ថ្ងៃបិទបញ្ចប់ការឃោសនា! លោក គន់ គីម និងលោក ជា តារា ដឹកនាំសមាជិកសមាជិកា និងអ្នកគាំទ្រជាង ២ម៉ឺននាក់ រកសំឡេងឆ្នោតនៅខេត្តឧត្តរមានជ័យ

(ឧត្តរមានជ័យ)៖ លោក គន់ គីម សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណៈពង្រឹង ចុះជួយខេត្តឧត្តរមានជ័យ និង លោក ជា តារា អនុប្រធានក្រុមការងារចុះជួយខេត្ត នៅថ្ងៃទី០២ ខែមិថុនា ឆ្នាំ២០១៧នេះ បានដឹកនាំសមាជិក សមាជិកា ព្រមទាំងអ្នកគាំទ្រសរុបជាង ២ម៉ឺននាក់ យុទ្ធនាការឃោសនាថ្ងៃចុងក្រោយក្នុងខេត្តឧត្តរមានជ័យ។

ក្នុងយុទ្ធនាការឃោសនានេះដែរ ក៏មានការចូលរួម លោក សៀក សុជាតិ លោក ព្រហ្ម ផេង អនុប្រធានក្រុមការងារ ហើយសមាជិក សមាជិកាទាំងនោះ មកពីស្រុកអន្លង់វែង ស្រុកត្រពាំងប្រាសាទ ដោយក្បួនដង្ហែចាប់ផ្តើមពីរង្វង់មូល ស្រុកអន្លុងវែង ឆ្ពោះទៅព្រំប្រទល់ស្រុកត្រពាំងប្រាសាទ និងបន្តក្បួនឆ្ពោះរង្វង់មូលផ្សារស្រុកត្រពាំងប្រាសាទ។

ថ្លែងមុនចេញដង្ហែក្បូន លោក គន់ គីម បានថ្លែងអំណរគុណចំពោះបងប្អូនប្រជាពលរដ្ឋទាំងពីរស្រុក ដែលបានផ្តល់យុត្តិធម៌ ជូនគណបក្សប្រជាជនកម្ពុជា ដូច្នេះហើយទាំងអស់គ្នាត្រូវទៅបោះឆ្នោតឲ្យបានគ្រប់ៗគ្នា និងបោះឆ្នោតគាំទ្រគណបក្ស ប្រជជនកម្ពុជា គឺដើម្បីសន្តិភាព និងការអភិវឌ្ឍន៍ប្រទេសជាតិ ឲ្យមានការរីកចម្រើនបន្តទៀត។

លោក គន់ គីម ក៏បានផ្ដាំផ្ញើឲ្យបងប្អូនអញ្ជើញទៅបោះឆ្នោតជូនគណបក្សប្រជាជនកម្ពុជា ដែលមានរូបសញ្ញា «ទេវតាបាចផ្កា» ជាសញ្ញាសម្គាល់ឲ្យបានគ្រប់ៗគ្នា នៅតាមការិយាល័យបោះឆ្នោត ដែលស្ថិតនៅក្នុងឃុំរបស់បងប្អូន ហើយសូមមេត្តា កុំភ្លេចនាំយកនូវអត្តសញ្ញាណប័ណ្ណ ឬឯកសារតម្រូវផ្សេងៗ ទៅជាមួយ ដើម្បីទទួលបានសិទ្ធិបោះឆ្នោតស្របច្បាប់៕