វិនិយោគគិនបរទេស មានជំនឿយ៉ាងមុតមាំលើការដឹក នាំរបស់លោក ហ៊ុន សែន ធ្វើឱ្យកម្ពុជាមានសុខសន្តិភាព

នៅថ្ងៃទី២៤ ខែសីហា ឆ្នាំ២០១៧ ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បានបញ្ជាក់ថា៖ កាល​ពីព្រឹកម្សិលមិញថ្ងៃទី២៣ សីហា បន្ទាប់ពីបានអញ្ជើញចុះមកសួរសុខទុក្ខបងប្អូនកូនក្មួយកម្មករ កម្មការិនីនៅរោងចក្រកាត់ដេរសំលៀកបំពាក់របស់ក្រុមហ៊ុនចិន New Evergreen Industrial Co Ltd.រួចហើយលោកនាយករដ្ឋមន្ត្រី ហ៊ុន សែន បានអញ្ជើញផ្តល់កិត្តិយសសម្ពោធដាក់ឱ្យប្រើប្រាស់ វិទ្យាស្ថានកាត់ដេរ របស់សមាគមរោងចក្រកាត់ដេរកម្ពុជា (GMAC) ដែលទើបសាងសង់រួចថ្មីៗនៅតំបន់សេដ្ឋកិច្ចពិសេសភ្នំពេញនេះ។

លោកនាយករដ្ឋមន្ត្រី ហ៊ុន សែន បានបញ្ជាក់នៅក្នុងហ្វេសប៊ុកថា ទាំងកម្មករ និងវិនិយោគគិនគឺអស់ជំនឿហើយលើការឃោសនារបស់ក្រុមមួយទៀត កុំឱ្យគេផ្តល់ជំនួយមកកម្ពុជា កុំឱ្យគេមកវិនិយោគនៅកម្ពុជា កុំឱ្យគេជួយទិញទំនិញកម្ពុជា ដែលជាទង្វើបំផ្លាញផលប្រយោជន៍និងការងារកម្មករ ផ្ទុយស្រឡះពីការខិតខំរបស់លោក ហ៊ុន សែន ដែលសុំឱ្យគេជួយកម្ពុជា សុំឱ្យគេមកវិនិ​យោគនៅកម្ពុជា សុំឱ្យគេជួយទិញទំនិញពីកម្ពុជា ដែលបាននិងកំពុងផ្តល់ការងារ និងប្រាក់ចំណូលធ្វើឱ្យជីវភាពរស់នៅរបស់បងប្អូនកូនក្មួយកម្មករកាន់តែប្រសើរឡើង។

ប្រមុខរាជរដ្ឋាភិបាលកម្ពុជា ក៏បានបញ្ជាក់ថា ក្រុមអ្នកវិនិយោគគិនបរទេស មានជំនឿយ៉ាងមុតមាំលើការ ដឹកនាំរបស់លោក ហ៊ុន សែន ដែលបានធ្វើឱ្យកម្ពុជាមានសុខន្តិភាព ជាមួយនឹងការធានា និងលើកទឹកចិត្តដល់គម្រោងវិនិយោគទុនរាប់រយ និង រាប់ពាន់លានដុល្លារនៅក្នុងប្រទេសកម្ពុជា៕