ភ្នំពេញៈ
តាមរយះកិច្ចសម្ភាសន៍មួយ ជាមួយបណ្តាញសារព័ត៌មានរាជរដ្ឋាភិបាល
GNN នៅថ្ងៃអង្គារិ៍ ទី២០ ខែ មករា ឆ្នាំ២០១៥នេះ លោក សុះ
ម៉ាច ដែលមានតួនាទីជាប្រធានសមាគមសិល្បៈករខ្មែរ បានបង្ហាញនូវអារម្មណ៍រន្ធត់
និងក្តុកក្តួលសង្វេកយ៉ាងខ្លាំង បន្ទាប់ពីទទួលបានដំណឹង ពីការស្លាប់បាត់បង់ជីវិតរបស់
លោក ស៊ីន ច័ន្ទឆាយា ដែលជាកូនប្រុសបង្កើតរបស់ លោកតា ស៊ីន ស៊ីសាមុត អធិរាជសម្លេងមាសដ៏ល្បីល្បាញក្នុងទសវត្សវ៍ទី៦០។
លោក
សុះ ម៉ាច បានសំដែងនូវការសោកស្តាយជាពន់ពេក ចំពោះការបាត់បង់វីរៈសិល្បៈកររបស់ខ្មែរមួយរូបនេះ
ហើយលោក បានចាត់ទុកថា នេះជាការបែកគ្នាដែលគ្មានថ្ងៃត្រឡប់មកវិញឡើយ។ លោក សុះ
ម៉ាច បានបន្តថា (បើនិយាយពីទំនាក់ទំនង គ្រួសាររបស់ លោកទាំងពីរ គឺតាំងពីជំនាន់ឪពុករបស់លោក
ស៊ីន ច័ន្ទឆាយា គឺលោកអ៊ុំ ស៊ីន ស៊ីសាមុត និងឪពុករបស់ខ្ញុំ គឺ លោក សុះ ម៉ាត់។
អ្នកទាំងពីរ ជាមិត្តភ័ត្តជិតស្និតនិងគ្នា និពន្ធបទភ្លេងឲ្យគ្នាច្រៀង និងនិពន្ធទំនុកច្រៀងឲ្យគ្នាទៅវិញទៅមក។
ឯទំនាក់ទំនងរវាងខ្ញុំនិងគាត់ គឺរាប់អានគ្នាដូចជាបងនិងប្អូន យើងស្រលាញ់គ្នាទោះបីជាអស់ពីឪពុកក្តី)។
លោក សុះ ម៉ាច ថ្លែងបន្តថា តាមគម្រោងនៅថ្ងៃស្អែកនេះ
ម៉ោង៩ព្រឹកសមាគមសិល្បៈ និងដឹកនាំក្រុម សិល្បៈកររបស់យើង រួមទាំងនាំយកនូវកំរងផ្កា
ទៅគោរពវិញ្ញាណក្ខន្ធរបស់លោក នៅគេហដ្ឋាន សព។
ចំពោះមូលហេតុដែលបណ្តាលឲ្យ លោក
ស៊ីន ច័ន្ទឆាយា ទទួលមរណភាពនោះត្រូវបានលោក សុះ ម៉ាច ឲ្យដឹងថា គឺដោយសារខ្យល់គរ
ហើយដួលបោកក្បាលទៅនិងថ្មខាងមុខផ្ទះរបស់គាត់ដែលមានអាស័យដ្ឋានស្តិតនៅ ផ្ទះលេខ៥០D ផ្លូវ ២០៤ ខាងត្បូងសាលាបឋមសិក្សាទឹកល្អក់៣ នៅសង្កាត់ទឹកល្អក់ទី៣
ខ័ណ្ឌទួលគោក រាជធានីភ្នំបេញ។ លោក សុះ ម៉ាច បានទម្លាយឲ្យដឹងពីប្រវត្តិជំងឺខ្លះៗ
របស់លោក ស៊ីន ច័ន្ទឆាយាមុននិងទទួលមរណភាពថា លោកមានជំងឺទឹកនោមផ្អែម និងលើសឈាម
តែមិនមានលក្ខណៈធ្ងន់ធ្ងរនោះទេ។ ហើយនៅមុនពេល ខ្យល់គរដួលដែលបណ្តាលឲ្យ លោក
ស៊ីន ច័ន្ទឆាយា ស្លាប់នេះ គឺលោកមិនមានអាការៈអ្វីប្លែក រឺមិនស្រួលខ្លួននោះទេ
គឺបន្ទាប់ពីលោក មកពីពិសារកាហ្វេពេលព្រឹកវិញ ហើយដើរមកដល់មាត់ទ្វារផ្ទះស្រាប់តែខ្យល់គរដួលបោកក្បាល ទៅនិងឥដ្ឋមុខផ្ទះស្លាប់ភ្លាមៗតែម្តង នៅវេលាម៉ោង១០ និង៣០នាទីព្រឹកមិញនេះ។
លោក សុះ ម៉ាច ក៏បានរំលេចឲ្យដឹងផងដែរពីប្រវត្តិនៃការប្រឡូកចូលវិស័យសិល្បៈរបស់
លោក ស៊ីន ច័ន្ទឆាយា ថា គឺគាត់បានប្រឡូកចូលវិស័យសិល្បៈតាំងពីឆ្នាំ១៩៧៩
នៅខេត្តក្រចេះ និងបានចូលក្នុងក្រុមតន្ត្រីវិទ្យុជាតិ នៅទីក្រុងភ្នំពេញនៅឆ្នាំ១៩៨៧។
គួរបញ្ជាក់ថា លោក ស៊ីន ច័ន្ទឆាយា កើតនៅថ្ងៃច័ន្ទទី០២
ខែមិថុនា ឆ្នាំ១៩៥៨ ក្នុងសង្កាត់លេខ៣ រាជធានីភ្នំពេញ។ លោកជាកូនទី២ របស់លោក
ស៊ីន ស៊ីសាមុត និងអ្នកស្រី ខាវ ថងញ៉ុត។ លោក ស៊ីន ច័ន្ទឆាយា បានរៀបការជាមួយអ្នកស្រី
សំ សាន។ ភរិយារបស់លោក ស៊ីន ច័ន្ទឆាយា ក៏បម្រើការងារក្នុងសិល្បៈចម្រៀងដែរ
ក្នុងឆ្នាំ១៩៧៩ ដល់ ឆ្នាំ១៩៨៩។ អ្នកទាំងពីរមានកូន៣នាក់ គឺកូនប្រុស ២នាក់
និង កូនស្រីម្នាក់៕
អត្ថបទៈ
ច័ន្ទ ទេវី
No comments:
Post a Comment