បន្ទាប់ពីលេចលឺថា រាជរដ្ឋាភិបាលមានគម្រោងរៀបចំឲ្យមានច្បាប់មួយ
ដែលគ្រប់គ្រងលើការប្រើប្រាស់ និងការផ្សព្វផ្សាយព័ត៌មាន តាមប្រព័ន្ធអ៊ីនធឺណេត អង្គការសង្គមស៊ីវិលមួយចំនួនបានធ្វើការរិះគន់ធ្ងន់ៗមកលើរាជរដ្ឋាភិបាល
ដែលបង្ហាញថា អង្គការសង្គមស៊ីវិលទាំងនោះ មិនអើពើយកចិត្តទុកដាក់អំពីការលើកកម្ពស់ការគោរពច្បាប់
និងការអនុវត្តច្បាប់នោះទេ។
ជាការពិតណាស់ ប៉ុន្មានឆ្នាំចុងក្រោយនេះ
សកម្មភាពប្រើប្រាស់អ៊ីនធឺណេតរបស់ប្រជាជនខ្មែរ
គឺមានភាពរីកចំរើនហួសពីការស្មាន ហើយចំនួនអ្នកប្រើប្រាស់អ៊ីនធឺណេត និងបណ្តាញសង្គមនានា ក៏កើនឡើងយ៉ាងគំហុក ដែលបណ្តាលឲ្យជះឥទ្ធិពលយ៉ាងធ្ងន់ធ្ងរដល់
ស្ថិរភាពជាតិ និងសណ្តាប់ធ្នាប់សាធារណៈសង្គម តាមរយៈការផ្សព្វផ្សាយខុសពីការពិត
និងធ្វើឡើងដោយចេតនាខ្មៅកខ្វក់។
កន្លងមកការប្រើប្រាស់ប្រព័ន្ធអ៊ីនធឺណេតនៅកម្ពុជា
ជាពិសេសយុវជន អ្នកលេង Facebook ដែលមាននិន្នាការគាំទ្រគណបក្សប្រឆាំង
បានប្រព្រឹត្តនូវទង្វើជ្រុសហួសហេតុ និងបានធ្វើឲ្យប៉ះពាល់យ៉ាងធ្ងន់ធ្ងរលើប្រពៃណីខ្មែរ។
យុវជនមួយចំនួនធំ បានធ្វើការបង្ហោះវីដេអូ ច្រៀងរាំរែក បែបកន្ត្រាក់ រំជើបរំជួលស្រើបស្រាល
ការជេរប្រមាថអ្នកដឹកនាំប្រទេស ការប្រើពាក្យសំដៅបញ្ឆេះហិង្សា ពាក្យសំដីអសីលធម៌
អសុរោះ។ សកម្មភាពរបស់ពួកគេ ហាក់បង្ហាញថាពួកគេទាំងនោះ សុទ្ធតែជាគតិបណ្ឌិត
ដែលចេះគ្រប់រឿងគ្រប់ជំនាញ និងបានធ្វើការបង្គាប់បញ្ជាថ្នាក់ដឹកនាំឲ្យធ្វើបែបនេះ
ធ្វើបែបនោះ។ ទោះជាមានភាពមិនប្រក្រតី និងអំពើអសីលធម៌ជាច្រើនរាប់មិនអស់កើតចេញពីការប្រើប្រាស់ប្រព័ន្ធអ៊ីនធឺណេត
និងបណ្តាញសង្គមនេះដ៏ដោយ ក៏គេមិនដែលឃើញអង្គការសង្គមស៊ីវិលណាមួយចេញមុខមករិះគន់ឡើយ។
យុវជន និងអ្នកប្រើប្រាស់ប្រព័ន្ធអ៊ីនធឺណេត
ដែលគាំទ្របក្សប្រឆាំង ជាញឹកញយបានកាត់ និងបង្ហោះ រូបភាព និងវីដេអូ ថ្នាក់ដឹកនាំ
ទៅជាសត្វធាតុ និងប្រមាថកិត្តិយសយ៉ាងធ្ងន់ធ្ងរ ដល់ថ្នាក់ដឹកនាំប្រទេស រួមទាំងក្រុមគ្រួសារយ៉ាងអាក្រក់បំផុតដែលមិនគួរនឹងអាចធ្វើទៅបាន
ក្នុងនាមជាកូនខ្មែរឡើយ។ ផ្ទុយទៅវិញ ប៉ុន្តែគេមិនដែលបានឃើញការរិះគន់ណាមួយចំពោះសកម្មភាពខុសឆ្គងធ្ងន់ធ្ងរទាំងនោះឡើយ
នេះជាការមើលរំលងមួយយ៉ាងធ្ងន់ធ្ងរមិនអាចទទួលយកបាន។
ការរិះគន់ ដែលខុសពីការពិត
រួមទាំងការជេរប្រមាថធ្ងន់ៗមកលើរាជរដ្ឋាភិបាល វាជាការរំលោភលើ លទ្ធិប្រជាធិបតេយ្យ
ដោយរាជរដ្ឋាភិបាលខ្មែរដឹកនាំប្រទេស សព្វថ្ងៃគឺស្របតាមច្បាប់រដ្ឋធម្មនុញ្ញនៃព្រះរាជាណាចក្រកម្ពុជា
ដែលការដឹកនាំប្រទេសនេះកើតចេញពីការគាំទ្ររបស់ប្រជាពលរដ្ឋខ្មែរភាគច្រើន ដែលបានបោះឆ្នោតជូន
មិនមែនឡើងកាន់អំណាចដោយផ្តាច់ការ រឺអត្តនោម័តនោះទេ។ ការបង្ហោះសកម្មភាពលើបណ្តាញសង្គមមួយចំនួន
ខុសពីការពិតគឺជាការជាន់ពន្លិចសីលធម៌ខ្មែរ និងតំលៃយុវជនយ៉ាងធំដែលមិនអាចមើលរំលងបានឡើយ។
ប៉ុន្តែគួរឲ្យសោកស្តាយណាស់ ដែលលេចលឺថារាជរដ្ឋាភិបាលគ្រោងរៀបចំឲ្យបានច្បាប់គ្រប់គ្រងអ៊ីនធឺណេត ដើម្បីបញ្ចៀសសកម្មភាពខុសសីលធម៌
និងការប្រព្រឹត្តផ្ទុយពីសីលធម៌ធ្ងន់ធ្ងរពេក ចំពោះអ្នកប្រើប្រាស់អ៊ីនធឺណេត
ដែលខុសពីច្បាប់នោះ បែរជារងការរិះគន់ពីសំណាក់អង្គការសង្គមស៊ីវិលទៅវិញ។ ការជម្រុញឲ្យប្រទេសមួយមានច្បាប់គឺ
ក្នុងគោលបំណងឲ្យសង្គមខ្មែរមានរបៀបរៀបរយ ស្ថិតក្នុងភាពជាអ្នកគោរពគ្នាទៅវិញទៅមក
និងដើម្បីថែរក្សាប្រយោជន៍ជាតិ សន្តិសុខ ស្ថិរភាព និងរបៀបរៀបរយសារធារណៈក្នុងសង្គមខ្មែរ។ នេះមានន័យថា ពេលសង្គមខ្មែរ វឹកវរ ពួកគេមិនដែលអើពើទេ
ដល់ពេលដែលរាជរដ្ឋាភិបាលគេរៀបចំឲ្យមានច្បាប់ទម្លាប់បែរជារិះគន់ទៅវិញ។
ដូច្នេះការរិះគន់របស់អង្គការសង្គមស៊ីវិលនេះ
គឺឆ្លុះបញ្ចាំងថាធ្វើឡើងដោយមិនបានបំរើផលប្រយោជន៍ដល់ប្រជាជនទូទៅនោះទេ
ការរិះគន់នេះ ហាក់បីបង្ហាញនូវគោលបំណងយ៉ាងជាក់លាក់ក្នុងយុទ្ធនាការ ប្រឆាំងច្បាប់
និងប្រឆាំងរាល់កិច្ចការងារទាំងអស់របស់រាជរដ្ឋាភិបាល។ ការសំដែងមតិមួយ គួរបង្ហាញតថភាពសង្គម។
ដូច្នេះតើអង្គការសង្គមស៊ីវិល ចង់ឃើញប្រទេសមួយធ្លាក់ទៅក្នុងអំពើហិង្សា
រឺចង់ឲ្យឃើញប្រទេសមានរបៀបរៀបរយ?
ធាតុពិតរាជរដ្ឋាភិបាលមិនដែលបានត្រួតពិនិត្យ
ការចេញផ្សាយព័ត៌មានរបស់ស្ថាប័នព័តមានណាមួយមុនពេលផ្សាយឡើយ ហើយបើរាជរដ្ឋាភិបាលពិតជាមិនបានគោរពសេរីភាពព័ត៌មាន
និងមានការបំបិទសិទ្ធិមែន មិនមែនវិទ្យុផ្សាយសំលេងអន្តរជាតិមួយចំនួន ដែលតែងតែធ្វើការផ្សព្វផ្សាយដោយរិះគន់មកលើរាជរដ្ឋាភិបាលធ្ងន់ធ្ងរ
នៅតែអាចដំណើរការការផ្សាយរបស់ខ្លួនដោយសេរី គ្មានការត្រួតពិនិត្យ និងសូម្បីតែគណបក្សប្រឆាំង
និងគណបក្សនយោបាយផ្សេងៗទៀត ក៏មានកម្មវិធីផ្សាយសំលេងរបស់ខ្លូននៅតាមវិទ្យុមួយចំនួន
ដែលតែងធ្វើការជេរប្រមាថ វាយប្រហារ និងរិះគន់អត់សំចៃមាត់ដោយសេរីបាននោះទេ។
បច្ចុប្បន្ននេះ ស្ថានភាពប្រើប្រាស់អ៊ីនធឺណេត
និងប្រព័ន្ធផ្សព្វផ្សាយសង្គម ហាក់មានសភាពហួសហេតុធ្ងន់ធ្ងរ ដែលបង្កើតបានជាវប្បធម៌ពាលាអាវាសែដល់យុវជន
វប្បធម៌ហិង្សានិយម វប្បធម៌អាសអាភាស វប្បធម៌ ពូនផ្តុំផ្តួលរំលំរដ្ឋឯករាជ្យតាមរយៈសង្គ្រាមអ៊ីនធឺណេត
និងគ្រោះថ្នាក់ដ៏ធ្ងន់ធ្ងរបំផុតនោះ គឺការធ្លាក់ចូលទៅក្នុងសង្គ្រាមរឺភាពវឹកវរណាមួយដោយ
សារការប្រើប្រាស់ប្រព័ន្ធផ្សព្វផ្សាយសង្គមនេះ ដោយសេរីហួសហេតុពេក៕
No comments:
Post a Comment