បន្ទាប់ពីមានការចាត់តាំងពីឯកឧត្តម បាន គីមូន អគ្គលេខាធិការអង្គការសហប្រជាជាតិ និងដោយមាន ការអនុម័តយល់ព្រមពីឧត្តមក្រុមប្រឹក្សានៃអង្គចៅក្រម ព្រះមហាក្សត្រនៃព្រះរាជាណាចក្រកម្ពុជា ព្រះករុណា សម្តេច ព្រះបរមនាថ នរោត្តម សីហមុនី ទ្រង់បានតែងតាំងចៅក្រម Michael Bohlander (ជនជាតិអាល្លឺម៉ង់) ជាសហចៅក្រមស៊ើបអង្កេតអន្តរជាតិថ្មី នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ចៅក្រមរូបនេះជំនួសចៅក្រម Mark Brian Hamon (ជនជាតិអាមេរិក)។
នាពេលថ្មីៗកន្លងទៅនេះ ចៅក្រម Michael Bohlander គឺជាសហចៅក្រមស៊ើបអង្កេតអន្តរជាតិបម្រុង។ នាពេលតែងតាំងនេះ គាត់ជាប្រធានផ្នែកនីតិព្រហ្មទណ្ឌអន្តរជាតិ និងប្រៀបធៀប នៅសាលាច្បាប់ Durhamដែលគាត់បានបំពេញការងារជាសាស្រ្តាចារ្យ តាំងពីឆ្នាំ ២០០៤ មកម្លេះ។ ពីឆ្នាំ ១៩៩១ ដល់ឆ្នាំ ២០០៤ ចៅក្រម Michael Bohlander បានបំពេញការងារជាចៅក្រមសាលាដំបូង និងសាលាឧទ្ធរណ៍ ជំនុំជម្រះលើរឿងក្តីព្រហ្មទណ្ឌ និងរដ្ឋប្បវេណីនៅតុលាការនៃរដ្ឋសេរី Thuringis ប្រទេសអាល្លឺម៉ង់ខាងកើត (East German Free State of Thuringia) នៅក្នុងដំណាក់កាលអន្តរកាល នៅឆ្នាំ ១៩៩០ បន្ទាប់ពីការរួបរួមរបស់ប្រទេសអាល្លឺម៉ង់។ ពីឆ្នាំ ១៩៩៩ ដល់ឆ្នាំ ២០០១ គាត់បានបំពេញការងារជាមន្រ្តីច្បាប់ជាន់ខ្ពស់នៃអង្គជំនុំជម្រះសាលាដំបូងនៃតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី។ ចៅក្រម Michael Bohlander បានទទួលសញ្ញាប័ត្រថ្នាក់បណ្ឌិតផ្នែកច្បាប់ និងសញ្ញាប័ត្រច្បាប់ ពីសាកលវិទ្យាល័យ Saarland។
ចៅក្រម Maureen Harding Clark (ជនជាតិអៀរឡង់) ត្រូវបានតែងតាំងជាសហចៅក្រមស៊ើបអង្កេតអន្តរជាតិបម្រុងថ្មី។ កាលពីពេលមុន ចៅក្រម Maureen Harding Clark បានបំពេញការងារជាចៅក្រមនៅតុលាការព្រហ្មទណ្ឌអន្តរជាតិ(ICC) និងជាចៅក្រមមិនអចិន្រ្តៃយ៍ (Ad Litem) នៅតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី។ ចៅក្រម Maureen Harding Clark បានបំពេញការងារនៅតុលាការកំពូលនៅDublin រហូតដល់ឆ្នាំ២០១៤ ហើយបច្ចុប្បន្ននេះ គាត់គឺជាចៅក្រមវាយតម្លៃ នៅក្នុងកម្មវិធីផ្តល់សំណង ចំពោះការវះកាត់អាងត្រគាក នៅប្រទេសអៀរឡង់៕
No comments:
Post a Comment