ឯកអគ្គរដ្ឋទូតសាធារណៈរដ្ឋឥណ្ឌាប្រចាំនៅកម្ពុជា នាំយកអង្ករ ៥តោន និងមី ៣០កេស ផ្តល់ដល់អាជ្ញាធរឃុំទឹកហូត

 កំពង់ឆ្នាំង៖ នាថ្ងៃទី១៥ ខែ​វិច្ឆិកា ឆ្នាំ​២០​២០​នេះ លោកស្រីវេជ្ជបណ្ឌិត ដេវយ៉ានី ឧ.ឃូប៊្រាហ្គឺដេ ឯកអគ្គរដ្ឋទូតសាធារណៈរដ្ឋឥណ្ឌាប្រចាំកម្ពុជា បានប្រគល់អំណោយរបស់ស្ថានទូតឥណ្ឌា និងសប្បុរសជនឥណ្ឌា នូវអង្ករចំនួន៥តោន និងមី៣០កេស ដល់អាជ្ញាធរឃុំទឹកហូត ស្រុករលាប្អៀរ ខេត្ត​កំពង់ឆ្នាំង សម្រាប់ចែកជូនដល់ប្រជាពលរដ្ឋ រងគ្រោះដោយជំនន់ទឹកភ្លៀង។​

សូមជម្រាបថា អំណោយដែលបាននាំយកមកចែកជូននេះតាមរយៈ លោក សៅ​ ជីវ័ន្ត​ រដ្ឋលេខាធិការ​ក្រសួងអភិវឌ្ឍន៍ជនបទ​ តំណាងបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងលោក អម​ សុភា អភិបាលរងខេត្តកំពង់ឆ្នាំង ដោយមានការចូលរួមពីក្រុមការងាររាជរដ្ឋាភិបាលចុះមូលដ្ឋាន ឃុំទឹកហូត លោក យ៉ង់ សៅវុឌ្ឍី អភិបាល ស្រុករលាប្អៀរ និងអជ្ញាធរឃុំ៕