ថ្នាក់ដឹកនាំខេត្តពោធិ៍សាត់ ទទួលជួបពិភាក្សាការងារជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា

ពោធិ៍សាត់៖ លោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និងលោក ម៉ក់ រ៉ា ប្រធានក្រុមប្រឹក្សាខេត្ត នារសៀលថ្ងៃទី២១ ខែកញ្ញា ឆ្នាំ២០២១ បានទទួលបដិសណ្ឋារកិច្ចស្វាគមន៍លោក Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា ក្នុងឱកាសដែលលោក បានដឹកនាំគណៈប្រតិភូ ចុះមកសិក្សាស្វែងយល់និងពិភាក្សាការងារមួយចំនួនជុំវិញសក្តានុពលដែលមាននៅក្នុងខេត្ត និងលទ្ធភាពក្នុងការពង្រឹងកិច្ចសហប្រតិបត្តិការរវាងរដ្ឋបាលខេត្តជាមួយនឹងស្ថានទូតសហរដ្ឋអាមេរិក។

ពិធីនេះត្រូវបានធ្វើឡើងនៅវេទិកាដោះស្រាយក្តីក្នុងសាលាខេត្ត ដោយបានការអញ្ជើញចូលរួមពីលោក លោកស្រីអភិបាលរងនៃគណៈអភិបាលខេត្ត លោកនាយករដ្ឋបាលសាលាខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត លោកឧត្តមសេនីយ៍ទោស្នងការនគរបាលខេត្ត និងមេបញ្ជាការកងរាជអាវុធហត្ថខេត្ត សរុបប្រមាណ២២រូប៕