ឯកឧត្តម David CAMERON ឆ្លើយតបមកសម្តេចតេជោថា រកមិនឃើញផែនទីដែលកម្ពុជាស្នើសុំខ្ចីទេ ប៉ុន្តែមានផែនទីកម្ពុជា៣ឈុត ដែលរក្សាទុកក្នុងបណ្ណាល័យអង់គ្លេស

ឆ្លើយតបនឹងលិខិតរបស់ សម្តេច​តេជោ ហ៊ុន​ សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះ​ថ្ងៃ​ទី​១៥ ខែ​កក្កដា ឆ្នាំ២០១៥ ដែលផ្ញើទៅឯកឧត្តម David CAMERON សុំខ្ចី​ផែនទីប្រវត្តិ​សាស្រ្ត​ដែលប្រហែល​ជា​ត្រូវ​បាន​ផ្ញើ​មក​រដ្ឋា​ភិបាល​អង់​គ្លេស ក្នុង​អំឡុង​ទស​វត្សរ៍​ទី​៦០ ឯកឧត្តម David CAMERON នៅថ្ងៃទី ២១ ខែសីហា ឆ្នាំ២០១៥ បានជំរាបជូនទៅសម្តេចវិញថា បន្ទាប់​ពី​ទទួល​បាន​លិខិត​របស់​សម្តេច ឯកឧត្តម បាន​ណែ​នាំ​មន្រ្តី​របស់​ឯកឧត្តម ឲ្យ​ធ្វើ​ការ​ស្វែង​រក​យ៉ាង​លំអិត​ នៅ​កន្លែងរក្សា​ឯក​សារ​របស់​ជាតិ (National Archives)។ ឥឡូវ​នេះឯកឧត្តមអាច​បញ្ជាក់​ជូន​សម្តេចវិញថា កា​រស្វែង​រក​នេះ​បាន​ចប់រួច​រាល់​ហើយ ក៏​ប៉ុន្តែរក​ពុំ​ឃើញ​ផែន​ទី​ណា​មួយ ដែល​រដ្ឋា​ភិ​បាល​អង់​គ្លេស អាច​ទទួល​ពីរាជ​រដ្ឋា​ភិបាល​កម្ពុជា ចាប់​តាំង​ពី​ពេល​នោះ​មក ដើម្បីរ​ក្សាទុក​នៅ​ក្នុង​កន្លែង​រ​ក្សាឯ​កសារ​របស់​ជាតិ​នៃចក្រភពអង់គ្លេសឡើយ​។

ឯកឧត្តម David CAMERON បានបញ្ជាក់បន្ថែមថា មានផែន​ទី​ចំនួ​ន៣​ឈុត គឺ​ត្រូវ​បាន​រក្សា​ទុក​ដោយឡែក​ នៅ​ក្នុង​បណ្ណា​ល័យ​អង់​គ្លេស ខ្នាត 1/100.000 ដែល​ផែន​ទី​ទាំង​អស់​នេះ បោះ​ពុម្ព​ដោយ​ក្រុម​ភូមិ​សាស្រ្ត​ឥណ្ឌូ​ចិន​ក្នុង​ចន្លោះ​ឆ្នាំ​១៩​៣៣ និង​១៩​៥៣។ ផែនទីទាំងនោះរួមមាន៖

1.            British Library catalogue tittle: Indochine 1:100,000. Series L.605

British Library shelfmark: Cartographic Items Maps 58515.(54.)

2.            British Library catalogue tittle: Carte de l’Indochine. Échelle 1:100,000.

British Library shelfmark: Cartographic Items Maps 58515. (22.)

3.            British Library catalogue title: Carte de l’Indochine. Échelle 1:100,000.

British Library shelfmark: Cartographic Items Maps 58515. (25.)

នាយករដ្ឋមន្ត្រីអង់គ្លេស ឯកឧត្តម David CAMERON បានឲ្យដឹងថា ផែន​ទី​ទាំង​នេះ គឺ​ជា​ឯក​សារ​ដែលអាច​រក​បាន​ជា​សា​ធារ​ណៈ ដែល​តំ​ណាង​ស្ថាន​ទូត​របស់សម្តេច ​អាច​រក​មើល​បាន​ប្រសិន​បើ​ចង់​រក ហើយព័ត៌​មាន​នេះ អាចមាន​ប្រ​យោ​ជន៍​ក្នុង​ការ​បំភ្លឺ​ស​ភាព​ការណ៍​បច្ចុ​ប្ប​​ន្ន ក្នុងព្រះរាជាណាចក្រកម្ពុជា៕