោះគឺ បញ្ចៀសសង្រ្គាមដោយផ្ទាល់រវាងរុស្ស៉ី និងណាតូ (NATO) ជាមួយការដាក់លក្ខខណ្ឌកុំឱ្យកងទ័ពអ៊ុយក្រែន ប្រើប្រាស់អាវុធអាមេរិកដើម្បីវាយប្រហារចូលជ្រៅទៅ ក្នុងទឹកដីរុស្ស៉ី ហើយមកទល់នឹងពេលនេះរដ្ឋបាលលោក បៃដិន នៅតែបន្តបដិសេធបញ្ជូនប្រព័ន្ធមីស៊ីល ATACMS ដែលអាចបាញ់បានចម្ងាយ ៣០០គីឡូម៉ែត តាមការស្នើសុំរបស់អ៊ុយក្រែនឡើយ។

មានអ្នកខ្លះនិយាយថាសង្រ្គាមសព្វថ្ងៃ បានដើរដល់ដំណាក់កាល «គ្មានអ្នកឈ្នះ គ្មានអ្នកចាញ់» ហើយរដ្ឋបាលលោក បៃដិនគួរតែបង្កើនល្បឿនស្វែងរក ដំណោះស្រាយការទូត បញ្ចប់សង្រ្គាមឱ្យបានឆាប់។ តែសម្រាប់អ្នកគាំទ្រអ៊ុយក្រែនវិញ ពួកគេចង់ឱ្យលោក បៃដិនបង្កើនការបញ្ជូនឱ្យអាវុធឱ្យអ៊ុយក្រែន ហើយត្រូវ ហ៊ានប្រឈមមុខនឹងហានិភ័យដែលអាចនឹងកើតឡើង៕ ដោយៈ Fresh News