អភិបាលខេត្តកំពង់ចាម ចុះពិនិត្យមន្ទីរពិសោធន៍ វិភាគសំណាកជម្ងឺកូវីដ ១៩ និងរៀបចំទីតាំងដាក់ម៉ាស៊ីនផលិតអុកស៊ីស្សែន នៅក្នុងមន្ទីរពេទ្យខេត្ត

កំពង់ចាម÷ នៅថ្ងៃទី២៤ ខែសីហា ឆ្នាំ២០២១នេះ លោក អ៊ុន ចាន់ដា អភិបាលខេត្តកំពង់ចាម និងមន្ត្រីពាក់ព័ន្ធក្រោមឱវាទ បានចុះពិនិត្យមន្ទីរពិសោធន៍វិភាគសំណាកជម្ងឺកូវីដ ១៩ និងទីតាំងរៀបចំដាក់ម៉ាស៊ីនផលិតអុកស៊ីស្សែន នៅក្នុងមន្ទីរពេទ្យ ខេត្តកំពង់ចាម។ 

លោកសាស្ត្រាចារ្យ យិន ស៊ីណាត ប្រធានមន្ទីរពេទ្យ ខេត្តកំពង់ចាម បានឲ្យដឹងថា ថ្មីៗនេះ មន្ទីរពេទ្យ បានរៀបចំមន្ទីរពិសោធន៍១កន្លែង ដើម្បីពិនិត្យសំណាកវិភាគជម្ងឺកូវីដ១៩ ដោយប្រើប្រាស់ម៉ាស៊ីនកម្រិតមធ្យម អាចពិនិត្យ ក្នុងមួយថ្ងៃបានចំនួន ១០០ករណី។ បច្ចុប្បន្ន មន្ទីរពេទ្យកំពុងធ្វើការសាកល្បង ដោយយកលទ្ធផលទាំងអស់ទៅផ្ទៀងផ្ទាត់នៅវិទ្យាស្ថានប៉ាស្ទ័រ និងវិទ្យាស្ថានសុខភាពសាធារណៈ ហើយរង់ចាំ នៅពេលលទ្ធផលដូចគ្នា ទើបមន្ទីរពិសោធន៍នេះ មានលទ្ធភាព នឹងចេញលទ្ធផលដោយផ្ទាល់អំពីសំណាកវិភាគវីរុសកូវីដ ១៩។ 

ជាមួយគ្នានោះ លោកប្រធានមន្ទីរពេទ្យ បានឲ្យដឹងទៀតថា នៅពេលខាងមុខ យើងត្រៀមទីតាំង ១កន្លែង សម្រាប់ដាក់ម៉ាស៊ីនផលិតអុកស៊ីស៊ែន ដែលជាជំនួយ របស់លោក ហ៊ុន ម៉ានិត ផងដែរ ហើយគម្រោងនេះ នឹងចាប់ផ្ដើមធ្វើការសាងសង់ក្នុងពេលឆាប់ៗខាងមុខ ក្រោមការឧបត្ថម្ភគាំទ្រដោយរដ្ឋបាលខេត្តកំពង់ចាម។